Ubuzima

FIRDAUS: Agace ka 29




Ubwo twavaga guhamagara muganga twasanze Keila akiri gusubiramo ya magambo, gusa twamuvugisha ntadusubize.
Muganga: Buriya ni ikinya kiri kumushiramo, ntabwo arakanguka neza. Gusa biraboneka ko ibyabaye atari impanuka ukurikije ibyo ari kuvuga. Ahubwo byabaye kwiyahura, nuko mwatabariye hafi ntapfe
Ines: None se ko twamusanze mu muhanda hagati, nta kinyabiziga kiri hafi aho, ubwo byaba byagenze gute?
Muganga: Ubu byose bizamenyekana namara kuzanzamuka akabasha kuvuga nibwo azababwira. Hagati aho mukomeze murebe ko serumu ishiramo, muhite mumbwira. Nako impinduka yose iba mumbwire
Muganga yahise agenda nsigarana na Ines tuganira. Amasaha amaze gukura namwibukije gutaha aranga ambwira ko atansiga jyenyine kandi n’umurwayi atarazanzamuka.
Ines: Humura nasabye uruhushya mama, kandi urabizi na musaza wanjye noneho azi aho ndi nta kibazo
Firdaus: Ariko disi uri umwana mwiza. Kugukunda ntako bisa
Ines: Ahubwo wowe uhora untungura. Iyaba byashobokaga nakubwira ugakunda musaza wanjye akaba ari we muzabana kuko rwose inshuti nka we ntako isa. Waba muramukazi mwiza.
Firdaus: Hahaaaa. None se musaza wawe ubona twashobokana koko
Ines: Sha uriya wapi mbona ari igisazi gitereye aho. Nsabiye umugore uzamushaka. Gusa hagati aho njyewe sindi gusobanukirwa
Firdaus: Ni iki cyakuyobeye se kandi
Ines: None se ko Keila ari kuvuga ngo inda ni iya Maurice, kandi mu kanya yavuze ngo yamubeshyeraga na Maurice akabihakana koko, ubu urumva atari urujijo? Ahubwo twibagiwe kubaza muganga niba inda yamenya amezi yari ifite
Firdaus: Nyine ni cyo kibazo. Ubundi se uwagenda tukamubaza hari ikibazo?
Ines: Sinzi niba byemewe, ariko twamubaza tukumva
Twahise dusohoka, dukubitana na muganga nubundi aje kureba uko umurwayi amerewe
Twagarukanye na we nuko tugeze mu cyumba turamubaza
Ines: Ese muganga, niba mwabashije kubireba inda ya Keila yari ifite amezi angahe?
Muganga: Nkurikije uko echographie yabyerekanye, nkanareba ibyavuyemo, ntabwo yari irengeje ibyumweru 8
Firdaus: Ubwo ni ukuvuga amezi 2?
Muganga: Yego abiri ntiyarengaga. Kuki se mufite amatsiko yo kubimenya?
Ines: Ni uko uwo avuga ko yayimuteye abihakana, kandi koko igihe baherukanira hashize amezi arenga 5. ubwo tukibaza niba ari ukumubeshyera cyangwa se inda ishobora kwibikaaaaa, ikaboneka nyuma y’ayo mezi
Muganga: Oya ibyo ntabwo byabaho. Buriya wasanga ari undi wayimuteye cyangwa se uwo musore akaba yigiza nkana. Abasore bashobora guhakana inda kandi ari bo baziteye, ibyo birasanzwe. Reka mufate ibipimo nashakaga ubundi mutere n’umuti wundi ndabona amasaha ageze
Yamuteye imiti, nuko atubwira ko dushaka natwe twashaka uko tuba turuhuka.
Twararuhutse, dutwarwa n’ibitotsi ku buryo twakangutse bucyeye.
Turebye aho Keila aryamye twasanze ari maso, gusa biboneka ko arembye anananiwe dore ko yari yavunitse ukuguru, akomereka ukuboko no mu mugongo, anafite utundi dukomere ducye mu maso, ariko natwo bari badupfutse.
Naramwegereye ngo muvugishe
Firdaus: Keila, uri kunyumva?
Keila (ijwi ridasohoka): Yego ndakumva. Nageze aha ryari se?
Firdaus: Sha twagusanze mu muhanda, uri kuvirirana duhita tukuzana hano. None se bakugonze?
Keila: Oya ntabwo bangonze
Ines: None? Wakomerekejwe n’iki?
