Imibanire Ubuzima

Ingaruka mbi za televiziyo ku bana bato

Kimwe mu byifashishwa mu kureba amakuru anyuranye, filimi, n’ibindi binyuranye bibera ku isi ni Televiziyo. Kuri ubu ni kimwe mu bikoresho biboneka mu ngo nyinshi, ndetse hari aho ushobora gusanga badatunze radiyo ariko bafite televiziyo dore ko televiziyo zigezweho ushobora no kuzumviraho radiyo.

Nyamara buri murongo ureberwaho uba ufite ibyawo wihariye. Hari izo uba uzi ko ubonaho imiziki, izibonekaho filimi, amakuru, ibiganiro by’imyidagaduro, n’ibindi binyuranye. Mu gihe ubu abana batari ku ishuri, usanga amasaha menshi bayamara imbere ya televiziyo, aho baba bareba ibinyuranye bijyanye n’ibyo bakunda

 

Ubizi cyangwa utabizi, hari ibiganiro bimwe abana bashobora kureba bikaba byagira ingaruka mbi mu mikurire yabo nkuko muri iyi nkuru tugiye kubirebera hamwe.

 

Ni ibihe bibi abana bashobora kureba

Niba waritegereje neza, kuri filimi nyinshi berekana imyaka y’abemerewe kuyireba. Zimwe ni 12 kuzamura, izindi 15 kuzamura, ndetse hanabaho izitemerewe kurebwa n’abari munsi ya 18. ibi niba utajyaga ubyitaho ariko burya abakora filimi bo baba bagenzuye bagasanga neza neza muri iyo myaka runaka niho iyo filimi nta ngaruka mbi yagira ku buzima n’imyitwarire by’uyireba.

Fungura televiziyo ugende uhindura imirongo. Hari amahirwe yuko ushobora kugwa kuri kimwe cyangwa byinshi mu bikurikira:

  • Ubugome, ubwicanyi no kurwana
  • Ibikorwa biganisha mu mibonano mpuzabitsina cyangwa amagambo abivugaho
  • Kunywa inzoga, itabi cyangwa ibiyobyabwenge
  • Abantu bafata imyanzuro mibi ku buryo bugaragara
  • Gutukana cyangwa andi magambo adakwiye mu ruhame
  • Imyitwarire idasanzwe kandi mibi nk’umukobwa uryamana na buri musore wese cyangwa umuhungu usambana aho ageze hose

 

Ni ingero dutanze z’ibintu byagira ingaruka mbi ku myitwarire y’abakiri bato. Ariko kandi, nanone, nubwo filimi cyangwa ibiganiro bimwe byerekana ko byagenewe abana ntihabura kubonekamo n’ubundi ibidakwiye kurebwa na bo. Urugero mu biganiro byitwa TV14, usanga 50% za byo harimo ubwicanyi, imibonano, naho 75% bibonekamo inzoga.

 

Imibonano

Ikinyamakuru Growing up with media, mu 2010 cyatangaje ko kuri ubu, imibonano n’isakazamakuru bigendana. Mu bushakashatsi bwakorewe ku bana bari hagati y’imyaka 14 na 21 bwerekanye ko abarebye ibyerekeye imibonano ntibibatere kuba bayikora na bo bari bacye (2%), naho ababirebye bikabatera na bo kuyikora ni bo bari benshi bageraga kuri 60%. abasigaye barifashe ntibatangaza amakuru.

Uru ni urugero rumwe rwerekana ko uko abana bareba kenshi ibyerekeye imibonano ari ko na bo bibakururira kuba bayikora.

Kunywa inzoga

Mu bihugu byinshi ntibyemewe ko umwana utarageza ku myaka 18 ahabwa inzoga mu kabari cyangwa ahandi hose zigurishirizwa. Nyamara ibiganiro bimwe binyura kuri za televiziyo nka Gossip Girl, biba byerekana abana bakiri bato banywa amayoga kugera aho basinda. Nubwo kenshi biba ari ugukina abo bo batazinyoye ariko umwana ubireba akenshi abona ko yacitswe, na we akaba yacunga ababyeyi ku jisho na we akinyabya akajya kugasoma. Ingaruka  ni nyinshi.

