Inkuru ndende

Birashoboka S02: Agace ka 2

Mu gace gaheruka twasize ubwo babwiraga mama Jacques uko ibirori byagenze, yaraturitse ararira, bakomeza kwibaza ikimurijije bakayoberwa icyo ari cyo.

Bakomeje kumwinginga ngo aceceke, maze nyuma y’igihe aza guceceka. Yabanje gusohoka akaraba mu maso, arihanagura agaruka aho abandi bateraniye nuko asaba ijambo.

Mama Jacques: Bavandimwe namwe bana banjye muri hano, uyu munsi kuri jye umbereye uwo kubura icyo mvuga, kumirwa, gutangara, gutungurwa, kwishinja, kwicuza, gushima mbese mbuze icyo nkora. Gusa munyemerere ntimundambirwe, ngire bimwe mbabwira kuko bitabaye uyu munsi ubanza ntazongera kugira amahirwe.

Ubwo nagiraga imyaka 18, numvise kuguma iwacu mu cyaro ntabivamo mfata umwanzuro wo kuhava nerekera mu mugi wari uhari. Ngezeyo sinari mfite akazi nakora kandi, nuko bugorobye mbona abandi bakobwa aho bari bahagaze ndabegera. Nabasabye kumpa akazi cyangwa bakancumbikira, bandebye barambwira ngo baraje banyereke akazi keza gatanga menshi. Nibwo bigeze mu gicuku haje umugabo wasinze arambwira ngo tugende. Nta yandi mahitamo nari mfite, turagenda, ibyo yankoreye na mwe muri bakuru murabyumva, ni uko natangiye uburaya. Muri ubwo buraya niho nahuriye na nyakwigendera papa Jacques, antera inda nshaka kuyikuramo ariko arambuza ambwira ko azamfasha kurera uwo mwana. Mu kuri ndashaka kongera gusaba imbabazi Jacques kuko uretse kuba naramutwise ntabishaka ariko no gukura kwe nta burere bukwiye namuhaye. Urumva umwana gukura abona abagabo batatu bane baza bagenda, bamwe bakahava dushwanye, abasiga bankubise, ndabizi byaramuhungabanyije. Rero mbonye uburyo ibi birori bibaye, agaciro nahawe nk’umubyeyi, nakibuka ko natekereje kuyikuramo, ni byo byansenguye umutima nanirwa kwihangana.

Ikindi nshaka kuvuga ni kuri Jacques na Jacqueline. Ni abana badahuje se, ariko uburyo bakundanamo bwaranshimishije nubwo ntabashije kubaba hafi ngo mbarere. Sinabura kandi gutanga impanuro kuri bombi kuko ahazaza habo hari mu biganza byabo. Kwitwara neza kwabo kuzabafungurira imiryango myiza nk’uko biri kugaragara ko byanatangiye. Sinifuza ko bazanyura mu nzira nanyuzemo kuko nta cyiza kiyibamo.

Ndasoreza ku gushimira umuryango wa Muhizi. Kuri jyewe nubwo ari urungano ariko bambyaye bwa kabiri, ubu ndatemba itoto nanjye mu gihe gito ubanza baza kundambagiza. Murakoze

Ijambo yashorejeho ryatumye abari aho bose baseka, ibyishimo birabataha. Buri wese yagize umwanya uhagije wo kugira ijambo avuga, nuko bwije bararuhuka.

Iminsi yakomeje kwicuma, maze umunsi nyirizina w’ubukwe uragera.

Wari umunsi w’agatangaza ku mpande zombi.

Paul yari yabaye Kigingi wa Jacques, naho Jacqueline amutwaza ururabo ari buhereze umugeni. Madamu Muhizi yabaye nyirasenge naho Muhizi aba umusaza mukuru.

Ba bakobwa na bo ntibari batanzwe kuko bambariye umugeni nk’inshuti ze za bugufi.

Umunsi w’ubukwe waranzwe n’ibice bitatu.

