Ubuzima

FIRDAUS: Agace ka 26

Yaranyitegereje amfashe mu biganza nuko avuga amagambo akomeye
Maurice: Sindi umutagatifu, sindi intungane ariko nzi gukunda nkanamenya agaciro k’urukundo. Mu gihe tumaranye nakubonyemo ubupfura, ubunyangamugayo ndetse nanakubonyemo ubwenge no kwihangana. Nagusabaga kumbera inshuti, umunyamabanga, inkoramutima, ukambera mushiki wanjye na mubyara wanjye, ukambera mwarimu, ukambera inshuti iruta izindi zose nagize tukazafatanya urugendo rw’ahazaza.
Ayo magambo yayavugaga andeba mu maso, uko ayavuga nkumva ari kuyashimangira mu ndiba y’umutima wanjye. Imyaka nujuje 18 iranyemerera guhitamo uwo nakunda, ariko se koko ubu ni cyo gihe? Ndacyafite ibikomere ku mubiri no ku mutima, intimba yo kubaho ntakunzwe ntirashira. Ese ubu nimwemerera na we akazambabaza nkuko abambyaye bambabaje aho sinaziyahura noneho cyangwa nkazicwa n’agahinda?
Namaze akanya ntekereza igisubizo ndi bumuhe, gusa ndamukunda ariko ndumva ntiteguye. Urukundo si ikintu cyo guhubukira, si ugupfa kurwemerera umuntu ngo ni uko arugusabye, urutanga igihe wumva bikurimo. Nikije umutima nuko
Firdaus: Urakoze kungirira icyizere, ukankunda utanzi bihagije. Gusa simbona ko nkwiriye urukundo rwawe, ahari wazabona undi mukobwa ugukwiye utari jye. Ndacyafite ibikomere ku mutima sinizera ko naguha urukundo ushaka. Kandi sinifuza kukubabaza. Icyakora niba wakemera kuba umfashe uko ndi kugera igihe nzamara kwiyakira neza, nkwemereye kukubera inshuti wishimira
Ayo magambo nayamubwiye tugifatanye mu biganza, nuko uko twagafatanye aranyegera buhoro nanjye ndahumiriza, nuko bwa mbere hagati yacu dusomana bitinze kuko twamaze iminota isaga 5 turi gusomana, ku buryo numvaga muri jye ntangiye guhinduka.
Maurice: Ngushimiye ko unyemereye urukundo, nanjye nkwijeje kuzakubera inshuti nziza, umugabo mwiza ahazaza. Haracyari urugendo runini ndabizi ariko nidufatanya tuzarugenda neza twese. Wanyemerera se ibi byiza tukajya ahantu tukicara tukabyishimira?
Firdaus: nta kibazo mukunzi mwiza ndabyemeye
Twavuye aho muri pariki nuko twerekeza ahantu hari akabari kadahenze ariko katanasebetse, nuko turicara dutumiza icyo kunywa n’icyo kurya.
Twahamaze akanya turya, tunywa, tuganira, muri jye numvaga nabaye umuntu mushya, numvaga nuzuye ibyishimo ntazi aho byaturutse.
Nuko tukiri aho, Ines mbona arampamagaye
Ines: uri hehe wa nshinzi we
Firdaus: sha ndi kumwe na cheri turi kurya isi
Ines: cheri? Kuva ryari ufite cheri se?
Firdaus: kuva mu masaha nk’abiri ashize
Ines: waouuu. Felicitation rwose. Nta waza se agataha ibyo birori?
Firdaus: utaza kuturogoya. Ahubwo mu kanya nidutaha turabonana wenda
Ines: Maze ndi kukureba aho wicaye. Nashakaga kumva ko umbeshya. Reba inyuma yanyu urahita umbona
Narahindukiye mbona Ines na Camelia niho bicaye, ndatungurwa. Maurice we yari yababonye kuko bari bicaye bateganye, ahubwo sinzi impamvu yari yabimpishe.
