Ubuzima

FIRDAUS: Agace ka 30



Maurice: Niko ngo inda ni iyanjye? Sobanura neza
Keila: Mu kuri naragukunze ku buryo utabyumva. Gusa ntabwo wabeshye, nanjye narabibonaga ko utankunda peee. Nibwo nabiganirije mubyara wawe Zahara, ambaza niba nararyamanye nawe ndamwemerera. Arongera ambaza niba nzi ukwezi kwanjye uko kureshya mubwira ko ntabizi neza, anyigisha kubibara. Nuko ambwira amayeri nzakoresha maze ukantera inda. Yambwiraga ko unteye inda ntaho wancikira, ko unabyanze yazabibwira mama wawe, ubundi imiryango ikagutegeka kundongora ku ngufu.
Maurice: Nuko se nayigutereye hehe?
Keila: Reka mbanze nkomeze byose ndabigeraho. Ubwo rero nabonye ejobundi ukuntu wari wamaramaje, mbona ko nuramuka nubundi umenye ko inda ntwite ari iyawe, utakemera kubana nanjye. Nibwo nafashe umwanzuro wo kwiyahura, kubera Imana cyangwa shitani none sinapfuye.
Ines: None se wabigenje ute koko? Jyewe nifitiye amatsiko rwose
Keila: Umunsi umwe niba Maurice abyibuka neza naramubwiye ngo nshaka ko dusohoka. Yaraje turajyana na musaza wanjye. Umuntu musangira kenshi uba uzi inzoga zimusindisha vuba, ukanamenya uko yitwara iyo yasinze. Nari mbizi ko iyo yasinze atangira kunkorakora no kunsoma, ibyo byatumaga nizera ko nasinda, kuryamana na njye bizoroha. Ikindi nari nzi ko iyo yasinze aba atibuka ibyabaye, bityo nari nizeye ko ntacyo ari bukore ngo bibure kubaho, kandi atazanabyibuka kugeza mbimubwiye. Rero niko byagenze, naramusindishije, ndangije mujyana mu modoka niho twabikoreye, kandi nari mbizi neza ko ndi mu gihe cy’uburumbuke. Musaza wanjye yari ari kubyina ntiyanamenye ko twasohotse, twarinze tugaruka umuziki wamuryohanye.
Maurice: Uzi ko wakica n’umuntu wowe. Kumbe wa munsi ni uko byagenze? Rata narakangutse mbona ku ikariso harimo amasohoro macye nkibaza niba niroteyeho ducye, bikanyobera. Gusa ndakubabariye nawe wabikoze kubera urukundo nubwo jyewe ntarwo nakweretse.
Fridaus: None se kuki mutamubwira uko byagenze ibindi?
Maurice: None se Keila, witeguye kwakira inkuru mbi yindi ngiye kukubwira?
Keila: Humura namaze kwiyakira, ubu inkuru yose wambwira nayumva
Maurice: Ubwo twakugezaga hano, muganga yatubwiye ko inda ufite igumyemo na we wahasiga ubuzima, nuko bafata umwanzuro wo kuyikuramo
Keila ( arira): Mana wee. Ubu koko na ya nda nari nizeye ko nzajya nkwibukiraho yavuyemo. Gusa nta kundi buriya ni Imana yashakaga guca imigozi yose iduhuza. Basi nyine ubwo amahirwe ni aya Firdaus, azaryoherwe.
Twakomeje kumuganiriza tumuhumuriza, gusa nta wigeze atekereza kuba yamubaza uko yabigenje yiyahura.
Nyuma y’iminsi itatu
Keila: Icyakora ndumva mfite isoni
Ines: Isoni se kubera iki kandi?
Keila: Ukuntu niyahuye yewe simpfe
Ines: Oya nta mpamvu yo kugira isoni. Ubundi se uretse twebwe hari undi uzi ko wiyahuye?
Keila: Sha nanjye ariko nabikoze nabi ubanza nari mfite ubwoba bwo gupfa. Ese ubundi kuki mutambajije uko nabigenje
Firdaus: Ahubwo se wa mugani wawe wiyahuye ute?
Keila: Buriya nagiye numva ndi buhite nijugunya mu modoka iri gutambuka ikangonga, noneho ndabitinya mpitamo gutega moto. Ubwo naramubwiye ngo niyihute, yongeje umuriro mpita nyisimbuka. Kandi nari nanze kwambara ingofero, nuko mponda umutwe hasi. Nagaruye ubwenge ndi hano kwa muganga.
Ines: Ubwo se koko wumvaga wasimbuka moto atari no muri kaburimbo, ugapfa? Buriya ni Imana yabikoze ngo ubone ko Firdaus atakwanga kandi mudakwiye gupfa Maurice. Dore iminsi yose ni we ukurwaje
Keila: Sha cyakora disi Firdaus ni umwana mwiza. Ababyeyi be bamureze neza rwose barakabyara hungu na kobwa
Yavuze ayo magambo numva ikiniga, ndasohoka njya hanze ndiherera ndarira. Ukuntu azi ngo ndi umuntu warezwe neza nyamara ari imico nivukaniye. Ubu iyo ngira ababyeyi beza nari kuba nanjye nishimye, kandi nari kuba mfite wenda imico myiza kurenzaho kuko uburere buruta ubuvuke.
Nkiri aho, nabonye muganga aje atugana afite impapuro mu ntoki. Nahise nihanagura nuko aransuhuza ambaza uko umurwayi amerewe mubwira ko ari koroherwa noneho ari no gutera urwenya
Twarinjiye na muganga
Muganga: Keila nizere ko ubu noneho twagusezerera ugakomereza imiti mu rugo
Keila: Ndumva nta kibazo, gusa akaguru niko kibazo
Muganga: Uzajya wifashisha imbago, kandi ibyiza ugure izo bafatira mu kwaha ni zo nziza, zituma utananirwa umugongo. Uko uzajya ugenda wumva woroherwa uzagera aho uzireke
Keila: Yego nzabyubahiriza
Muganga: Rero kuko watakaje amaraso menshi, hano nabazaniye urupapuro rwanditseho ibyo wajya ufungura kugirango ugarure amaraso watakaje.
Ubwo yararuduhereje dutangira kurusoma, kugirango Keila aziyondore.
Ngibi ibyari biri muri iyo nyandiko
Intungamubiri zifasha kongera amaraso

