Imibanire Ubuzima

Inkingi zagufasha kubaka umubano neza

Kugirango wubake umubano ukomere si ibintu biba mu munota umwe kandi si ikintu wavuga ngo kizizana.

Haba hagati y’umusore n’inkumi, umugabo n’umugore, umubano usaba inkingi ushingiraho kandi zitanyeganyega. Uyu munsi ushobora gusitara kuri imwe ariko ejo bikagenda neza.

Byaba ikibazo gikomeye zose nta n’imwe ikomeye icyo gihe rwose uwo mubano ntabwo wazaramba. Ariko iyo ugiye buri nkingi uyiha agaciro, umwanya uhagije, nta kabuza umubano uba mwiza kandi ugakomera

Muri iyi nkuru tugiye kurebera hamwe inkingi z’ingenzi umubano ukwiriye gushingiraho ngo ube ukomeye. Tuvuze ko ari iz’ingenzi kuko zose mu nkuru imwe ntitwazivuga ngo zirangire, ni ahawe kureba aho ucika intege ugende uhongera ingufu.

 

    1. Gusobanukirwa

Ni ingenzi ni na byiza gusobanukirwa mugenzi wawe kugirango urukundo rwanyu rushinge imizi. Benshi bajya bahubuka mu gukunda ugasanga umuntu ntunazi aho akomoka ugahita wiyemeza kubana nawe. Aha rwose uba ukoze ikosa mu buzima, nubwo ushobora kugira amahirwe bikagenda neza ariko ubundi uba wabyishe.

Kumenya umuntu no kumusobanukirwa ntibisaba umunsi umwe gusa kuko n’imyaka irashira utaramusobanukirwa bihagije, ariko iyo ubishyizemo ingufu nawe akakwemerera kumusobanukirwa (ntakwihishe) nta kabuza mubana neza kuko muba muziranye.

    1. Kubaha

Kubaha uwo mukundana ni ikintu gikubiyemo byinshi kandi kikaba mu bintu shingiro ry’urukundo ruhamye. Haba mu magambo umubwira, ibyo umukorera, uko umugaragaza mu bandi, byose bifatanyiriza hamwe mu kwerekana agaciro umuha.

Kumushimira, kumucyeza, haba mu bandi cyangwa muri mwenyine ni kimwe mu bituma umutima we urushaho kukwishimira. Kandi niyo we yaba atakubaha si ngombwa ngo umwiture kutamwubaha nawe, kuko wowe usabwa kwera imbuto, ashobora kwigaya nyuma nawe agahinduka akihana mukabana neza

Agaciro ke mu mubano wanyu, mu bikorwa muhuriraho, ni ihame kubihuza byose ukabikoramo kumwubaha no kumwereka ko wabihaye agaciro

    1. Kwizera

Aha ho benshi birabagora dore ko no ku bizera babwirwa ngo uwizera umwana w’umuntu avumwe. Ariko se ubundi utizeye uwo ukunda wazizera nde koko? Ibuka ko ahasigaye h’ubuzima bwawe ari we muzahanyurana, ibuka ko ariwe muzarara mu cyumba kimwe mu buriri bumwe nta yindi sano ibahuje uretse urukundo gusa. Mu yandi magambo, urukundo rusaba kwizera kugirango rukomere kuko mu nda ni kure. Izere ibyo akubwira, izere ukuri kwe, nibyo bizabaha amahoro mwembi

    1. Ubushuti

Aha wahita uvuga ngo nubundi turakundana. Ariko burya hari ibindi bikora bya gishuti mushobora kuba mudakorana kandi ukabikorana n’abandi. Ni kangahe musohokana kubyina? Aha wahita uvuga uti ntabikunda. Ni kangahe mujya gusangira muri weekend? Ni kangahe umusohokana mugatembera kureba umupira cyangwa ku mazi? Ni kangahe mufata akanya mugakina amakarita, igisoro, mukajyana muri siporo…

Ibi byose ni ibintu birushaho kurema ubushuti muri mwe kandi bigatuma murushaho kwiyumvanamo.

