Ubuzima

FIRDAUS: Agace ka 24

Nageze iwanjye nsanga Maurice ahagaze ku rugi.
Maurice: Ese kuki nimero yanjye wayiblotse koko
Firdaus: ese koko uranshakaho iki wa musore we? Wambabariye ukampa amahoro
Maurice: banza unsubize byibuze impamvu mbone kuvuga ikingenza
Firdaus: ntabwo nabikoze ahubwo nari ndi kuyivugiraho kandi ntabwo nigeze nshyiramo call waiting buriya niyo mpamvu.
Maurice: ku buryo se uvugira kuri terefoni hafi isaha yose?
Firdaus: ese ibyo bikureba ho iki? Mvira imbere y’umuryango niyinjirire nawe utahe rero.
Maurice: narakubabaje bishoboka ndabibona, ariko nanjye sinorohewe. Umutima wanjye ntutuje utarampa imbabazi. Niba ubinyemereye, ejo uzaze twicare ahantu tuganire. Uramuke

Yambwiye ayo magambo arigendera, ubona agenda adashaka pee. Narakinguye ninjira mu nzu, numva nanjye mbuze amahoro. Kuki nabuza umwana w’abandi umutuzo koko n’amahoro? Yego yambwiye amagambo mabi ariko byatewe nuko atari azi uko byagenze. Ariko se nanone, amaherezo azaba ayahe? Nanjye nkumbuye kongera kuganira na we kuko rwose azi kuganira ntube wagira irungu.