Urugomo n’ubwicanyi

Nubwo wenda wahisemo kubereka cartoon ariko ntibihagije kuko ubushakashatsi bugaragaza ko abana bakunda kureba ubwoko bw’ibi biganiro ariko bibonekamo ubwicanyi, kwihorera n’ubugome usanga barangwa no gusuzugura, kwangiza, no kurwana kenshi hagati yabo.

Si ibyo gusa kuko n’ibitwa ko byagenewe abakiri bato nka Revolution, iri mu biganiro bya TV14, ibonekamo ibikorwa by’urugomo byinshi bitakabaye birebwa n’abo bana.

Iyo umuntu areba ibikorwa by’urugomo n’ubwicanyi kenshi kuri televiziyo biri mu bimutera kuba nk’icyihebe, hamwe ahinduka ikinya, simbikangwa, ndetse akanabona ko kurenganywa no gutotezwa ari ibintu bisanzwe. Ikizabikubwira ni uko abarebera hamwe filimi iyo umuntu arashe undi, amutemye se, aho kubabara ahubwo bahita bogeza, bakiyamirira, nk’aho ari ibintu bisanzwe cyangwa ari byo biryoshya filimi. Ku muntu mukuru bishobora kutamugiraho ingaruka mbi ariko ku mwana muto, ni ikibazo

Ubusabane

Ubushakashatsi bunyuranye bwagaragaje ko amasaha umara urangariye televiziyo agira uruhare mu gusabana no gukuza ubwenge. Ku bakiri bato biri mu bibatera ubwigunge, kutagira inshuti, kandi ibyo byose bikaba bibi mu mikurire no mu myigire. Bishobora gutera abana kubahuka abakuru, kubabwira amagambo biboneye, no kuba bakoresha amagambo ahatari ahayo

Ubuzima

Gukoresha cyangwa kureba televiziyo cyane bigira izindi ngaruka ku buzima bw’abana. Kenshi bituma baryama batinze ibi rero bigatera kudasinzira neza, ingaruka zikaba ibibazo by’umubyibuho ukabije ndetse n’indwara z’umutima.

Kuba yarya ari kureba filimi cyangwa ikindi kiganiro bituma atamenya niba yahaze cyangwa atahaze, ibi bigatera kutarya cyangwa kuryagagura kandi byombi si byiza ku buzima.

 

Hakorwa iki?

Ahari usomye iyi nkuru urikanga ndetse wumva ucitse intege kuko ubona amazi yarenze inkombe kandi nta garuriro. Ariko si byo igaruriro rirahari.Gusa nanone ntabwo umuti ari ukubuza abana kureba televiziyo burundu kuko hariho inyigisho zinyuranye bahigira.  Cyane cyane ku babyeyi n’abarezi b’abana hari ibyo mukwiye gukora:

  • Menya neza ibyo abana bareba, muri make banza umenye buri murongo bareba, ibiwunyuraho umenye amasaha uwo murongo bawurebera bitewe n’ikiganiro ushaka ko bareba.
  • Ibutsa abana ko ibyo bareba akenshi biba bitarabayeho kandi ko ari amasomo. Bibutse ko kunywa inzoga atari bwo bugabo, ko imibonano ikorwa mu gihe nyacyo kandi cyayo n’ibindi binyuranye.
  • Bagenere amasaha yo kureba televiziyo bayamenyere, ahubwo andi bakoremo ibindi bikorwa. Bafashe umukozi isuku, bakine imikino runaka itari iyo kuri TV cyangwa telefoni, mbese basabane
  • Mu gihe bishoboka, fatanya na bo kureba ibiganiro, maze ubihereho ubaha amasomo yo mu buzima n’uko bakitwara.

 

Ahasigaye, jonjora umenye ko kurera atari ukugabura gusa. Ibyo ubiba ni byo usarura, bizirikane.

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s