Ubuzima

FIRDAUS: Agace ka 2

Nimugoroba ubwo data yatahaga, mama yatangiye kundega ibinyoma bye nk’uko asanzwe abigenza, nuko nyine nta cyari gukurikiraho uretse gukubitwa. Papa kandi akubita nk’uwica inzoka gusa kubera kumenyera inkoni sinkirira. Mba nashinze iryinyo ku rindi, nta gutaka, kurira nta no gusaba imbabazi. Yahise amfata mu ijosi atangira kunigagura numva neza neza umwuka uraheze.
Byose yabikoraga ngo byibuze ntake cyangwa ntabaze cyangwa se musabe kundekura ariko ndyumaho, ibyo byakomeje kumwongerera uburakari. Gusaba imbabazi uzi ko utari buzihabwe, byongeye kandi ukaba uzira ubusa, byaba bimaze iki?

Nyuma y’iminota nka 20 yarandetse nuko ajya koga. Nanjye nagerageje kubyuka aho nari ndambaraye, ariko byari ugukambakamba kuko nta gatege na gacye nari nsigaranye. Ukuntu nkoresha ingufu ngo mbashe kweguka, mbona amaherezo nzazana abdomino nk’abahungu. Kuko ni kenshi neguka nongera ngwa.
Ibyo byose byabaga, mama ari guteka ibya nijoro. Sinemerewe guteka, ngo ntazabaroga da. Mbarogesha iki se koko? Jyewe noza ibyombo, nkajya guhaha, ibisigaye arabyikorera.

Naregutse nuko ntunganya aho nari ndi gukubitirwa dore ko hari n’uturaso twari twatarutse. Papa avuye koga nanjye nagiye koga, nitwaza amazi ashyushye ngo nikande, kuko nagombaga kubyuka njya kwiga kandi simba nshaka ko hari ubona imibyimba myinshi ku mubiri wanjye.2

FIRDAUS NGWINO UTUNGANYE AMEZA WA NSHEGE WE!!

Papa ni we wenyine ushobora kumpamagara mu izina. Abandi bose yewe n’abaturanyi, banyita KIRAGI. Amazina yanjye barayazi ariko kuko ntajya mvuga niko bahisemo kunyita.

Urebye data si umugome cyane nka mama. Kuko hari igihe rimwe na rimwe ubona adashaka kumva ibirego bya mama. Kandi ajya anyuzamo byibuze we akananyereka agakundo gacye, akanampa agahushya ko kuba nakora icyo nshaka.
Naragiye ntegura ameza. Ni bo bayariraho, jyewe ndya nicaye hasi, ukwanjye, kandi kure yabo ngo ntibaba bashaka ko mbumvira ibiganiro. Ibyo ntacyo bimbwiye, bapfa kuba bangaburiye gusa, aho nabirira hose harampagije.
Bamaze kumpereza isahani yanjye nahise nisohokera njya mu cyumba cyanjye mba ari ho mbirira, gusa urabyumva nabiryaga mbitamo amarira ariko niyemeza kubirya nkabimara, sinagira inkoni ngo ngerekeho no kwiyicisha inzara, ntawe naba mpima. Nategereje ko na bo barangiza kurya nuko barampamagara njya kwandurura.

Nasubiye mu cyumba cyanjye nuko ntangira gusubiramo amasomo ariko numva sindi kubibasha ahubwo muri jye hazamo kwandika. Naranditse kugeza ubwo naguye agacuho ndasinzira.
Nakanguwe n’urusaku rwa mama

WA MUNEBWE WE BYUKA WOZE IBYOMBO NITEKERE ICYAYI
Narabyutse nuko njya koza ibyombo, ndangije ndamuhamagara mubwira ko nashoje. Iyo amaze kumbyutsa yisubirira kuryama, kugeza ndangije nkamubyutsa.

Mbishoje yaje gutegura ibya mu gitondo nanjye mpita njya koga nuko ndangiza kwambara na we yamaze gutegura ameza, dufata ibya mu gitondo nuko maze kwandurura niruka njya ku ishuri.
Nubwo ntakunda ishuri ariko byibuze iyo ndi yo nduhuka mu mutwe kandi mba ndi kure y’ibitutsi n’intonganya bya mama.
Iyo ngeze ku ishuri gusa nanga ko amasaha yiruka, kuko mba numva ntashaka gusubira mu rugo. Niho honyine numva ntuje, nubwo rimwe na rimwe baba banyibazaho kubera ntavuga banareba imibyimba iri ku mubiri wanjye.

Amasomo arangiye naratashye, naniwe. Nagiye nsengera mu mutima ngo byibuze mama aze kumpa agahenge mbashe kuruhuka ho gato. Nyamara si ko byagenze ahubwo nkinjira mu rugo nasanze ari hanze antegereje ahita amfata mu misatsi ankurubana anjyana mu nzu, asunikisha ikirenge urugi ampirika hasi nuko

Mama: IBI BYOSE NI AMAKORA YAWE. IYO UBA UTARAVUTSE NTITUBA TUMEZE DUTYA. UMENYE KO HANO NTAWE UGUKUNDA NTA N’UTEZE KUZAGUKUNDA. WA MUHIRIMBIRI WE. UBUNDI WAZIYAHUYE BIKARANGIRA?
Yakomeje kumbwira nabi gutyo ari na ko ampondagura, gusa naramenyereye nubwo mba mbabara, amarira agatemba, nta jambo na rimwe nshobora kuvuga, sinshobora kumutakira no kumusaba imbabazi.
Amaze kwihaza yinjiye mu cyumba amaramo iminota micye nuko asohokana igikapu akinaga imbere

Mama: Ngiye gusura abaturanyi, ngaruke nsanga utakiri hano ndakurambiwe sinkigushaka

Nafashe igikapu mfunguye nsanga kirimo ubusa. Naragifashe ngana aho nararaga, ntangira kuzinga utwanjye, utuhe se ko ari amakariso abiri gusa n’imyenda niganaga na yo nayifuraga nijoro bugacya nyambaye naho mu minsi itari iyo kwiga nkambara igipira cyari icya papa, cyangeraga mu mavi.
Nashyizemo n’ibitabo n’amakayi. Nahise ngenda aho babika amafaranga, mfatamo amafaranga nshaka kuko ntibakundaga kubika kuri banki na passport yanjye niho yabikwaga nuko nitegura kugenda
Mbirangije nibwo nagaruye ubwenge ku gihe
Ese ngiye hehe ubu? Simpazi gusa ngomba kubavira mu rugo ni ko babyifuza

Biracyaza…

Ese uyu mwana w’umukobwa ubu aramenya yerekeza hehe wa mugani?

3 comments

  1. Ese uyu mwana arazira iki?Nnc uyu ni nyina koko cg ni mukase?Wihangane uduhe nka tubiri cg dutatu nukuri, ndifuza kumenya amaherezo yuyu mwana

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s