Ubuzima

FIRDAUS: Agace ka 8



Nahise mubaza
-None se uri kunjyana hehe ko turi guta umuhanda?
-Oya uriya muhanda si wo ujya ku isoko. Ujyayo ni uyu uri imbere. Ariko ko mbona nkuzi ahantu?
-Reka reka nta hantu unzi
-Ndakuzi muri supermarket ahubwo ntiwavugaga. Burya uravuga
-Yewe ndumva wanyibeshyeho. Urakoze kunyereka inzira ahubwo wirirweho.

Nahise nihuta ngera ku muhanda wundi nuko ntegereza bisi igana ku isoko.
Nagezeyo nuko ndinjira ntangira guhaha. Imboga, udukoresho two mu gikoni, umuceri, n’ibindi bishobora kubikwa igihe kirekire. Ni byo bihutirwaga, imyend anayiguze maze kubona ko nsaguye.

Guhaha mu masoko yaho narabikunze, abacuruzi baba bakurwanira, bakwita dada, shangazi, bagusuhuza bakubashye cyane bati shikamoo, mbese nasanze icyitwa customer care bakizi cyane. Si nk’ahandi winjira mu iduka bakakureba nk’aho uje kubiba, wanabasuhuza bakakwihorera, wabaza igiciro bati cyanditseho. Aha biratandukanye. Murumvikana, ndetse ukabona yakubashye. Ihame ry’uko umukiriya ari umwami nasanze muri iri soko bararyumvise kera.

Mu guhaha nageze ahari za shokola numva amazi atembye mu kanwa. Nari maze igihe kinini cyane ntabasha kurya kuri shokola. Ariko narebye igiciro cyazo ndifata, ngura kamwe gato. Shokola nubwo indyohera ariko siyo yihutirwa aka kanya, ndacyari kwiyubaka no gutangira ubuzima, ngomba kugura ibya ngombwa cyane kurenza ibindi.

Ubwo namaraga kugura iyo shokola nasubiye inyuma ngo ngende, numva ngonze umuntu agwa hasi. Mpindukiye nasanze ari umukecuru, nihutira kumuhagurutsa no kumusaba imbabazi mpfukamye. Yarandebye aramwenyura, ahita ampobera arambwira ati ndabona disi wowe ugifite umuco. Yampaye zimwe mu mpanuro za kibyeyi, arigendera.

Nasigaye numva ikiniga, amarira atangira gushoka ku matama. Nibutse ko ntagize amahirwe yo kuganira na nyogokuru kuko iwacu bari barambujije kumusura, niyo yazaga wasangaga bantuma ngo ntamwegera. Byatumye nongera kwibuka ubugome bwabo, bituma numva ndushijeho kubanga.

Narangije guhaha ibyo nshaka nuko ndataha. Nahise ntangira gutegura ibyo guteka, nshoje njya koga ngo mbone kurya.

Ariko ntararya, naguye ku kinyamakuru, cyari kiri muri iyo nzu ariko ntarakibona. Cyari ikinyamakuru kivuga ku buzima. Dore amwe mu magambo nasomyemo

Aho kwicuza no kwirengangiza ibyakubayeho, ngo utangire uhishire ko wababaye ahubwo niba uciwe intege, utereranywe cyangwa utewe indobo emera ko koko byabayeho. Izere ko ufite ubushobozi bwo guhangana na byo kandi ko bidateze kugusubiza inyuma.
Nibyo koko gutereranwa biraryana. Nyamara kugerageza kwiyumvisha ko ari akantu koroshye aho gucyemura ikibazo bizarushaho kucyongera ndetse ububabare bwiyongere. Uburyo bwiza bwo guhangana n’ibyiyumviro bibi ni ukubanza kwemera ko byabayeho.
Aho kwiyita injiji cyangwa kwipfobya ngo wumve ko ibyateye gutereranwa ari uko uri mubi cyangwa udakenewe ahubwo igirire impuhwe ndetse wikomeze. Iyumvishe ko ari wowe ubwawe wo kwiyitaho no kwimenya, abandi bakaza nyuma.
Byaba ari uguhemukirwa n’uwo mwakundanye igihe kinini cyangwa se gutereranwa n’uwo wari wizeye ko ari we makiriro yawe, kwibabaza aho kugusubizamo intege bizarushaho kuguca intege. Inshuti yawe magara ugomba kwizera no kubwira byose ni wowe ubwawe. Komeza wiyumvishe unibwire ibyakubayeho, nibwo uzabasha kubifata nk’ibyoroshye noneho ubashe kubirenga
Gutereranwa bishobora guturuka n’ahantu utacyekaga ndetse ugahemukirwa n’uwo witaga inshuti magara, umuvandimwe ndetse n’umubyeyi. Urungano rushobora kugutererana ariko icy’ingenzi menya ko wowe ubwawe ari wowe ufite ubuzima bwawe muri wowe. Baho uko wumva bikubereye byiza, gusa wirinde nawe kuba wabangamira abandi nubwo rimwe na rimwe kubaho uko wumva, ushaka bigira uwo bibangamira.
Icy’ingenzi ni ukumenya ko abantu bahinduka, ugutereranye uyu munsi ejo ashobora kugaruka akaba ari we mufatanya mu byiza wagezeho.

Narangije gusoma aya magambo, muri jye numva ndushijeho kuba mushya. Nahise niyemeza kwiyitaho, ngashaka ahazaza hanjye ntawe ntezeho amakiriro. Numvise ko iki kinyamakuru ahubwo ari jye cyandikiwe, nibajije ukuntu uwacyanditse yanditse neza neza ibinyerekeye byose.
Nahise nkaraba mu maso. Ntangiye kurya terefoni yarasonnye, ndebye nsanga ni ubutumwa bugufi. Bwarantunguye kuko sinari mbwiteguye.
Ese ni nde ubumwoherereje? Buravuga iki se?

Biracyaza…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s