Ubuzima

FIRDAUS: Agace ka 5

Ubwo nunamukaga nasanze ari umukobwa undutaho gato.
Ati: Rwose mumbabarire munyerekere uko mubishyira aho bibikwa mbafashe.
Nabuze uko musubiza nkoresheje amarenga, ngize amahirwe umukoresha wanjye ahita aza amubwira ko mfite ubumuga bwo kutavuga, amubaza uko bigenze.
Ati: Nari ndi gutambuka ngira ibyago ndamugonga, ibyo yari ateruye byose byikubita hasi. Rwose mumbabarire sinabishakaga, ahubwo namusabaga anyereke uko abishyira ahabyo mufashe, nziko mu minota micye biba birangiye. Nzi gukora n’umurava rwose munashatse mwanabaza mama
Boss: Oya nta kibazo si ngombwa, Firdaus ni umunyamurava na we arabikora nta kibazo. Sibyo Firdaus?

Nikirije nkoresheje umutwe

Boss: Ntureba ko abyemeye. Nta kibazo rwose igendere arabitunganya
Nakomeje gushyira imigati ahayo nuko numva umuntu anturutse inyuma mpindukiye nsanga ni wa mukobwa
-Firdaus, umeze neza?
Nikirije nkoresheje umutwe
-Nitwa Ines. Nukuri umbabarire rwose ku byabaye. Mbabarira wemere ngufashe gupanga iyi migati kuko ni jye watumye igwa hasi
Naramwemereye nuko atangira kunganiriza. Mbega umukobwa uvuga wee. Yahereye abyutse ageza izo saha ambwira uko umunsi we wagenze. Disi abandi bana babasha kuvuga naho jyewe narabyanze. Mba numva ntazongera gufungura umunwa wanjye ngo ndavuga.

Nahise numva mwikundiye, nubwo ntabashaga kumusubiza ariko nanyuzagamo ngaseka, ubundi nkamukubita agashyi byo kumwereka ko namwishimiye. Ubu se birarangirira aha cyangwa tuzibera inshuti?

Nakomeje kujya nkora akazi kanjye uko bisanzwe, nuko umunsi wo guhembwa uregereza.

Uwo munsi nabyutse bisanzwe nitegura kujya ku kazi, mbanza kunyura ahantu ngo bandangire ahantu nabona ghetto yo kubamo kuko sinari gukomeza kuba muri guesthouse, birahenze kandi byibuze ubwo nabonye akazi nkeneye ahantu nisanzura, najya nteka, nakakirira abashyitsi. Gusa ikibazo mfite imyaka 17. iki gihugu kandi ngo kukwemerera kwikodeshereza ghetto utaruzuza imyaka 18 ntibipfa koroha. Ariko kuko ntari kavukire niyemeje gusobanura impamvu zose, wenda hari icyo byatanga.
5
Navuyeyo njya gufata ibya mu gitondo nuko nerekeza ku kazi.
Nkigera yo nahise ntangira gukora isuku, ngeze hagati nsanga ahantu hamenetse inzoga. Nahakoropye nipfutse amazuru kuko rwose umwuka wazo ndawanga, dore ko nanavukiye mu muryango utazinywa.
Nari nkiri muri ibyo nibwo umuntu yahise ansa n’unsunika mpita nikubita muri ya mazi nari ndi gukoropesha, ipantalo yanjye irajandama.
Nashatse kweguka, kubera isabune ndongera ndanyerera n’ishati ikora mu mazi.
Mana yanjye kuki koko ibi ari jye bibaho gusa?

Ngiye kongera kweguka, numvise umuntu anteruye ndahagarara, mpindukiye nsanga ni umusore mwiza, muremure, nuko…

Biracyaza…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s