Ubuzima

FIRDAUS: Agace ka 12


Firdaus: Mbwira nguteze yombi
Maurice: Nyine nashakaga kugusaba ngo
Firdaus: Uratangiye ibyo Ines yakubujije. Unsaba unsaba iki ko abahungu mwasaze
Maurice: Nashakaga kugusaba ngo uzanyigishe ikinyarwanda nanjye

(Mwibuke ko ndi muri Kenya, ibiganiro byose byakorwaga mu giswahili)

Firdaus: Apuu. Uzi ko nari ntangiye kurakara nziko ugiye kuvuga amafuti. Ikinyarwanda nzajya nkwigisha buhoro buhoro nta kibazo. Ubundi se uzongera kumbona
Maurice: Ahubwo isura yanjye uyifate mu mutwe niduhura ntuzanyoberwe

Twakomeje kugenda tugera mu rugo, nuko mva mu modoka ariko mbanza kumushimira.

Nkigera mu rugo nahise noherereza Ines ubutumwa ko ngezeyo na we ahita ampamagara

Yabanje kwiciraguraho avuga nabi musaza we, ashoje ambwira ko Maurice ari umwana mwiza. Disi Ines arivugira nta kibazo cye. Twaganiriye kuri terefoni umwanya muremure ku buryo nasinziriye nkiri kuvuga.

Bucyeye kuko nta kazi nari mfite nahise ndeba kuri terefoni ariko nsanga naraye nibagiwe kuyishyiramo umuriro. Narabyutse ngo njye kuyicomeka, ishuka iba iranteze nikubita hasi. Ese kuki nkunda kugwa? Uzi ko wagirango nariye imigwira wa mugani w’abanyarwanda.
Gusa sinakomeretse bikabije uretse agakomere gato nagize, na ko nahise nshyiraho agapfuko nuko ncomeka terefoni njya mu gikoni gutegura ibya mu gitondo.

Maze gufungura nahise mpamagarwa na Ines

Firdaus: Allo
Ines: Bite se umeze neza
Firdaus: Yego meze neza. Wowe se?
Ines: Nanjye ni sawa ndumva ushyushye ngwino tunyeganyege
Firdaus: Tunyeganyege tugana hehe se kandi?
Ines: Nshaka kukwereka abashuti banjye sha nawe mukamenyana. Erega ugomba kunguka inshuti
Firdaus: Ni sawa noneho reka nambare nze tunyeganyege mugani wawe
Ines: Ndagutegereje mwana

Narakupye njya koga nyuma y’iminota nka 20 nari maze kwitegura ahubwo nyoberwa icyo ndi bwambare. Ubu koko nambare iki ko ngiye mu rungano?

Nahise nambara dechire y’umutuku, agapira k’umweru ndatebeza, inkweto za converse nazo z’umweru. Agapira ndenzaho jacket y’umukara, mfata agasakoshi k’umukara nshyiramo amafaranga, imfunguzo na terefoni. Imisatsi nahise nyirekura, nitera ka parfum kadahumura bikabije. Nabanje kureba ko gaz ifunze neza, kugirango ntazateza impanuka y’inkongi.

Nageze iwabo wa Ines ndakomanga, mama we aba ari we uza kunkingurira. Twabanje kuganiraho kugeza Ines aje

Ines: Twagiye rero
Khadija: Mugiye he ubwo muko?
Ines: Tugiye gutembera gato n’abandi bakobwa
Khadija: Abahe bakobwa?
Ines: Amel, Camelia, Miryam n’undi umwe
Khadija: Uwo wundi na we nshaka kumumenya
Ines: ni Zahara
Khadija: Oya. Uriya mukobwa simukunda rwose. Firdaus ntuzakundane n’uwo mukobwa nkugiriye inama
Firdaus: Mama humura nzabyubahiriza buriya ufite impamvu
Ines: Ariko mama Zahara ni umwana mwiza

Khadija: oya oya geza aho. Agakungu ke n’abasore singakunda. Kandi narabikubwiye Ines nuko utumva
Ines: mama humura ntabwo azanshuka. Twagiye rero ni aho mu kanya
Khadija: Mugende amahoro bana banjye. Firdaus wibuke
Firdaus: Yego mama. Ndagukunda kandi

Twaramanutse nuko ubwo twendaga kugera hasi twumva amajwi y’abasore. Ni ba bandi n’ubundi
Firdaus: Ese babyara bawe nta kazi bagira?
Ines: abahe babyara banjye se kandi?
Firdaus: Nako basaza bawe bahora bicaye hariya
Ines: yewe byihorere uzabimenyera.
Tugeze hasi uracyeka twarabonye nde? Maurice. Yewe isura ye koko sinzayibagirwa ndabona ari hose

Maurice: Ariko ubanza warankunze uba unkurikira aho nigiriye
Firdaus: Yabaye ari wowe se ahubwo ungendaho
Maurice: Ahahaaa. Ubu se ni nde waje aho undi ari
Ines: nanjye ndahari ushaka wansuhuza
Maurice: wowe se ni nde ukwitayeho
Ines: sawa sha. Nyamara ni jye nari kuzabijyamo
Firdaus: Ines tugende se
Ines: twigendere ndabona hano habishye
Maurice: Ni wowe rwivanga uri kubishya ikiganiro ahubwo
Ines: ni nde se ukuvuze wowe ko bavuga ibigondamye imihoro ikarakara.
Jyewe: Wirirwe Maurice
Maurice: wirirwe rata ureke uyu mwene wacu utuma ntirobera
Twahise tugenda dusanga abo bakobwa ariko  tutarabageraho nibutsa Ines ko atagomba kubabwira amateka yanjye na gato.

Firdaus: Nibabaza ubabwire ko naje ino gushaka akazi gusa. Birahagije
Ines: humura niko ndi buvuge

Tubagezeho twarasuhuzanyije, ndabibwira na bo baranyibwira nuko dufata bisi turerekera.

Miryam: Ngo waturutse mu Rwanda?
Firdaus: yego niho naturutse
Camelia: Ariko nturi umunyarwanda
Firdaus: ndi we wuzuye ahubwo
Camelia: ikaze muri bene wanyu rero
Firdaus: bene wacu? Gute se?

Ese aba bakobwa na bo ni abanyarwanda cyangwa hari ikindi bashaka kumvikanisha?

Biracyaza….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s