Ubuzima

FIRDAUS: Agace ka 3

Nasohotse mu rugo ngenda nibaza aho nerekera, biranyobera. Ese nigire mu cyaro ahantu ntazi mbe ari ho nibera, cyangwa mve mu gihugu nigire hanze yacyo? Nubwo nta mafaranga ahagije mfite ariko ndumva ayo nafashe yangeza kure hashoboka, kubaho nazabimenya ngezeyo.
Nageze ku muhanda, nsengera mu mutima. Nsaba Imana kunyobora mu mwanzuro ngiye gufata. Nahise niyemeza gufata bisi ijya Kenya nkaba ariho nkomereza ubuzima, nabaho nkabaho, napfa ngapfa n’ubundi ndiho ntariho.
Iryo joro muri bisi ryabaye rirerire dore ko twagombaga kunyura mu kindi gihugu, urugendo rwatwaye amasaha atari macye. Nabashije gusinzira numva ntuje kandi nisanzuye dore ko nari ngiye gutangira ubuzima bushya.
Ubwo nageraga Nairobi, nasohotse muri gare, niyemeza kugenda n’amaguru nkabanza nkamenya neza uko hateye, nkanashaka aho mba ncumbitse iminsi micye nkiga ubuzima. Ese ndarara hehe? Ndarya iki? Ibi na byo byatangiye kumbera ihurizo muri aya mahanga nari ngezemo bwa mbere, ntanahazi nta n’umuntu n’umwe mpazi.
Nyuma y’urugendo rwamaze hagati y’isaha n’amasaha abiri ni bwo nabonye ahantu icyapa cy’uko hari amacumbi, nuko ndinjira. Nahasanze umugabo munini wicaye, nabonaga ko ari we ushinzwe kwakira abaje gucumbika. Yarimo asoma ikinyamakuru cyuzuyemo amafoto y’abakobwa bambaye ubusa, mbanza kugira ubwoba ko wenda naba nyobye ariko nihagararaho ndamwegera mukora ku rutugu
Yubuye umutwe arandeba nuko ambaza icyo nifuza, nagize amahirwe kuko nzi igiswahili gicyeya, ibyo yavugaga nabashaka kubyumva.
Namweretse nkoresheje ibimenyetso ko nshaka aho kuryama, nuko ampa urupapuro ngo mbyandikeho kuko yari amaze kubona ko ntavuga.
Nuko tuganira dkoresheje inyandiko, mubwira ko nkeneye icyumba kandi ntazi iminsi nzahamara. Ampa icyumba cyishyurwa amashilingi ya Kenya igihumbi kimwe.
Nageze mu cyumba numva ngeze muri paradizo. Jye wari waramenyereye kwirarira mu kumba katagira sima, katabamo igitanda, nisanze mu cyumba gishashe neza, gifite douche na toilette mo imbere, kirimo amakaro hasi.
Gusa nk’umukobwa nabanje kongera ndasasa uko nshaka, mpanagura inkuta, ndakoropa, ubundi ndangije njya koga ndaza ndicara, ntangira kurya ibyo nari naguze mu nzira nkiri muri bisi.
Numvise mu mutwe wanjye huzuye ibitekerezo byinshi, mfata ikaramu n’ikayi ntangira kwandika.
Nanditse ibintu byose byambayeho, ndongera nandika ibyo nifuzaga ko byambaho. Nanditse ibyo nabonye nandika ibyo nifuzaga kubona. 
Nanditse ibyo nakoze nandika ibyo nifuzaga gukora.
Nanditse ibyanshimishije nubwo ari bicye, nandika ibyambabaje
Kuva namenya kwandika, nahise niyemeza kutazongera kuvuga. Nubwo banyita kiragi ariko simfite ubumuga bwo kutavuga, nabiretse ku bwende.
Numva ntashaka kuzongera na rimwe kugira umuntu mvugisha. 

Abantu? Inyoko muntu? 

Ni babi cyane, ni indyarya z’abanyabinyoma. 
Umuntu agusekera nyamara mu mutima avuga ngo uragapfa. 
Akugurira icyo kunywa akaba ari we ukuroga. 
Umuntu akwagaza uzi ko ari ukugukunda agahita azana imbugita akayigushinga mu mutima amaraso akadudubiza nk’amazi. 
Abantu babaye babi.
Niba narahemukiwe aka kageni n’ababyeyi banjye, rubanda se we yankorera ibingana iki? 
Nafashe umwanzuro wo kutazigera nizera umuntu n’umwe uretse Imana yandemye yonyine. 
Nubwo nabaho nabi gute yo nzi ko imfiteho umugambi kandi mwiza, nizera ko igihe nyacyo nikigera nzasubizwa.
Nzi neza ko isaha nigera, Imana izubura ifishi igasinya, Firdaus mwari muzi mukamuyoberwa.
Nkiri muri ibyo bitekerezo nahise numva umuntu akomanze. Umutima wahise usimbuka.
Ni nde se ukomanze kandi ko nta muntu nzi hano?

Biracyaza…

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s