Imibanire Ubuzima

Akamaro k’igitwenge ku buzima bwacu

Kuva umwana agejeje byibuze amezi ane avutse kugeza umuntu ashizemo umwuka, kimwe mu byerekana amarangamutima ye harimo igitwenge, guseka. Umwana abikora kenshi byoroshye dore ko aba yitwa igisekeramwanzi naho umukuru we uretse ba basekanimbereka naho ubundi umuntu aseka iyo hari inkuru yumvise, ikintu abonye se, cyangwa bamukirigise nuko bikazamura ibyiyumviro bye byo guseka.
Guseka birimo ibyiciro bitewe n’useka aho bamwe baseka akanya gato, abandi bakamwenyura naho abandi bagaseka urumenesha cyangwa bagakwenkwenuka.

Buriya rero guseka bafite akandi kamaro bifitiye ubuzima bwacu nkuko tugiye kubirebera hamwe.

1. Bigabanya imisemburo ya stress

Stress ni kimwe mu bibazo byugarije isi yacu, dore ko ari isoko ya zimwe mu ndwara zifata umutima n’ubwonko. Nyamara kandi guseka bifasha umubiri kuba wagabanya iyi misemburo nuko hakiyongera muri wo akanyamuneza n’ubuzima bwiza

2. Byongera imisemburo myiza ku buzima

Kwa kurwanya stress tubonye ruguru bifasha nanone mu kongera imikorere myiza y’umubiri dore ko bigabanya uburibwe bikongera imisemburo ya endorphins izwiho guhangana n’ububabare. Guseka ni byiza kurenza kuba wafata imiti igabanya uburibwe

3. Byongera ubudahangarwa

Guseka bituma umubiri ukora uturemangingo turwanya Indwara ku bwinshi nuko bikazamura igipimo cy’ubwirinzi ku ndwara. Nubwo utwo turemangingo turi mu moko anyuranye ariko ubushakashatsi bwerekana ko guseka bizamura utuzwi nka T-Cells. Utu tukaba tugira uruhare mu guhangana na na mikorobe ndetse tukica utundi turemangingo twamaze kwangirika, aho turinda kuba twarwara kanseri

4. Ni siporo

Mu gihe ibindi bice by’umubiri ubikoresha siporo wenda wiruka, uterura, woga, utwara igare se; ariko mu maso siporo yaho ni uguseka. Icyakora si uguseka gusa ahubwo no kuririmba biri muri siporo zifasha imikaya y’inzasaya no mu maso kuba yakora neza. Siho gusa bifasha kuko binafasha inyama zo mu nda, igicamakoma, ibihaha ndetse n’inda muri rusange.

5. Bifasha mu kuvura kanseri

Hejuru twabonye ko byongera ubudahangarwa bikanarwanya uturemangingo twabyara kanseri. Abahanga mu kuvura kanseri banavuga ko mu miti ihabwa umurwayi iyo hiyongereyeho igitwenge bimufasha koroherwa no kumwongerera ingufu zo guhagarika kanseri ntikomeze gukwirakwira mu mubiri

6. Kuringaniza umuvuduko w’amaraso

Ku barwaye umuvuduko udasanzwe w’amaraso, ubushakashatsi bwerekanako guseka bituma umuvuduko usubira ku gipimo gisanzwe. Iyo ugitangira guseka bituma amaraso asa n’avuduka ariko nyuma imiyoboro yayo ikaguka nuko akabasha gutembera neza. Ibi rero birinda Indwara zinyuranye z’umutima.

7. Kongera oxygen mu maraso

Iyo duhumeka tuba twinjiza umwuka wa oxygen mu mubiri kandi uyu mwuka ni ingenzi mu mikorere yose y’umubiri aho ufasha mu bikorwa byose bisaba ingufu zaba iz’ubwonko cyangwa iz’umubiri. Guseka rero bituma uyu mwuka wiyongera ndetse by’umwihariko ukaba mwinshi mu bwonko dore ko ari cyo gice cy’umubiri kiwukenera cyane kurenza ibindi

8. Bifasha kwibuka no guhanga udushya

Uretse kuba byongera umwuka wa oxygen mu bwonko binafasha kandi kuba wakibuka byaba ibyo wize, wasomye se cyangwa wabwiwe ndetse n’ibyo wabonye. Hamwe n’ibi kandi usanga abantu bakunda guseka barangwa no kubasha guhimba ibintu bishyashya nk’imivugo, indirimbo, ibihangano by’ubugeni n’ibindi.

Icyitonderwa

  • Guseka umwanya munini cyane bikurikirwa no gutonekara imikamba y’inda, ndetse bikamera nk’aho wakoze siporo ya abdomino. Ibi ntacyo bitwaye kuko bikira nyuma y’igihe gito
  • Icyakora ababazwe batarakira cyane cyane ababazwe babyara cyangwa inyama zo mu nda kimwe n’ababazwe ahandi hashobora kwangizwa no guseka (mu muhogo, igikanu, imisaya, …) si byiza kuba baseka kuko byatuma badakira vuba.

 

Abasigaye bandi bose, guseka ni umuti mwiza.

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s