Imirire Ubuzima

Ibyo ukwiye kumenya mbere yo gukoresha “Slimming tea” ibyayi byo gutakaza ibiro

Tutarebye ku bwoko runaka ngo hato tutagira uwo twibasira, ariko niba wifuza gutakaza ibiro, ushobora kuba warabwiwe no gukoresha ibyayi byagenewe kugabanya ibiro bizwi nka slimming tea. Ndetse ushobora kuba warahawe cyangwa warabwiwe gukoresha ibinini byo kugabanya ibiro, slimming capsules.
Ariko se uretse kuba warabwiwe n’ababiguhaye cyangwa ababicuruza ko bifasha kugabanya ibiro, waba usobanukiwe neza ibibigize, n’icyo bimarira umubiri koko?
Iyi nkuru igamije kuguha umucyo ku byerekeye ibyo byayi.
Ubusanzwe ibi byayi ababyamamaza babishyira mu nzego eshatu nkuru ari zo
  • Kugabanya iruba ryo kurya
  • Kubuza ikorwa ry’ibinure
  • Gufasha umubiri gukora vuba
Bakaba basobanura ko bibuza uwabikoresheje kurarikira ibiryo, bigasohora uburozi mu mubiri ndetse bigafasha umubiri gutwika calories nyinshi.
Ndetse ntibabura kukubwira ko mu gihe gito cyane uzaba wamaze gutakaza ibiro ku buryo bugaragara. Gusa iyo urebye usanga gukoresha ibi byayi nubwo bituma ugabanya ibiro ariko uba utatakaje ibinure nk’uko bikwiye ahubwo uba watakaje amazi.

Bikora bite se?

Ibi byayi byose iyo ubigenzuye usanga bigendera ku bintu bibiri by’ingenzi ari byo caffeine na senna.
Caffeine izwi nk’inkabura aho ifasha umubiri mu mikorere yawo gusa nta kinini ikora mu gufasha gutakaza ibiro ubwayo ahubwo ituma umubiri wongera ingufu mu mikorere yawo.
Senna yo izwiho gufasha mu kwituma, aho itera uburyaryate mu mara manini nuko akarekura ibiyarimo byose, ugahitwa.
Ibi na byo ntacyo bimarira ushaka kugabanya ibiro, kuko ntabwo ibyo twituma ari ibinure ahubwo iyo witumye uhitwa utakaza amazi menshi ku buryo utakaza ibiro gusa uba uri no kwangiza ubuzima bwawe.
Mbere yo gukoresha ibi byayi hari ibyo uba ukwiye kumenya no kuzirikana. Nubwo ibigize ibi byayi atari bibi ariko imikoreshereze yabyo ishobora gutera ingaruka ku buzima bwawe.

Ibitera kwituma

Ibi byayi nk’uko twabivuze byinshi biba birimo senna, ikaba izwiho gutera umuntu kwituma cyane birimo no guhitwa. Iyo bikozwe iminsi myinshi byatera ingorane zikurikira:
  • Isesemi
  • Impiswi
  • Nyuma yaho ushobora kugira impatwe
  • Kuribwa mu nda no gutonekara
  • Kuba imbata yabyo utabibona ntiwitume
  • Kugira amara adakomeye
  • Umwuma utewe n’impiswi
  • Kugabanyuka kwa potassium mu mubiri, bikaba byatera ikibazo cy’umuvuduko w’amaraso
窗体底端

Ibisohora amazi mu mubiri

Bimwe muri ibi byayi kandi biba birimo ibisohora amazi mu mubiri aho usanga uwabinyoye anyaragura inshuro nyinshi ku munsi. Gutakaza amazi menshi birimo ingaruka zikurikira:

  • Umwuma utewe no gutakaza amazi
  • Kubura imwe mu myunyu bikaba byatera imikorere mibi y’umutima
  • Ibinya mu mikaya yose
  • Impiswi

Gufasha imikorere y’umubiri

Ibyayi byinshi bivugwaho ko bifasha umubiri gukora n’ingufu bityo ugasohora imyanda itera umubyibuho. Gusa ubushakashatsi bwerekanye ko ibi byayi nta bibigize bizwiho koko gukora ibyo.
Ahubwo za polyphenols ziboneka mu cyayi ni zo zizwiho gufasha mu kuba watakaza ibiro, muri macye ibyo byayi ibituma bifasha gutakaza ibiro si ibyongerwamo, ahubwo ya majyani ubwayo, yaba ay’icyayi gisanzwe, green tea se ni yo ya ngombwa kurenza bya bindi bivangwmo.
Muri macye ntabwo ibyo bakubwiye binanura ari byo bituma utakaza ibiro, ahubwo winywereye mukaru cyangwa green tea ni bwo waba ukoze ibiri byo kuko uretse gufasha umubiri gutwika ibinure binafite ibindi byiza bikuzanira.

None?

Mu gihe wifuza kugabanya ibiro usabwa kwita ku bintu bitatu by’ingenzi
  1. Kwinjiza calories ziri munsi y’izo usohora
  2. Guhindura imirire, ibi ukaba ubifashwamo n’impuguke mu mirire
  3. Gukora siporo
Ibi bitatu iyo ubyubahirije neza, nta kabuza ibiro bigenda bigabanyuka. Kandi ntuzishimire gutakaza ibiro byinshi mu gihe gito kuko uba wangije ubuzima ahubwo uzatakaze bicye mu gihe kinini, ni bwo ukomeza gukomera kandi ukaba unafite ubuzima buzira umuze. Naho niwishinga abacuruzi hari byinshi ushobora kuzihombya ku buzima bwawe.

NB: Izi nama zitangirwa aha ntizisimbura inama zose wahabwa na muganga cyangwa umuhanga mu by’imirire.

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s