Ubuzima

FIRDAUS: Agace ka 4

Ubwo nakinguraga nasanze ari wa mugabo wanyakiriye. Yari aje kumbaza niba nta wundi muntu turi kumwe. Yari yitwaje urupapuro n’ikaramu, akambwira mu magambo, jyewe ngasubiza nandika.
Jyewe: Oya ntawe ndi jyenyine. Kuki umbajije gutyo se?
Umusaza: Mbona hakunze kuza abantu babiri babiri, ubwo numvaga ko mugenzi wawe muri burarane nyine agutumye gushaka icyumba akaza nyuma. Kenshi iyo ari abagabo bubatse niko babigenza, ngo ntibaba bashaka uwababonana mugendana mushaka aho muryama
Jyewe: None se ubwo baba baje mu biki?
Umusaza: Uyu mwana rwose nawe. Baba bari gusambana. Ahubwo niba ntawe ufite umbwire dukore umuti, naryamo aya komisiyo da
Jyewe: Muze, mbabarira ntakubahuka rwose si ibyo byanzanye. Uramuke reka niryamire
Nahise nkinga urugi, ndaryama ndasinzira bishoboka. Iryo joro numvise muri jyewe nduhutse rwose, kuko nta wari kuntuka, sinari kubyukira ku nduru
*********
Hashize igihe mvuye mu gihugu nanahunze ibibazo byanjye ariko ndumva muri jye nta cyahindutse kinini. Yego koko sinkiri kubaho nkubitwa, mpangayitse ariko se amaherezo ubu ni ayahe?
Amafaranga nitwaje koko ni menshi nta nzara mfite, ndarya icyo nshaka, uko nshaka, ariko se nashira?
Kugirango icyo kibazo ngikemure nasabye akazi muri supermarket yegereye aho ncumbitse. Nubwo agashahara ari gato cyane, gusa kazamfasha gukomeza kubona ayo kwishyura icumbi ndimo, kandi bizanamfasha kuba nakomeza gushaka ubundi buryo bwo kubaho. Umunsi wo kunsubiza ugeze narambaye ndagenda. Nasanze umucungamutungo waho antegereje
Ati: Firdaus, ndabibona koko rwose aka kazi uragashaka. Ndakakwemereye ariko kuko utavuga, uzajya ucunga stock, unakore amasuku. Hari ikibazo?
Narikirije nkoresheje umutwe.
Ati: Byiza cyane. Akazi urakemerewe uzagatangira ejo
Yahise ampereza ibahasha irimo impapuro nyinshi
Ati: Harimo gahunda yose y’akazi, numero za ngombwa n’andi makuru yose wakenera.
Naramwenyuye, mukora mu ntoki musezera.
Nasohotse mwenyura, nishimiye ko mbonye akazi. Muri macye ni akazi gashya, umushahara, ubuzima bushya. Iyi ntangiriro ndayishimiye rwose.
Kugirango nzatangire akazi nkeye nahise njya mu mugi gushaka imyenda byibuze ngo njye nsimburanya n’ipantalo imwe nagiraga kuva mu myaka 3 ishize.
Nahise nsubira aho ncumbitse, wa musaza abona ko nishimye kuko nari nananiwe kubihishahisha.
Umusaza: Ndabona wishimye cyane
Nahise musekera, numvaga mfite ibyishimo bidasanzwe
Umusaza: Biranshimishije. Uze kugira umunsi mwiza
Nta byinshi yambwiye. Gusa nanjye byarantunguye kuko ubusanzwe na we ntakunda kuvuga. Ni umunyamwaga, avuga nabi aba yibereye mu binyamakuru. Gusa ubanza yarabonye ko nishimye na we bikamushimisha.
Bwarije, buracya ndabyuka nitegura kujya mu kazi.
Narakarabye ndisiga nuko nirebye mu ndorerwamo mbona koko ko nahindutse. Akamwenyu kambonekagaho hose. Nabanje kunyura kuri boulangerie gufata akantu ko kurya mu gitondo, sinari gukora nshonje birumvikana.
Umunsi wanjye wa mbere ku kazi wagenze neza, gusa wari umunsi wo kwiga no kumenyera akazi kuko bwari ubwa mbere ngakoze. Natashye naniwe birumvikana burya imihini mishya itera amabavu.

Nuko umunsi umwe ubwo nari mu kazi ndi gushyira imigati aho ibikwa, umuntu yarangonze ibyo nari mfite mu ntoki byose bihita bigwa hasi.
Ubwo nunamaga ngo nyitorangure numvise ijwi:
-Ihangane ndaje ngufashe ikosa ni iryanjye.
Uyu ni nde se?

Biracyaza…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s