Ubuzima

FIRDAUS: Agace ka 28




Ubwo twageraga kwa muganga ntitwari tuzi ko akirimo umwuka cyangwa washizemo, abaganga bahise baza bamukura mu modoka bamushyira ku gatanda k’abarwayi basunika bahita bamwihutana mu cyumba cy’indembe. Mu by’ukuri nta nubwo twari tuzi niba ari imodoka imugonze, niba se aguye, mbese twahuruye gutyo.
Twagumye aho dutegereje umwanzuro wa muganga, nuko mu minota nka 30 muganga arasohoka
Muganga: Uyu muntu se mwazanye, ni mwe mwamugonze?
Maurice: Oya ahubwo dusanze agaramye mu muhanda avirirana duhita dutabara
Muganga: ntawe umuzi muri mwe se
Maurice: turamuzi, twari tunamaze akanya gato dutandukanye
Muganga: afite umugabo se cyangwa aracyari umukobwa
Maurice: ni umukobwa nta mugabo afite
Muganga: ariko afite umuhungu bakundana wenda
Yves: Ese ibyo bibazo byose ni iby’iki?
Muganga: uyu murwayi wanyu aratwite. Rero niba nta mugabo afite, hari umusore wayimuteye.
Akivuga ko atwite nahise ndeba Maurice ikijisho, nuko ahita yitanguranwa
Maurice: None se kuba atwite nibyo byatumye akomereka?
Muganga: Oya. Nkurikije uko amerewe, inda yahungabanye. Birasaba kuyikuramo kuko kutayikuramo ni we byashyira mu bibazo akaba yanahasiga ubuzima. Rero hakenewe ko uwayimuteye abanza akabisinyira. Ubwo nashakaga ko niba ari muri mwe aza agasinya, kuko umurwayi we ntari kubasha kuvuga. Mubitekerezeho ndaje
Muganga yahise agenda, natwe dusigara aho twamanjiriwe. Yari jyewe, Ines, Camelia, Maurice, Yves na musaza wa Ines.
Twese twanjamye Maurice wari umaze guhakana ko atari we wamuteye inda.
Yves: Mwana Maurice ntiwavugaga ngo nta nda wamuteye? None iyo nda ni iya nde se?
Maurice: Niba mwibuka neza, we ubwe yivugiye ko yambeshyeraga. Buriya hari uwayimuteye, yashakaga kuyinyegekaho. Gusa ndumva ubu icyo atari cyo cyihutirwa
Uwayimuteye uwo ari we wese, ubu ngombwa ni uko umurwayi yitabwaho, kandi hakenewe uri bumusinyire. Ni nde rero?
Ines: Ndumva atari ibintu twahubukira kuko ntituzi inda uwayimuteye, ntituzi umubano bari bafitanye, ntituzi amahane ye. Ubu se nihagira umusinyira, yakira nyiri inda ati nshaka munyereke uwasinye bagakuramo inda yanjye. Urwo rubanza ni nde wazaruburana
Firdaus: Maurice, ndagusabye, niba byibuze warigeze ukundaho Keila umunota umwe wonyine, niba mwararyamanye wishimye utabikoreye kurangiza irari gusa, musinyire batabare ubuzima bwe. Nyir’inda nagaragara nzagufasha kuruburana urwo rubanza kandi tuzarutsinda. Hano abahari bazatubera abahamya
Navuze ayo magambo mbona Maurice azenze amarira mu maso, Yves we yahise ampoberaaaa, bwari ubwa mbere mubonye sinari nzi uwo ari we
Yves: Mauri, nari nakurakariye ko wanze mushiki wanjye, ariko kubera Firdaus nongeye kugukunda. Ufite umukunzi ureba kure, ugukunda kandi w’ingirakamaro. Niba se koko inda atari iyawe, ubwo ni iya nde? Mushiki wanjye urumva atarandumbiye koko?
Nibwo nahise menya ko Yves ari we musaza wa Keila akaba inshuti ya Maurice. Muganga yaraje nuko azana igipapuro cyo gusinyaho.
Maurice yarasinye nuko turicara dutegereza ibikurikiraho
Kera kabaye nka nyuma y’amasaha 2 nibwo baje, basohora Keila mu cyumba yari arimo bamujyana ahandi ho arwarira
Muganga: umurwayi ubu twamaze kumwitaho, ibikomere twabyogeje turabipfuka, inda yari guteza ikibazo twayikuyemo. Ubu agiye aho arwarira, muri mwe harasigara umwe uba amurwaje, abandi mwigendere. Gusa ntabwo arabasha kuvuga ngo tumenye icyo yabaye niba yagonzwe cyangwa ari indi mpanuka yagize, ubwo mushakishe amakuru.
Ines na Camelia basiganiye gusigara ku murwayi, nemera jyewe ko ndi bumurwaze gusa mbasaba kuza kunzanira ibiryo dore ko nikundira kurya.
Yves: Ariko nta mpamvu yo kukugora, mama arahari ndaje ngende mubwire aze amurwaze
Firdaus: Oya wigora umukecuru nawe. Mfite konji ku kazi kandi no ku ishuri nzahamagara bamvugire ko ndwaje.
Bansize aho, nuko nanjye ninjira mu cyumba nicara ku gatebe ntegereza ko umurwayi azanzamuka akabasha kuvuga.
Mu gihe ntegereje ko akanguka nabaye nisomera kuri interineti, nuko nza gusoma ahantu havugaga uburyo bunyuranye wakifashisha wivura inkorora idafite igikororwa.

