Ubuzima

FIRDAUS: Agace ka 27

Baraje, baduhagarara iruhande. Nuko Zahara ahita yegera Maurice, sinzi ibyo yamwongoreye, nuko tubona Maurice arahagurutse, aragenda tutazi aho agiye.
Ubwo yari ataragaruka, twari turi kurebana byatuyobeye dore ko abandi nabo bari aho badakoma. Ubwo hashize iminota micye mbona Maurice aragarutse ari kumwe na musaza wa Ines.
Maurice: Ndumva noneho abakenewe bose babonetse, reka mbanze mbabwire. Aba bakobwa ni Camelia, Ines bo ubanza usanzwe mubazi. Uyu wundi we ni Firdaus, akaba umukunzi wanjye.
Aba baje badusanga mpereye ku ruhande ni Mike, James, Tom, Gaston, Keila, Yves na Zahara. Uyu tuzanye ni musaza wa Ines mwese muramuzi. Ndumva noneho Keila yatubwira ikibagenza
Keila: Jyewe nta kindi kingenza nshaka kukubaza ku magambo wambwiye kare, niba nubu wayasubiramo. Ubundi se uvuye guhuruza musaza wa Ines ngo bigende bite?
Maurice: Ni icyo kibazo cyonyine ufite se nta kindi?
Zahara: Ariko Mauri, ako gakobwa gasa n’imbwa yurira umugina wagaciye iki? Ahreee. Amacuho gusa. Ndamwanga no ku cyumweru rwose sinteze no kuzamukunda. Nimunabana sinzagera mu rugo rwanyu ube ubizi. Kandi umenye ko Keila muzabana bubi na bwiza
Tom: Ese Mauri, koko ubushuti bwanjye nawe ubuvunjemo guhemukira mushiki wanjye? Nshaka ducyemure ikibazo mu bwumvikane nibidakunda ikiri bubere hano ucyirengere
Maurice: Rero bavandimwe ubanza mwaranyibeshyeho. Nugaya akabuye ubuto, uzagashune urwara wumve. Niho uzamenyera ubukana bwako. Cyangwa nugaya ivubi uzamenya ibyaryo ryakudwinze. Simbivugiye kwishongora ahubwo nashakaga kubabwira ko kuba ntakunze kuvuga bitavuze ko ntabizi. Rero nimukore icyo mwaje mwiteguye gukora. Ndumva nta magambo menshi mfite yo guterana namwe.
Musaza wa Ines: none se ubundi uretse ko abantu twitiranya ibintu, ugirango umuntu ntahitamo uwo ashaka. Niba abantu bashobora gutandukana bamaze imyaka 10 bashyingiranywe, kuba umusore n’inkumi bahagarika gukundana ntibyakabaye intambara, keretse niba hari indi mpamvu ibirimo tutazi.
Keila: (Arira), umva, Maurice yakundanaga na musaza wanjye, uko aza iwacu kenshi niko nanjye nagiye ngenda mwiyumvamo, kugeza ubwo nemeye ko tunaryamana, mutakazaho ubusugi bwanjye. None aho menyeye ko ntwite, nibwo ahisemo kunyanga yishakira undi
Ines: Gutwita? None se Keila uratwite?
Keila: ndatwite kandi ni iya Maurice. Agomba kundongora rero
Maurice: (atuje). Kuba umuntu atwite si ihame ngo uwamuteye inda babane, kandi ndumva ntaragufashe ku ngufu, ikindi ufite imyaka y’ubukure. Gusa ntanubwo mpamya ko naguteye inda rwose. Icyo cyo ushake aho ujya kugihimbira.
Yves: We wibeshye ugashaka ibyo guhakana inda wava hano ukambakamba. Niba atari iyawe se kuki wumva ko yakubeshyera? Aguca iki se ufite ngo ni cyo akurikiye? Umuswa gusa. Ubundi ko muba mutiteguye kubyara cyangwa kurera mwagiye muzirika ibyo bibando byanyu cyangwa mukambara agakingirizo? Ubu iyo ukambara izi nduru ziba zibaye? Nako ndakurenganya. Uwo mukobwa we yagiye kukwibambaza imbere azi neza ko ari mu bihe by’uburumbuke, ngo ataba iki? Nta funi nta mujyojyo rwose
Firdaus: Mumbabarire ngire ikintu mvuga nubwo benshi mutanzi. Ntabwo nishima iyo mugenzi wanjye ababaye gusa nanone burya iterambere ryakemuye byinshi. Sinzi niba wenda ino bihari, ariko umwana namara kuvuka bazapima barebe neza niba koko DNA ye ihuye n’iya Maurice, ubwo ntaho azacikira. Gusa nanone mbere yaho ndumva hari icyakorwa
Maurice: Mbwira rata ndakumva
Firdaus: Uko byamera kose niba mwararyamanye rimwe gusa, itariki n’ukwezi byabereyeho murabyibuka. Mugiye rero ahantu hari echographie bashobora kubafasha bakamenya igihe umwana amaze mu nda, niba itararenza amezi 3, nuko bakamenya igihe yatwitiye. Na byo byaba bigabanyije urwikekwe. Ibijyanye no kubana byo, nanjye ndumva Maurice yabana na Keila kuko aramukunda ikiboneka cyo. Jye rwose niteguye kumumurekera, sinshaka kugira uwo turebana nabi anyita ngo namutwariye umugabo
Namaze kuvuga ayo magambo mbona Keila abaye nk’usuherewe, Maurice andeba na we nabi kuko nari mvuze abane na Keila. Camelia na we yari yabibonye ko Keila asuherewe nuko ahita yungamu ryanjye
Camelia: Hano muri metero nka 200 hari ivuriro ryita ku bantu batwite. Ayo gusuzuma ndayafite, tugereyo baturebere, noneho amazimwe ashire
Maurice: Erega kujyayo si ngombwa. Keila ntabwo atwite ni ugushaka impamvu, niba anatwite si iyanjye. Kuko kuva turyamanye hashize amezi 5. sinibaza ko inda ifite amezi 5 niyo waba uzi guhisha nta na gato kaba kaboneka. Ikindi siniyumvisha uko inda ingana gutyo yahagera atarabimbwira niba koko ari iyanjye
Ines: None se ko yivugiye ko ntawundi mugabo azi, urumva yarayiteye noneho?
Maurice: Ariko se ntahari. Natumare impungenge
Keila yahise apfukama imbere yabo bose: Bavandimwe mumbabarire. Mu by’ukuri nkunda Maurice peee. Na we arabizi nuko abyirengagiza. Gusa ndamubeshyera nta nda yanteye. Ariko rwose abeho abizi ko namukundaga.
Yavuze ayo magambo ahita asohoka yiruka, abazanye na we bose basigara aho bamanjiriwe. Natwe twikomereje kuganira ibyacu, mbese tubereka ko tutabitayeho, uretse musaza wa Ines wari wicaye yinywera, dore ko ibiboneka byo ari umunywi
Mu gihe bari bagiye kwikubura ngo bagende bagiye kumva bumva induru ivugiye mu muhanda bamwe ngo arapfuye abandi ngo aracyahumeka. Bahuruye kureba basanga ni Keila ugaramye mu muhanda, avirirana bikomeye
Maurice yahise yatsa imodoka, nuko twihutira kumugeza ku ivuriro riri hafi aho
Ese arabaho cyangwa ashizemo umwuka?

Biracyaza…..

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s