Keila: Sha ni birebire, mureke nduhuke ndumva umutwe uremereye, ndababwira. Maurice se ari hehe
Firdaus: Uramushaka tumuhamagare se?
Keila: Yego ndamushaka. Ariko mumubwire aze ikigoroba wenda ndaba natoye agatege.
Twaramuretse ngo abe aruhuka, natwe tuba twigiriye hanze kuganira. Twabwiye Maurice ko Keila amukeneye, na we abyumva vuba. Ubwo twari hanze, muganga yarahadusanze, atangira kutuvugisha. Twamubajije icyaba cyateye Keila kwiyahura, na we adusubiza ko akenshi biba byatewe nuko hari ikintu kibi cyamubayeho akananirwa kucyakira.
Ines: None se muganga, ni byo njya numva ngo ni depression?
Muganga: Yego rwose niyo.
Firdaus: None se ubwo umuntu yamenya ate ko yamaze kumufata?
Muganga: Ubusanzwe igenda igira ibyiciro, bikarutanwa bitewe n’uburemere bw’ibyaubayeho, uko ubasha kwiyakira no kwihangana, abakuzengurutse…
Naho mu biyiranga ahanini harimo kutongera kwishimira ibyagushimishaga, kunanirwa kurya cyangwa kuryagagura kuri bamwe, kurwaragurika kuko ubudahangarwa buba bwananiwe aho usanga benshi barwara umutwe udakira, igifu,impiswi, umunaniro uhoraho, naho iyo byakomeye hazamo kwiyanga ari naho bamwe bafata umwanzuro wo kwiyahura.
Niyo mpamvu mu gihe hari uwawe ubonyeho kimwe muri ibi bimenyetso bigusaba kumuba hafi bishobora wabona bikunaniye ukitabaza inzobere z’abaganga bakamufasha ataragera aho yiyambura ubuzima. Kuri Keila ndacyeka uwamuteye iriya nda yaramwihakanye, akabona ntaho ari bwerekeze n’iyo nda, agahitamo kwiyambura ubuzima nubwo ku mahirwe bitabayeho
Firdaus: Urakoze muganga. Ubu se murabona azasezererwa ryari
Muganga: Natangira kubasha kubyuka tuzabanza tumuganirize, ahabwe ihumure, ubundi abone gutaha. Kuko nubwo atapfuye ntituzi niba icyifuzo cyo kwiyahura kigifite cyangwa cyamuvuyemo.
Twakomeje kuganira na muganga, ari na ko anyuzamo akajya kureba uko umurwayi amerewe. Gusa yari maso, ariko ubona atarabasha kwakira ibyamubayeho. Nuko ubwo amasaha ya nimugoroba yageraga, twamubajije niba twabwira Maurice noneho akaza, na we atwemerera ko nta kibazo twamubwira akaza.
Ubwo Maurice yahageraga, Keila yaramurebye araturika ararira, ku buryo kumuhoza byabaye ingorabahizi.
Ubwo yamaraga guceceka, namuhanaguye mu maso, nuko ashaka kubyuka ariko mubwira ko muganga yatubwiye ko atarafata imbaraga zo kwicara nuko akomeza kuryama
Keila: Maurice rero namwe bakobwa, ndabashimira ko mwatabaye ubuzima bwanjye. Mu kuri numvaga ntashobora kubaho mbona maurice na Firdaus bishimanye kandi babanye nez, naho jyewe ndi kuruhana inda ya Maurice, yamaze no kuyihakana mpitamo kwiyahura nubwo nagize ibyago cyangwa amahirwe simpfe. Rero Maurice nubwo ejo navuze ko nkubeshyera, ni ukuri iyi nda ntwite ni iyawe, gusa humura amasaha maze ntekereza niyemeje kuzayibyara kandi uyu mwana nzamwitaho neza rwose. Naje gusanga nta kosa ufite amakosa ni ayanjye
Maurice: ariko se koko urakomeje inda ni iyanjye?
Keila: Yego ni iyawe, kandi ntega amatwi mbigusobanurire neza, ndabizi ntabyo wari uzi cyangwa ntiwabyibukaga ariko ntabwo twaryamanye rimwe gusa, byabayeho kabiri. Ubwa kabiri rero nabikoze mbishaka ko untera inda, nizeye ko izaba iturufu ituma undongora.
Maurice: Ngo iki? Sobanura neza
Ngaho da. None se iyi nda kandi yayitwaye ate? Ese namenya ko yavuyemo arabyakira?

Biracyaza….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s