Ubuzima

FIRDAUS: Agace ka 25

Yamaze gukupa mbona ahinduye isura, nuko ahita ahaguruka
Maurice: ngwino tuve hano tugende
Firdaus: habaye iki gituma twimuka hano se kandi
Maurice: ndumva ntatekanye yewe tugende ndakubwira ibindi turi mu nzira cyangwa tugeze ahandi
Firdaus: umva banza umbwire impamvu nutayimbwira simva hano.
Yabaye atarambwira impamvu, mbona Keila aje aho twari turi yarubiye cyane. Akitugera imbere yarahagaze, yifata mu mayunguyungu, arikokomora cyane nk’uwishwe n’isesemi
Keila: Umva muko, ubwo bwiso bwawe bumeze nk’ubw’ifuku nabujaburamo ukomeje kugenda ukururuka mu mugabo wanjye. Mbara gatatu ubwo buguru bwawe ubutambika ugenda cyangwa intambara irote.
Naratunguwe, mbura icyo mvuga. Sinkunda amahane n’intambara ariko nanone sinkunda umuntu untondagira akamenyera cyane. Nabaye ntaragira icyo mvuga Maurice aba aramushubije
Maurice: ese nka we uteye uturuka hehe? Wagiye umenya ibyo uvuga n’aho ubivugira?
Keila: ehh. Umva aka gakobwa kataraza ntiwamaraga kabiri tutabonanye cyangwa utaje iwacu none aho kaziye waratwaweeee. Umenye ko ibyo wikoza byose uzandongora.
Maurice: izo nzozi zawe niziba impamo sinzaba ndi Maurice. Jyewe nkurongora? Asyi weee. Sha udatuma mvuga byinshi nkamena n’amabanga imbere y’utayazi ariko rwose wowe ntitwabana niyo isi yakiyubika.
Nabonye bikomeye, nditarura ngo ndeke bavuge ibyabo, gusa nanjye numvaga nasubiza
Keila: karagenda se kajya hehe. Nako shinguka hano ugende vuba.