 

Gufata amafunguro akize kuri izi ntungamubiri ni bimwe mu bizagufasha kuzamura igipimo cy’insoro zitukura bityo utandukane n’ikibazo cyo kugira amaraso macye.

 

 1. Ubutare


Ubutare (fer/iron) ni bwo buza ku isonga dore ko bunagize uturemangingo tw’insoro zitukura (hemoglobin) bityo bukaba buzwiho gufasha mu ikorwa ryazo ku bwinshi.

Amafunguro akungahaye ku butare twavuga:
  • Inyama zitukura cyane cyane iz’inka, aha byiza ni uguhuta umufa wazo
  •  
  • Inyama y’impyiko cyangwa se y’umwijima
  •  
  • Imboga rwatsi zijimye nka epinari, isombe na sukumawiki (kale)
  • Ibishyimbo
  • Umuhondo w’igi

2. Folic acid (vitamin B9)


Iyi nayo iri muri vitamin z’ingenzi zifasha mu kongera amaraso ikaba iboneka cyane mu mafunguro akurikira:
  • Ibishyimbo
  • Avoka
  • Imboga zijimye nka kale, isombe na epinari
  • Urunyogwe
  • Ubunyobwa

3. Vitamin B12 


Iyi vitamin yihariye kuko iboneka ku bikomoka ku matungo gusa ku bwinshi nayo izamura igipimo cy’insoro zitukura.

Aho tuyisanga cyane ni:

  • Inyama zitukura
  • Amafi
  • Amata n’ibiyakomokaho
  • Amagi

4. Umuringa


Nubwo umuringa ubwawo utongera insoro zitukura ariko utuma insoro zitukura zibasha kwinjiza ubutare zikeneye ngo ziyongere.

Amafunguro akize ku muringa ni:
  • Inyama y’inkoko
  • Inyama y’umwijima 
  • Ibishyimbo
  • Ubunyobwa
  •  Cherries

5. Vitamin A


Iyi vitamin nayo igira uruhare rukomeye mu ikorwa ry’insoro zitukura. Ikaba iboneka muri aya mafunguro y’ingenzi:
  • Imboga zijimye nka epinari, isombe na kale
  • Ibirayi 
  • Karoti 
  • Poivron 
  • Watermelon 
  • Ibinyomoro 
  • Beterave
  • Pamplemousse (gusa waba uri gufata imiti ntuyirye)


Si ibi gusa bizwiho kongera amaraso gusa nibyo biza ku isonga mu gutuma amaraso yawe azamuka ku gipimo gishimishije. Aya mafunguro akaba ingenzi cyane ku barwayi barembye cyangwa bakirutse, abagore batwite naho iyo habaye nk’impanuka bisaba kubanza kongererwa amaraso iby’amafunguro bikazaza nyuma.
Ubwo twari turi muri gahunda zo gusezera, nibwo nagiye kubona mbona ubutumwa buturutse kuri Maurice. Nkibufungura nabaye nk’ukubiswe n’inkuba, ndiyumanganya ngo hatagira undi ubibona
Ese ni ubuhe butumwa?

Biracyaza….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s