Mu gice cya mbere habayeho gusaba no gukwa, byakozwe neza cyane bambaye kinyarwanda, bateguye kinyarwanda. Bakoye inka nziza cyane, dore ko kuri bo inkwano ari ikimenyetso, bityo bashakaga ikintu kizahora kibibutsa ibyo bihe.

Umuhango wo gukwa urimo, ni bwo habayeho igihe cyo gutanga impano, maze umwo Jacques yambikaga sebukwe ingofero akamuha n’inkoni nk’ikimenyetso cyo kumwubaha, umusaza na we yikoze mu ikoti akuramo agapfunyika gato cyane akamushyira mu mufuka w’ikoti imbere, maze yongorera Jacques amagambo abandi batabashije kumva.

Ibirori bigeze ku musozo, hakurikiyeho kujya gusezerana imbere y’amategeko maze za nzozi Jacques yigeze kurota ziba impamo arahirira ku mugaragaro imbere y’inshuti n’imiryango kuzaba na Mugeni akaramata.

Ubwo bavaga gusezerana mu murenge, bakurikijeho gushyingirwa imbere y’Imana. Nyamara mbere yo kujyayo, Jacques yasabye Mugeni ko bahindura imodoka bari kugendamo

Mugeni: None se cheri kuki ushaka ko duhindura imodoka?

Jacques: Ndumva nshaka kugenda mu yindi yewe. Ahubwo ni na njye ndi bugutware tugana ku rusengero.

Mugeni: None se iyi twakodesheje?

Jacques: Turamwishyura nta kibazo rwose. Ahubwo ngwino tugende atugeze ahantu twifotoreza twenyine.

Baragiye maze bagera ahantu haparitse amamodoka menshi, nuko Jacques abaza Mugeni

Jacques: cherie muri izi modoka zose ari wowe wagenda mu yihe?

Mugeni: Zose ni nziza pee. Ahubwo ngendeye ku ibara nahitamo iriya idafite indi bisa. Uriya mukara wayo urabengerana neza rwose nawukunze

Jacques yahise akora mu ikoti, akuramo agapfunyika karimo kontaki, nuko ahita agenda asanga ya modoka neza neza Mugeni yahisemo, arayifungura ubundi bayicaramo

Mugeni: Cheri iyi modoka se bite byayo?

Jacques: Kuva uyu munsi iyi modoka ni iyacu. Cya gihe umusaza ampobera yampaye iyi modoka nk’impano. Aka gapfunyika dore amagambo yanditseho

 

“Bana banjye, nishimiye ko mutangiye umuryango mushya. By’umwihariko mwana wanjye Jacques, umukwe wanjye, narakwishimiye bidasanzwe urabizi. Ndagusabira gutera imbere ukaba ikirangirire. Nawe mukobwa wanjye, uzabe imfura nka nyoko, ugandukire umugabo. Iyi mpano mbahaye izajye ibibutsa iteka yuko mbakunda”

Amarira y’ibyishimo mu maso, barahoberanye, nuko bakomeza bagana aho ababategereje bari bagana urusengero nuko birangiye bakira abashyitsi.

 

Uwo munsi wabaye intangiriro y’ubuzima bushya, nuko ubwo batahaga, mbere yo kuryama, bafatanye mu biganza maze batera hejuru bombi bati

BIRASHOBOKA

 

Aha ni ho iyi nkuru igice cyayo cya mbere cyarangiriye. Burya koko birashoboka, nawe wahinduka, nanjye nahinduka. Ntabwo imico mibi ari karande, uko wamera kose iyo wemeye guhinduka ubona ibyiza n’inyungu nyinshi. Uko Jacques yahindutse bibe isomo kuri buri wese kandi tumufatireho urugero rw’uko nta kidashoboka iyo ufite ubushake.

 

Ariko se koko tubyemere yarahindutse?

Ese Mugeni ugiye kubana na muramukazi we, na nyirabukwe, we bazabana amahoro?

Agace ka 3 ntikazagucike ari na ko kazaba gatangira neza iki gice cya kabiri cy’iyi nkuru

 

© BIRAMAHIRE Francois JASSU

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s