Maurice: babwire bimure ameza baze bicare hano
Firdaus: ariko cheri uri umwana mubi. Kuki utari wambwiye ko wababonye
Maurice: ariko niho bakihagera. Ahubwo iyo umbaza ukuntu baje hano natwe turi
Firdaus: ndagufashe ni wowe wabibabwiye. Mbega kuntungura
Maurice: Ines ni umuturanyi kandi ndabizi ni inshuti yawe magara. Rero nari namubwiye ko tugiye guhura nawe, mubwira ko nibigenda neza mubwira aho tugiye gusangirira bakatwiyungaho. Niba nakosheje umbabarire
Firdaus: oya mama nta kosa. Reka mbasange mbazane
Nahise mpaguruka nsanga ba Ines na Camelia aho bicaye, ndabasuhuza nuko mbasaba kuza aho twicaye.
Baraje basuhuza Maurice, nuko baricara, ikirori kirashyuha.
Twanyoye nk’abatikanga ejo, gusa ntitwanywaga ibisindisha, ahubwo twari tumeze nk’abari mu isi ya twenyine.
Tukiri kuganira, Maurice yasabye ko twatuza akagira icyo atubwira. Twese dutuje, yafashe ijambo
Maurice: Ines na Camelia mwe musanzwe munzi dore ko Ines ari n’umuturanyi kuva kera. Nashimishijwe no kumenyana na Firdaus binyuze kuri Ines, none kuva uyu munsi tukaba twiyemeje kuba inshuti nyazo, ni muri urwo rwego nifuje kubibasangiza kuko si ikintu cyo kwihererana cyangwa guhisha. Firdaus nawe rero, izi nizo nshuti zawe nzi, niba hari n’izindi nzishimira kuzimenya kuko inshuti zibereyeho kuduhana twakosheje, kudukebura no kudushishikariza gukora ibyiza. Ndasaba ko nihagira ikibazo kiba hagati yacu, ntawundi ukwiye kuzabyinjiramo mu gihe twe byatunaniye, izi nshuti za mbere duhuriyeho zizatube hafi. Hanyuma ikindi nshaka gusoza nkubaza Firdaus nanagusaba, ese iwanyu mu Rwanda, ababyeyi bawe batuye hehe, ndavuga intara, akarere, mbese aho wabasize.
Firdaus: rwose ngushimiye ko udahishe urukundo rwacu, ariko ababyeyi aho bari sinzi impamvu ushaka kuhamenya kuko jyewe rwose singishaka no kubatekerezaho. Byaba byiza wiyemeje kumfata nk’aho ntabo ngira, nukenera mama wanjye uzajye ubwira mama Ines, na mama wawe kandi yambera umubyeyi kuko abambyaye bo sinkibatekereza
Ines: oya sha wivuga gutyo. Umubyeyi niyo yaba gito gute ariko igihe cyose akiri muzima aba akwiye kubahwa no guhabwa agaciro ka kibyeyi, ahari byatuma yisubiraho akihana ubuhemu yagukoreye. Ikindi isabwa kubababarira, kuko inzika imunga wowe uyifite bo bigaramiye
Camelia: nibyo Firdaus. Wenda ntuzasubire kubana na bo, wenda ntuzagire icyo ubakorera kuko nubundi wenda ntacyo ubarusha ariko wumve muri wowe ubohotse, ubababariye.
Ayo magambo yabo yatumye ntanga aderesi neza neza y’aho mvuka mu Rwanda, gusa nkabona Maurice ashishikajwe no kuyimenya cyane.
Twakomeje kuganira dusangira, gusa akaryoshye ntigahora mu itama, tukiri muri ibyo byishimo ni bwo twagiye kubona tubona igihiriri cy’abasore nka 5 barangajwe imbere na Keila na Zahara baje bagana aho turi.
Ese baje gukora iki aba bo? Ese kuki Maurice ashaka kumenya aho Firdaus akomoka?

Biracyaza….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s