Firdaus: umva muko, nakomeje kukwihorera ariko ndumva unkoze mu gisebe. Reka mbanze nkubaze. Umugabo wawe yagutaye ate niba uzi gukunda icyo ari cyo? Umugabo wawe se ubundi ubona namutwaye mu kiziriko mugeza hano? Cyangwa ni we waje kundeba turazana? Umva ntundateho ayo mabuno kuko jyewe namuhaye ikirenze ayo mabuno yawe ukaraga. Yuzuyemo iki se ubundi kitari amabyi? Ahreee. Umva n’ikindi gihe jya ubanza utekereze mbere yo kuvuga. Nanjye ngo kuvuga nako kuruka nduzi ko havuga abazi ubwenge. Ese ubundi ubwo iyo utarebye ntunatekereza? Hera hasi ugere hejuru unyitegereze sha. Jyewe Firdaus umunyarwandakazi wuzuye ntunshingeho kuko nakunyuza mu zuru.
Namaze kumubwira ayo magambo nanjye numva ndarengereye, byari bimeze nk’aho koko ndi kurwanira umugabo na Keila nyamara siko biri kuko jye na Maurice nta kintu gihambaye twari twakavugana.
Gusa amagambo nabwiye Keila yatumye acururuka, nuko aza asatira Maurice, amugeze imbere arapfukama
Keila: Maurice ndagukunda urabizi, ibuka ko ari wowe natakarijeho ubusugi bwanjye. Ikindi kandi musaza wanjye azi ko dukundana. Na mama narabimubwiye arabizi. Wimpemukira rero rwose ukunda uyu munyamahanga ndahari kandi nzakubera umugore mwiza w’icyitegererezo.
Maurice: Mbabajwe nuko wankunze ntarigeze ngukunda na gato, kuza iwanyu ni musaza wawe nabaga nje kureba, nuko uba umwasama nawe umpa ubusugi bwawe. Niba hari ijambo ndagukunda nigeze nkubwira ndaba mbaye umubeshyi. Twaryamanye kuko imibiri yabyifuzaga ntabwo byari ikiguzi cy’urukundo. Ikindi uyu mukobwa uri gutuka, ntabwo uzi neza ikimpuza na we, ntuzi icyatuzanye hano, muri macye ahubwo uraturogoye. Ibisigaye, haguruka, usubire aho uvuye uduhe amahoro.
Keila: Urabeshyera ubusa uzandongora ni hahandi. Nako reka nceceke ibisigaye ni jyewe bireba. Nutandongora n’uwo ntuzamurongora
Yavuze ayo magambo y’iterabwoba ahita ahaguruka aho yari apfukamye nuko arigendera. Numvise mugiriye impuhwe. Ibi byanyibukije abakobwa bagenzi banjye benshi bishora mu mibonano bazi yuko aribwo abasore bazabakunda koko, cyangwa bakabikora nko kwigura ngo abasore batabanga yewe. Umusore ugukunda bya nyabyo ntashyira imibonano imbere. Mushobora kuyikora nkuko mutanayikora kandi byose ntibihungabanye umubano wanyu. Ubundi umusore ugukunda bya nyabyo iyo umwimye akomeza kugukunda niyo umuhaye akomeza kugukunda. Mu gihe ushaka imibonano gusa iyo umwimye ahita agenda kandi wanamuha nabwo akagenda niyo atinze ariko amaherezo aragenda kuko icyo ashaka aba akibonye. Ab’ubu bo banamenye amayeri aremera agatera ivi akanafata irembo ukibwira koko ko noneho ari hafi kugutwara ubundi akajya akurongora uko ashakaaaaaaa, yamara kumva aguhaze agashaka impamvu ituma mushwana, erega ubwo ukitwa umunyamakosa kandi urengana ahubwo ari nkuko shikarete ishizemo uburyohe bayicira.
Amaze kugenda Maurice yarandebye
Maurice: None se Firdaus, dukomeze ikiganiro cyangwa atumye mu mutwe byivanga
Firdaus: Oya nta kibazo. Gusa ibyo mvuze mu kanya ntiwumve ko ndi kukurwanira byari uburyo bwo gutuma aceceka, buriya ndamukomesheje. Harya aje twavugaga iki
Maurice: aje wari ugiye kumbwira icyatumye uva iwanyu
Nabonye nta mpamvu yo gukomeza kumuhisha, nuko muvira imuzingo ibyanjye byose kuva menye ubwenge kugeza mvuye iwacu.
Firdaus: muri macye ngibyo ibyanjye, buriya wambwiye ko ndi indaya yataye iwabo numva uburakari. Sinari nzi ko nzakubabarira
Maurice: Mana yanjye. Sinari nzi ko bibaho ko ababyeyi bakora ibintu nk’ibyo umwana bibyariye peee. None se koko urabizi ko ari ababyeyi bawe bwite cyangwa baragutoraguye nyuma barakwanga?
Firdaus: ni ababyeyi banjye bwite, papa na mama nkaba ndi imfura yabo. gusa ngo papa yateye mama inda, bashaka kuyikuramo mu buryo bwose biranga, byumvikane ko navutse bose batanshaka. Rero imiryango ibijyamo babategeka kubana, urumva ko wenda niyo ntabaho batari kubana cyangwa se igihe babaniye si cyo bumvaga babanamo
Maurice: none se ufite barumuna bawe cyangwa basaza bawe
Firdaus: oya ntabo mfite. Mama iyo atwaye inda zivamo.
Maurice: bagiye se kwa muganga?
Firdaus: reka bavuga ko ari jye wazanye uwo muvumo, ubundi ngo ni amarozi, mbese nanjye simbizi.
Maurice: disi ubwo ni ubujiji. Bakwiye kujya kwa muganga ni we wamenya neza ikibitera, akaba yabaha imiti ibivura cyangwa akabagira izindi nama. None se ubu bazi aho uri?
Firdaus: ntaho bazi sinshaka ko banahamenya rwose. Nshaka gutangira ubuzima bwanjye njyenyine, ibyanjye nkabyimenyera.
Twakomeje kuganira, kugeza ubwo Maurice yamfashe mu biganza, andeba mu maso, nuko arambaza ati:
Yamubajije ate rero? Ese koko Keila wavuze ko Maurice agomba kumurongora, bizagenda bite?

Biracyaza….

3 comments

  1. Tubiri ku munsi yari yo dose pe,turayikumbuye.ndumva nshaka kumenya amaherezo y'ababyeyi ba Firdaus.iyi minsi yose batazi aho umwana yagiye ko ntacyo bibaza?

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s