    1. Kuganira

Aha bivuze kutavugana gusa amagambo y’urukundo cyangwa amagambo y’imitoma, kutamuvugisha ari uko ugiye kumubwira icyo ukeneye gusa. Ahubwo guhora muganira kuri buri kimwe, kumubwira aho ugiye, ibyo urimo (niba udakora akazi k’ibanga), abo muri kumwe (niba ari ngombwa ko abimenya), mbese kuba umwereka ko afite umwanya w’ingenzi mu buzima bwawe. Uko kuganira rero bifasha mu gukomeza umubano hagati yanyu

    1. Guca bugufi

Ese ni kangahe ubwira umukunzi wawe uti mbabarira? Ni kangahe umwereka ko uciye bugufi kuko hari aho wakosheje?

Uko siko guca bugufi konyine ahubwo ni urugero rwa hafi ntanze. Igihe cyose utigize intare cyangwa ingare bituma uwo mukundana arushaho kumva ko muri kumwe kandi nawe akarushaho kwisanzura no kugufasha mu gusana umubano. Ntawe udakosa, ariko uburyo dutsimbarara cyangwa duca bugufi nibwo buzagira uruhare mu mubano wacu ukaba mwiza cyangwa mubi

    1. Ubuhanga

Aha ni ahantu hakomeye kuko ubuhanga bwawe nibwo butuma umuntu mwarambana cyangwa ntimurambane. Ubuhanga bwo kumenya amagambo umubwira, kumenya icyo ureka kubera urukundo, icyo wigomwa, uko umwitwaraho mu bihe runaka, ubuhanga bwo kumwereka ko afite umwanya n’agaciro imbere yawe kurenza abandi.

Ubuhanga bwo kugaragaza amarangamutima no kuba wabasha kuyahisha (nk’uburakari), ubuhanga bwo kumenya amagambo umuganiriza atuma ahora yifuza kuba uwawe gusa.

    1. Ubuntu

Si ihame ngo uko uhuye ugire icyo umuha, si n’itegeko ngo ugire icyo utanga ngo urukundo rusangambe. Ariko nanone kuba yarwara ntumugemurire, kuba waba ubizi ko aburaye ntugire icyo ubikoraho kandi ubishoboye, byerekana ko utagira ubuntu utanamwitangira aho rukomeye. Ni byiza ko mu mubano wanyu ugerageza no gukora ibikorwa bisaba umwanya, ubutunzi se, kugirango agaciro umuha kagaragare. Ibi ntibivuze ngo wirye wimare, wikokore unaguzaguze, ariko mu bushobozi bwawe, mu gihe bikujemo gira icyo ukora ayaba agutabaje cyangwa wibwirije

    1. Ibanga

Ibanga ni ingenzi mu gukomeza umubano dore ko nta zibana zidakomanya amahembe kandi nta ntungane. Hari byinshi umunenga cyangwa umugaya, hari ibyo akora udashima, hari imyitwarire cyangw aimiterere ye itakunyura ariko ibukako ari inshuti yawe, umugore/umugabo wawe. Kuba afite igitsina gito cyangwa kinini cyane, kuba atagira amavangingo, kuba atazi gusasa, kuba ari umusinzi, kuba ntacyo akumariye kindi, kubivuga ubibwira umuhisi n’umugenzi ntabwo bicyemura ikibazo ahubwo bishobora kucyongera.

Hari ibyo wavuga kuko ari ngombwa wenda ushaka inama cyangwa muri gushaka uwo kubunga ariko menya ko buri mubano, buri rugo bigira amabanga byubakiraho, kurimena ni ukwangiza umubano

 

Si ibi gusa ariko nabyo ubyubahirije byaba ipfundo mu gutuma umubano wanyu uba mwiza kandi ukaramba

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s