Ubuzima

Ibyagufasha kwibagirwa ahahise hagutsikamira

Mu buzima bwa buri munsi tubamo, habamo ibyiza hakabamo n’ibibi. Usanga abantu bamwe bavugako ahahise hadufasha gutegura ahazaza, nibyo koko ariko ntihagakwiye kugira uruhare mu hazaza, kuko ahahise haba habaye amateka, igihe cyatakaye ntiwakigarura.
Hari bimwe ukora ukaba wabyirata mu hazaza, nk’amashuri wize, intego wagezeho, nyamara hari n’ibibi ushobora gukora ukaba wumva udashaka ko binagaruka mu ntekerezo zawe.
Ibi nibyo uba usabwa kugenda uhanagura mu bwonko bwawe uko ubishoboye, nkuko hano tugiye kuguha bumwe mu buryo bwagufasha kubyibagirwa.

1. Hindura imyumvire

Niba mu mutwe wawe hahoramo ibibi gusa wakoze mu hahise hawe ndetse n’aho watsinzwe, uzahora uri mu bitagufitiye akamaro kuko nicyo cyerekezo uzagumamo. Ubuzima bwawe bujya mu cyerekezo cy’ibitekerezo n’intego ziguhoramo, bivuze ko icyo uzatekereza ukagiha umwanya nicyo kizayobora. Aho guhoza ibitekerezo ku bibi byakubayeho, abakubabaje, ibyo wahombye cyangwa wabuze ahubwo bisimbuze ibifite agaciro. Tekereza ko ugiye gukomera, kuba umunyabwenge, umunyamugisha, panga imishinga iguteza imbere (ibuka ko byose bihera mu mutwe, ntawe ubyuka ngo ahite yubaka umuturirwa atarabitekerejeho), wiyibutse ko ahahise habaye amateka, byarangiye. Nta nundi uzitwaza amateka yawe ngo agusubize inyuma kuko wowe ubwawe uzaba watangiye kubona ko ari amateka nyine, ntacyo avuze ku hazaza.

2. Gira inshuti ureka

Ahazaza hawe ni ahawe ubwawe, ntawundi uzahagutegurira kuko n’uzagufasha nawe azaba afite intumbero. Hari inshuti nawe uziko kubana nazo ntaho byazakugeza nyamara wananiwe kuzicikaho. Niba ushaka gutunganya ahazaza hawe nicyo gihe ngo izo nshuti uzicikeho mutandukane. Za nshuti zikwibutsa ko uri mwene ngofero ntacyo wageraho, za nshuti zikwibutsa ngo nubona ayandi nayo uzayahombya, zimwe zikubwira ziti twinywere nubundi tuzapfa, izo zigendere kure ushake izindi zikungura ibitekerezo, zigufasha gutegura ahazaza heza. Binabaye ngombwa waba wenyine, aho kugendana n’inshuti zigusubiza inyuma.

3. Ishyirireho intego

Kimwe mu bigufasha kwibagirwa ahahise ni ukwishyiriraho intego. Ibuka ko ibyabaye bibi Atari ryo herezo ry’ubuzima, ishyiremo ko nta birenze byabaye. Ahubwo noneho ihe ingamba n’intego z’igihe kirekire n’ikigufi. Tangira utekereze uko wa mushinga wumva wazakora wawushyira mu bikorwa, uko amashuri wifuza kwiga wazayiga, utangire utekereze uko uzabona uwo muhuza mu kubana, mbese utekereze ibizma gusa. Nubwo byose utazabigeraho 100%, ariko bizagufasha gukora uharanira kubigeraho, bitume utabona umwanya wo guheranwa n’amateka y’ibyahise, nubwo byaba byari bibi gute. Ishyirireho igihe ntarengwa cyo kuba wesheje umuhigo runaka, uti wenda nyuma y’imyaka ibiri nzaba mfite perimi, nyuma y’amezi atanu ngomba kuba naguze igare, nyuma y’imyaka itanu nzaba mfite amashuri runaka, …

4. Iga kubabarira

Ikintu cyica intekerezo n’amarangamutima ni ukutabasha kubabarira. Kugirira umuntu inzika ni kimwe no kurya uburozi ukumva ko hari bupfe undi muntu. Inzika aho kuducyemurira ikibazo ahubwo itwangiza mu bwonko, tugahora twibuka ibibi byo twakorewe bityo ntitubone umwanya wo gutekereza ku byatugirira umumaro. Niba ushaka kwibagirwa neza, babarira abaguhemukiye, abagukoshereje. Yego biragoye cyane cyane iyo bakubabaje cyane, ariko nugira ubutwari bwo kuvuga uti “ndakubabariye”, uzaba wikuye mu kazu wifungiyemo. Urwango rusimbuze urukundo.

5. Hagarika kunezeza rubanda

Nyuma yo gufata imyanzuro inyuranye, uzasanga bamwe bavuga ngo wariyemeye, usigaye wirata, wabiciyeho, ngo ntibazi agacu usigaye uhindiramo, nibyo kandi koko kuko urashaka impinduka. Ntawe ufitiye ideni ryo kumusobanurira impamvu uri gukora iki cyangwa utagikora kiriya, kuko ni ubuzima bwawe bwite. Ntawe usaba uburenganzira cyangwa uruhushya rwo gukora ikigufitiye akamaro, cyangwa kureka ikitakagufitiye. Abanyarwanda barayamaze bati ntawe uneza rubanda, kandi koko ntushobora gushimisha bose.
Gushaka kunezeza buri wese ni ikintu dukura twifuza, tukabiharanira ariko NTIBISHOBOKA kuko niyo waba mwiza gute ntuzabura abakwangira uko kuba neza kwawe cyangwa se kuko nyine bumva batakwishimiye. Ba uwo ugomba kuba we, utitaye ngo abandi barabibona gute, upfa kuba gusa uri mu nzira nziza kandi ikunogeye. Ushaka ko mugendana mujyane, utabishaka umureke nawe azajyana n’abandi

Dusoza

Ubuzima ni nk’umuntu uri mu isiganwa. Usiganwa aramutse ahetse ibiro ijana, nibyo koko ashobora kugera aho asiganirwa kujya nyamara ntibishoboka ko yatsinda abagiye ntacyo bahetse.
Benshi twiteguye isiganwa, turanashaka gutsinda, nyamara turacyirukanka mu mugongo wacu duhetse ahahise hakadutsikamira. Tura uwo mutwaro uhetse w’ahahise, ubuzima burakorohera ubundi intego yawe uzayigeraho.

Mbifurije intsinzi muri byose

3 comments

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s