Ubuzima

Ese haba hari ingaruka zo gufunga umusuzi?

Gusura byo si igitangaza ntawe udasura kuva ku mwana ukiri mu nda kugera ku musaza/mukecuru. Nyamara nubwo ari ibintu bisanzwe, gusura mu ruhame bitera isoni n’ikimwaro, niyo mpamvu twese, rimwe cyangwa kenshi bitubaho gufunga umusuzi.

 

Ariko kandi twakibaza tuti ese buriya gufunga umusuzi nta kintu byakangiza mu mubiri? Ese nta ngaruka zabyo? Cyangwa ntacyo bitwaye?

 

Muri iyi nkuru tugiye gusubiza ibi bibazo ushobora kuba wajyaga wibaza.

 

Mu gisubizo cyahuranyije, gufunga umusuzi si byiza ku buzima kandi bigira ingaruka zinyuranye nk’uko tugiye kubisobanura

 

 

Bwa mbere, gufunga umusuzi bituma wa mwuka washakaga gusohoka usubira mu mara, nuko bigatera gutumba no kumva mu nda hari ibiri kuvugiramo by’ibyuka, bamwe babeshyera ngo ni inzoka.

 

Bwa kabiri, wa mwuka burya nubwo uba uzi ngo wawubujije gusohoka, ni hahandi wo wishakira inzira unyuramo. Ushobora kugenda ukivanga mu maraso, iyo utivanze mu maraso, usohoka unyuze mu nzira y’ubuhumekero ugasohokera mu kanwa. Niba umusuzi wari gusura wari bube unuka, ni bwo no mu kanwa hazasohoka umwuka unuka, tumenyereye nko gutura amangati. Gusa si ihame ko umuntu wese utura amangati aba yari yafunze umusuzi ahubwo ni imwe mu ngaruka zo kuwufunga, nubwo hari izindi mpamvu zatera amangati.

 

Bwa gatatu bishobora gutuma mu mara manini hikora udufuka turimo umwuka, kandi nubwo twa dufuka turimo umwuka ubwatwo nta byago duteza, rimwe na rimwe tujyamo mikorobi mbi, nuko aho turi hakaza ubwandu. Nubwo bidaterwa gusa no gufunga umusuzi, ariko kuwufunga biri mu bitera utu dufuka mu mara

 

Bwa kane, wa musuzi uzawunyunya igihe kinini ariko uze kurangara ugucike. Nkuko uzi iyo ukandagiye ishashi irimo umwuka uko biturika, ni ko bizagenda icyo gihe maze ibyo wari wanze kare ari byo bikubaho noneho umusuzi uze n’imbaraga kandi kenshi uzaba unanuka.

 

Rero igihe ushatse gusura kandi uri mu bantu, jya ku ruhande, usure, umare akanya gato ugaruke mu bandi, uzaba wirengeye kandi utiteje abantu.

 

Ese uretse umusuzi, ubu ntihari ingaruka zo gufunga inkari? Ni mu nkuru itaha

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s