Ubuki

Ubuki ubusanzwe bufatwa nk’umuti wa mbere mwiza mu gukiza inkorora, ukuntu bukomeye n’uburyo bufashe bifasha cyane imyanya y’ubuhumekero kwikiza inkorora. Bufite kandi ubushobozi bwo kurwanya bagiteri, bityo bukarwanya iziba zateye inkorora. Niba uri gukorora cyane ushobora gufata ikiyiko kimwe kinini inshuro zigera kuri 3 ku munsi mu kwivura inkorora itazana igikororwa.

Indimu

Indimu ni undi muti mwiza w’inkorora itazana igikororwa, ukoresha byibuze ¼ cy’indimu yose, ushobora kongeraho akunyu ubundi ukazajya ubinyunyuza. Bivura ku buryo bwihuse iyi nkorora

Tangawizi

Mu gihe urwaye inkorora itazana igikororwa, tangawizi izagufasha gukira vuba utarinze kuba wakoresha indi miti. Tangawizi ifite ubushobozi bwo koroshya inkorora, bityo igafasha ibihaha byawe kwikiza iyo nkorora. Ikindi nuko ifasha mu gukiza, mu gihe ukorora cyane ukumva mu muhogo hameze nkahokera.
Uburyo ukoresha tangawizi, urazifata ukazisekura neza, ushobora kuzinywa mu mazi y’akazuyazi cg icyayi kitarimo isukari ariko ushobora kongeramo ubuki ukaba wabinywa. Ushobora kunywa gacye gacye ku munsi kugeza igihe uboneye inkorora ikize.

Kunyuguza amazi arimo umunyu mu kanwa

Ubu buryo akenshi bumenyerewe mu kuvura kubabara mu muhogo, gusa no kuvura inkorora itazana igikororwa burakoreshwa. Mu rurenda ruba mu myanya y’ubuhumekero iyo harimo umunyu mwinshi, amazi atangira kumanuka. Uko aya mazi amanuka, niko ajyana na mikorobe cg ibindi biba byateye kubyimba mu muhogo n’imyanya y’ubuhumekero, nuko ya nkorora igakira.


Basozaga bavuga ko inkorora itazana igikororwa utakagombye kuyimarana iminsi 5, niba ubona bitari gukira cg se ubona yahindutse ikazana igikororwa ni ngombwa kugana kwa muganga, ukaba wahabwa indi miti yisumbuyeho.
Narangije gusoma ibyo, nibwo Ines yazaga angemuriye, nuko tuba tuganira, ariko mu minota mike, umurwayi wacu atangira kuvugaguzwa, niba byari ukurota, cyangwa niba byari uguteshaguzwa sinzi.
Keila: Reka mpfe wishime usigarane uwo munyarwandakazi da. Iyi nda yawe ntabwo nazayibyara rwose tutari kumwe.
Yavugaga ayo magambo asakuza, turebana na Ines, ubwoba buratwica, turiruka guhamagara muganga
None se koko iyi nda ni iya Maurice? Ko biteye urujijo?

Biracyaza……

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s