Ubuzima

Akamaro gusinzira amasaha ahagije bigirira ubwonko

Ese iyo wigenzuye usanga usinzira amasaha angahe ku munsi? Niba usinzira amasaha ari munsi y’arindwi ku munsi, ubwonko bwawe ni bwo bubihomberamo kuko gusinzira amasaha byibuze arindwi cyangwa umunani ku munsi bifasha ubwonko bwawe.

Ubushakashatsi buheruka gukorwa bwagaragaje yuko gusinzira bihagije bifasha ubwonko kwibuka no gufata mu mutwe ndetse ku banyeshuri ni byiza gusinzira bihagije mbere y’ikizamini kuko bigufasha kuza kwibuka byinshi.

Akandi karusho rero ko gusinzira ni uko bifasha ubwonko gusohora ubumara buba bwakozwe igihe uba uri maso.

Mu bindi bice by’umubiri, isukurwa n’isohorwa ry’ubwo burozi, ubumara n’imyanda bikorwa n’urwungano ruzwi nka lymphatic system rukaba rugizwe n’amatembabuzi yitwa lymph arimo ibigize amaraso byinshi ukuyemo insoro zitukura, imwe mu myunyungugu ndetse n’insoro zera zibamo ni nkeya ugereranyije n’izo mu maraso.

Igitangaje rero uru rwungano ntabwo wabona imiyoboro yarwo mu bwonko. Ibi byamaze igihe byarayobeye abahanga bibaza uko ubwonko nk’igice gikoresha ingufu nyinshi kurenza ibindi mu mubiri busohora uburozi n’imyanda biba byakozwe.

Ibi byatumye ubushakashatsi bukomeza gukorwa nibwo itsinda ry’abahanga bo muri University of Copenhagen na University of Rochester baje gusanga mu kwisukura, ubwonko bwifashisha amatembabuzi aba mu rutirigongo akazamuka agera mu bwonko aho aba azenguruka imiyoboro izana amaraso mu bwonko. Aya matembabuzi ni yo ajyana ya myanda yari mu bwonko akayigeza mu maraso aho iza gusohorwa mu mubiri binyuze mu nzira zagenewe gusohora imyanda n’uburozi mu mubiri.

Ibi bihuriye he no gusinzira?

Abo bashakashatsi bakomeje kugenzura baza gusanga ko iki gikorwa kigira igihe gitangirira n’igihe kirangirira. Si igikorwa gihoraho ku muvuduko ungana. Baje gusanga uku gusukura ubwonko bikorwa neza iyo umuntu asinziriye ndetse uburozi bugera kuri 80% ni cyo gihe busohokera mu bwonko, ibisigaye bisohoka buhoro buhoro iyo uri maso

Ubundi bushakashatsi bwashimangiye ibi aho bwerekanye ko abantu basinzira amasaha macye byaba kubera kubura ibitotsi, uburwayi cyangwa akazi kenshi aribo bagerwaho n’ibibazo byo kunanirwa ubwonko, kutibuka kurenza abasinzira neza. Ndetse ni nabo bagerwaho n’uburwayi bwa Alzheimer kurenza abasinzira neza. Kandi ibi byose ni ingaruka z’uko mu bwonko imyanda iba itasohotsemo bihagije, hakagira isigara.

Rero gusinzira bihagije ni ingenzi nk’uko kurya no gukora siporo na byo ari ingenzi. Si uko bifasha umubiri kuruhuka gusa ahubwo ni n’uko ari byiza mu gutuma ubwonko bubasha gusohora imyanda, uburozi n’ubumara buba bwakozwe ku manywa.

Ibuka gusinzira amasaha hagati y’arindwi n’icyenda ku munsi, ni byiza kuri wowe.

 

Ibyo twifashishije

 

    1. Iliff et al. (2012). A paravascular pathway facilitates CSF flow through the brain parenchyma and the clearance of interstitial solutes, including amyloid β. Science Translational medicine. doi: 10.1126/scitranslmed.3003748.
    2. Frost & Diamond (2010). Prion-like mechanisms in neurodegenerative diseases. Nature Reviews Neuroscience. doi: 10.1038/nrn2786.
    3. Xie et al. (2013). Sleep drives metabolite clearance from the adult brain. Science. doi: 10.1126/science.1241224.
    4. Yaffe et al. (2011). Sleep-disordered breathing, hypoxia, and risk of mild cognitive impairment and dementia in older women. Journal of the American Medical Association. doi: 10.1001/jama.2011.1115.
    5. Tranah et al. (2011). Circadian activity rhythms and risk of incident dementia and mild cognitive impairment in older women. Annals of Neurology. doi: 10.1002/ana.22468.
    6. Lucey et al. (2018). Effect of sleep on overnight CSF amyloid-β kinetics. Annals of Neurology, doi: 10.1002/ana.2511.

 

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s