Naryamye nibaza byinshi, nuko niyemeza kumuha umwanya akambwira. Nahise mwoherereza ubutumwa bugufi mubwira ko igihe azabonekera azambwira tukaganira.
Maze kuyohereza nawe yahise ansubiza ko bucyeye saa yine aza kundeba.
Nahise ndyama, nakanguwe n’inzara ya mugitondo. Nkangutse nahise nibuka gahunda nararanye. Sindi wa mukobwa wumva ko niba ndi busohokane n’umusore ndi bwiyicishe inzara ngo nze kurya byinshi turi kumwe, nahise nteka ibyihuse nuko bihiye ndarya. Nakoze umureti uvanze n’amafiriti, nkora ikawa irimo amata.
Mbishoje nagiye koga, nuko maze kwambara mpita mpamagara Ines
Ines: bite ko uzindutse muko
Firdaus: sha ntabwo byoroshye. Sinaraye nguhaye inkuru ko nasanze Maurice iwanjye rya joro
Ines: ese we, wowe wisiga iki gituma abasore bakwirukaho? Ubanza mu Rwanda mugira imiti nyamara
Firdaus: nta miti mwana. Ubu nyine maze kwitegura ngiye kuganira na we.
Ines: banza umbwire uko wambaye
Firdaus: nambaye ya kanzu y’umuhondo, narengejeho ka shabalala kirabura, nambara barlene zirabura. Nta bindi
Ines: sha arahita atera ivi peee. Ndumva rwose wambaye nk’ugiye mu birori
Firdaus: winsetsa nawe rwose. Gusa Maurice simwanga peee. Ahubwo nayobewe ikizamunkuraho kuko afite undi
Ines: ariko undi wuhe? Keila icyo nzi cyo si cherie we. Nako araza kubikwibwirira. Burya abasore benshi baba bafite abakobwa barenze umwe batendetse, ariko akaba afite uwo aha agaciro kurenza abandi. Rero ntibyagutungura usanze Keila ari muri abo benshi.
Firdaus: nubundi yaranyibwiriye ngo ni jye aha agaciro kumurusha, ni na byo nazize cya gihe. Ubu se koko nansaba urukundo mbyemere cyangwa muhakanire nivuye inyuma?
Ines: ni wowe uzi ikiri mu mutima wawe. Gusa Maurice mu myaka muzi nzi ko nta kibazo cye, ubwo rero ni wowe wo gufata umwanzuro.
Firdaus: Ahubwo uze kunsuhuriza mama we disi. Ese bite bya Zahara?
Ines: sha Zahara ntukamumbwire rwose ni uko ari umuturanyi naho ubundi ntabwo twanavugana
Firdaus: ko numva se unteye ubwoba ahubwo? Ubwo se koko mubyara we bizagenda bite niba, nako reka mbyihorere. Nta makuru se ya Camelia?
Ines: maze twari tuziko uyu munsi tukubwira tugasohoka none wigiriye mu basore. Turijyana nusozanya na Maurice utubaze aho turi uhadusange unaduhe amakuru yuzuye. Ndumva mfite amatsiko y’ikiganiro muri bugirane peee
Navuganye na Ines akanya, kugera ubwo nibutse ko Maurice ashobora kumpamagara akambura. Wenda mwakibaza impamvu terefoni yanjye itabamo call waiting. Ndabizi si byiza ku ruhande rumwe ariko nanone ku rundi ruhande ni byiza. Ku rwanjye ruhande mba nshaka ko niba ndi kuvugana n’umuntu nta kirogoya iri buzemo, ngomba kuvugana na we tugasoza ntamubwiye ngo kupa nitabe uyu umpamagaye. Abo tuvugana bamaze kubimenyera, uretse Maurice utari abizi dore ko ubusanzwe ari we twavuganaga igihe kirekire kuri terefoni. Nahise nkupa Ines, nuko ntegereza ko Maurice ahamagara cyangwa se akomanga, kuko byose byarashobokaga.
Wagira ngo nari mbizi ko ahageze kuko namaze gukupa ahita ampamagara ambwira ko niba namaze kwitegura namanuka tukagenda naba ntarasoza nkamubwira akaza akandindira nkitegura
Namubwiye ko namaze kwitegura nuko ndamanuka ngo tugende.
Nasanze ahagaze hanze y’imodoka muha agasomyo ku itama, nuko ankingurira urugi ndinjira, arongera arakinga na we arinjira aratsa turagenda. Mu kugenda twagiye tumeze nk’abataziranye bihagije, kuko ntabwo twaganiraga byinshi twisanzuye mbese twari tumeze nk’aho turindiriye ahantu habugenewe tukaba ariho tuganirira.
Gusa yambajije aho nifuza ko twaganirira musaba ko twajya muri pariki aho nigeze gusohokera na ba Ines. Numvaga nshaka ahantu hari butume adakoresha amafaranga ye, sindi ikiryabarezi jyewe wa mugani w’imvugo z’ubu.
Maurice: muri pariki se turarya ibyatsi cyangwa za nyoni nabonye ziba zihaguruka?
Firdaus: ariko tugiye kuganira ntitugiye kurya?
Maurice: umenye ko amasaha yo kurya ari bugere tukiri kumwe. None se basi waretse isaha zo kurya zagera tukajya gushaka ibyo kurya
Firdaus: niba utaramenyera sinzi. Tugure pizza tuzitwaze nta kibazo. Nihagera gusangira bizakorwa nabyo, iki ni igihe cyo kuganira nk’uko wabinsabye, rero kujya aho kurya byaba ari ukuvanga gahunda ebyiri.
Yarabyemeye ariko bimutangaje binamutunguye.
Twageze aho tugurira pizza tubanza kujya kuzigura, nuko turakomeza tugera muri pariki.
Twashatse ahitaruye abandi, nuko twiyicarira ku dutebe duteyemo maze dutangira kuganira bisanzuye.
Maurice: mbanje kugushimira ko wemeye ko tuganira nyuma y’igihe kinini dufitanye ibibazo. Nifuzaga ko twabicoca bigashira
Firdaus: Nanjye nicyo cyatumye nemera ko tuganira. Gusa wambwiye amagambo mabi, unkomeretsa umutima ku buryo kukubabarira biri kunanira. Kunyita indaya yananiye iwacu koko?
Maurice: mu kuri mbabarira nakwibeshyeho mvuga amagambo aremereye bitari ngombwa. Sinifuza ko haza agatotsi na gato hagati yacu rwose. Kuko uri umuntu w’ingenzi mu buzima bwanjye
Firdaus: none se ubundi, niba atari ibanga rirya joro imodoka yawe yari ifitwe na nde? Kuki se yambonye akagenda buhoro nk’aho asanzwe anzi
Maurice: Ntabwo ndi bubiguhishe kandi ariho byose byaturutse. Mu kuri ntabwo Keila dukundana bihambaye, nakubwiye kuriya nshaka kureba uko ubyitwaramo. Musaza we niwe nshuti yanjye bya cyane, bituma rero na Keila dukunda kuvugana no gusohokana. Rimwe ni bwo yansuye, turaryamana, rero kuva uwo munsi yumva ko turi inshuti. Uriya munsi rero, musaza we yari yantiye imodoka ngo batembere, kandi nkeka we yari akuzi kuko wigeze kutunyuraho ndamukwereka nubwo utatubonye. Ubwo rero Keila yanzaniraga imodoka ni we wambwiye byose, numva uburakari, kuko numvaga ko wagiye ukabimubwira ushaka kuduteranya. Umbabarire narahubutse mvuga nabi ntabanje gushishoza
Firdaus: Nukuri noneho ndasobanukiwe kandi ndakubabariye. Gusa ndibaza niba ubizi neza koko ko yari musaza we cyangwa yari wenyine cyangwa kumwe n’undi muntu.
Maurice: simbizi ndumva no kubimenya ntacyo byatwungura, icya ngombwa ni uko umbabariye kandi ndagushimiye. Hagati aho ariko nari mfite nanjye ikibazo
Firdaus: mbaza ndagusubiza
Maurice: kuki wavuye mu Rwanda ukaza muri Kenya?
Firdaus: ikibazo cyawe kugisubiza biransaba umwanya uhagije kuko ni inkuru ndende, amateka maremare. Wihanganye nazagusubiza ubutaha
Maurice: ubutaha se kubera iki kandi uyu munsi uhari nanjye mpari? Mfite umwanya uhagije rwose ndakwinginze mbwira.
Nabaye ngiye kumusubiza, terefoni ye irasona.
Maurice: bite ko umpamagaye
Maurice: oya simpari natembereye
Maurice: kubimenya ariko ntacyo byakungura
….
Maurice: ngo?
Yavuze atyo ahita akupa mbona abaye nk’ugize ubwoba buvanze n’uburakari.
Ese Maurice ahamagawe na nde? Ese noneho Firdaus aratobora amubwire byose?

Biracyaza….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s