Indwara Ubuzima

Byinshi wamenya kuri kanseri y’inkondo y’umura

Nkuko izina ribigaragaza iyi ni kanseri ifata inkondo y’umura. Byumvikane ko ari umwihariko wa kanseri ifata gusa igitsinagore (nkuko na kanseri ya porositate ifata igitsinagabo gusa).
Inkondo y’umura ni agace kari hagati y’igitsina cy’umugore n’umura ikaba igira akamaro ko kuba ariho hanyura amaraso iyo umugore/kobwa ari mu mihango ndetse hakananyura intangangabo mu gihe cy’imibonano mpuzabitsina. Ni umwanya usa n’ufunze, ukaba wifungura mu gihe umugore agiye kubyara kuko niho umwana anyura aza ku isi.
Iyi kanseri tugiye kuvuga ibiyitera, ibimenyetso byayo ndetse tunavuge uko wayirinda.

ITERWA N’IKI?

Kugeza ubu nta mpamvu nyamukuru itungwa agatoki mu gutera iyi kanseri ariko hari ubwoko bwa virusi bwitwa HPV (Human Papilloma Virus), ikaba yandurira mu mibonano mpuzabitsina buzwiho kugira uruhare runini mu gutera iyi virusi.

Iyo umubiri w’umugore winjiwemo na HPV, ubudahangarwa bwe burwanya ya virusi ntigire icyo imutwara, nkuko biba no ku zindi virusi nyinshi. Gusa ku bagore bamwe, iyo virusi iribika ikaba yanamara imyaka myinshi nuko ikazatera kanseri kuko igenda imunga uturemangingofatizo tw’aho iherereye (mu nkondo y’umura). Aha twibutseko ubusanzwe uturemangingo dusanzwe tuvuka, tugakura tugasaza tugapfa, tugasimbuzwa utundi, mu gihe udutera kanseri two twiyongera ku buryo budasanzwe kandi two, ntidupfa.

Rero kuri iyi kanseri, imibereho bwite y’umugore niyo igira uruhare runini mu kuba yayirwara.

Abagira ibyago byinshi byo kuba barware iyi kanseri harimo:

  • Abakorana imibonano idakingiye n’abagabo benshi. Gusa nanone kuba uwo mwashakanye akorana imibonano idakingiye n’abagore benshi nabyo bikongerera ibyago byo kuba warwara iyi kanseri
  • Abatangiye gukora imibonano mpuzabitsina bakiri bato. Hano imyaka ivugwa ni mu gihe umukobwa atangiye gukora imibonano mpuzabitsina ari munsi y’imyaka 15, gusa abahanga benshi bemeza ko gukora imibonano mpuzabitsina kenshi uri munsi y’imyaka 18 byongera ibi byago.
  • Kuba usanzwe ufite izindi ndwara zandurira mu mibonano mpuzabitsina aho twavuga imitezi, mburugu, trichomonas, chlamydia ndetse n’ubwandu bw’agakoko gatera SIDA.
  • Kuba ufite ubudahangarwa budafite ingufu. Aha bishobora guterwa n’indwara idakira ufite, imirire itaboneye ituma utabona ibyongerera ingufu ubudahangarwa, …
  • Kunywa itabi nabyo byagaragaye ko byongera ibyago byo kurwara iyi kanseri

IBIMENYETSO

Iyo iyi kanseri ikigufata nta bimenyetso ugaragaza, bigenda byiyongera uko iminsi yiyongera. Muri byo tukaba twavugamo:

  • Kuva amaraso nyuma yo gukora imibonano mpuzabitsina, nyuma yo gucura ndetse no kuyabona Atari mu gihe cy’imihango
  • Kubona ururenda rurimo amaraso ruva mu gitsina rusa n’urukomeye kandi runuka
  • Kubabara mu kiziba cy’inda mu gihe cyo gukora imibonano

IYI KANSERI IRAVURWA?

Nyuma yo gusuzumwa bagasanga uyirwaye, muganga ahitamo bumwe mu buryo bukoreshwa mu kuyivura akabuhitamo agendeye ku cyiciro yari igezeho ikuzahaza, dore ko iyi kanseri ishyirwa mu byiciro bine. Gusa mu buryo bwose iyo ahisemo kubaga, avanamo umura aho ashobora kuwukuramo wonyine cyangwa ukagendana n’ibice biwukikije. Aha wibukeko iyo wakuwemo umura udashobora kubyara.

KUYIRINDA

Mu kugabanya ibyago byo kurwara iyi kanseri hari ibyo usabwa gukora:

  • Hari urukingo rwayo, ubusanzwe ruhabwa abakobwa bari hagati y’imyaka 9 na 26. Gusa bikaba byiza iyo uruhawe utarakora imibonano mpuzabitsina. Ubu mu Rwanda abakobwa bato bararuhabwa mu kubakingira.
  • Irinde itabi kuko ryongera ibyago byo kurwara iyi kanseri
  • Niba ukorana imibonano n’abagabo barenze umwe, jya wibuka gukoresha agakingirizo. Kandi ntikazakurinda iyi kanseri gusa kazanakurinda izindi ndwara zandurira mu mibonano mpuzabitsina na virusi itera SIDA ndetse kazanakurinda inda zitateganyijwe.

3 comments

  1. Murakoze Imana y' i Rwanda ikomeze kubagurira impano kubwo kutwingura ubwenge no kurengera ubuzima bwa benshi.

    Like

  2. Murakoze Imana y' i Rwanda ikomeze kubagurira impano kubwo kutwingura ubwenge no kurengera ubuzima bwa benshi.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s