Ubuzima

Birashoboka. Agace ka 32

Bahise bamusukira utuzi ducyeya, mu gahanga, baramuhungiza, nuko arazanzamuka. Mama Jacques na we yari yaguye mu kantu, nuko ubwo madamu Muhizi yazanzamukaga, yarebye Mama Jacques
Madamu Muhizi: Mukandeke, ni wowe cyangwa ni umuzimu wawe?
Mama Jacques: Ni jyewe rwose. None se ahubwo wowe bite? Uri muzima koko? Cyangwa ni umuzimu?
Madamu Muhizi: Ni jyewe pee. Ndi mutaraga rwose.
Barahoberanye, bose ariko amarira y’ibyishimo yari yabarenze. Abandi bose bari baguye mu kantu bayobewe ikiri hagati y’aba babyeyi bombi. Nyuma y’umwanya utari muto, baricaye nuko
Muhizi: Niko se ye, ko mbona mwese mwitana abazimu turamenya umuzima ari nde, umuzimu ari nde?
Madamu Muhizi: Umva, reka mbabwire, hari inkuru ubura aho uhera uyibara pee. Nyuma y’imyaka myinshi, sinakemera kongera kubona Mukandekezi rwose. Shwiii. Nubu sindabyemera.
Muhizi: None se watubwiye koko uko bimeze?
Madamu Muhizi: Ntiwibuka igihe nacuruzaga ibitenge mbivana muri Congo?
Muhizi: Yego ndabyibuka.
Madamu Muhizi: Uyu Mukandekezi rero na we twakundaga kujyana kenshi, gusa we sinzi ubucuruzi yabaga agiyemo. Uko twakoranaga ingendo kenshi rero twaje kuba inshuti magara, ku buryo nari nsigaye mutuma jyewe sinirirwe njyayo, na we yaza nkamuha igihembo.
Muhizi: Wivuga inkuru ndende nawe yihine utubwire aho bihurira n’umuzimu.
Madamu Muhizi: Niho ndi kugana yewe dore ko nawe usigaye ukunda inkuru kundusha. Ubwo rero byageze aho, mwemerera igishoro, dore ko nari maze kumenya ibyabaga bimujyanye Congo nkumva simbishyigikiye. Twagiye kurangura uwo munsi, gusa mu gutaha byaje kuba ngombwa ko tunyura inzira yo mu mazi. Twafashe ubwato, nuko ubwo twageraga mu mazi hagati, burarohama kandi ari jyewe na Mukandekezi nta numwe uzi koga. Ubwo rero nahise ngira amahirwe jyewe abasare barimo baroba baba bambonye bahita baza barandohora, ndokoka ntyo. Twagumye aho dutegereza umurambo we turaheba, nuko turitahira twumva ko nyine ubwo byarangiye uruzi  rwamutembanye yapfuye nyine. Nyuma nakomeje kubaririza amakuru ye ndayabura, nakira gutyo ko yapfuye.
Abari aho bose bakurikiraga iyo nkuru bumiwe, maze Mama jacques na we akomerezaho
Mama Jacques: Burya rero gupfa no gukira koko ni umunsi umwe. Buriya ubwato ubwo bwarohamaga, nahise mbona ijerekani, kandi bari barambwiye ko ikintu kirimo umwuka iyo ugifashe utarohama. Narayifashe nuko amazi arantembana, gusa kubera ubwoba naje kugarura ubwenge ndi ku mwaro ahantu ntazi, nakonje ariko ndi muzima. Nariyandayanze nshaka ahari abantu mbabwira ibyatubayeho, na bo bambwira ko ubwo bwato abari baburimo nta n’umwe warokotse, nuko sinigora nkubaririza, nshaka itike nisangira umwana dore ko icyo gihe nari mfite Muhire afite imyaka ine. Yewe icyakora Imana ishimwe. Ukuntu disi mwankundiye umwana nk’uko wari waranyikundiye.
Jacques byamwanze mu nda, atangira gusuka amarira y’ibyishimo, Mugeni wari umwicaye iruhande atangira kumuhanagura. Nuko
Jacques: Imana ni igitangaza. Burya koko ngo gira neza wigendere, ineza uyisanga imbere. Dore ngo ineza zikubiranye zitumye imiryango yongera guhura. Imana yacu irahambaye rwose pee. Ndumva nta kindi narenzaho, gusa mama, uyu muryango ubona wabaye aho utari, bambereye ababyeyi iburyo n’ibumoso. Nshimishijwe nuko banashakaga ko uva mu bibi, nk’uko nanjye bamfashije guhinduka nkava muri bwa burara bwose wanyumvagaho ubu nkaba ndi umwana mwiza witonda.
Abandi na bo bakomeje kugenda buri wese avuga akamuri ku mutima, Jacqueline rwose wabonaga ameze nka murumuna wa Mugeni, mbese ibyo kuba muramukazi we wabonaga bitarimo. Ni kimwe na Mugeni na mama Jacques, yari ameze nk’umwana yibyariye, yari yisanzuye atitaye ko ari hafi kuba nyirabukwe. Ibiganiro bigeze kure, ni bwo Muhizi, nk’umukuru w’umuryango yafashe ijambo maze arababwira
Muhizi: Murabizi rero turi kwitegura kujya gufata irembo ku cyumweru. Ni ibirori tugomba kwitegura. Bibaye amahire ubwo umuryango wa Muhire uhibereye, umwanya wabo ntawe uzawufata ahubwo ni bo bazawujyamo. Kuko ari vuba, ndasaba ko mama wa Jacques na mushiki we baguma hano, kugeza ibyo birori birangiye na nyuma yaho tukazajya gusaba ko bakemerera Jacqueline akaguma hano, kandi ntibazabyanga kuko nyina na musaza we bahari. Ikindi ndumva nshaka gusaba Jacques gutekereza ku cyo nyina na mushiki we bazakora mu gushaka ubuzima kuko gutunga abantu babiri muri Kigali badakora byaba umutwaro uremereye cyane. Jacques urabyumva ute?
Jacques: Ndumva nanjye ari byo. Natekerezaga gushyira mushiki wanjye mu ishuri ariko akiga muri weekend indi minsi akaba akora. Ubwo ndaza kureba icyo yakora. Mama we rero byanyobeye. Numvaga yabanza kuruhuka, akiyondora, ibindi byazaza nyuma
Mugeni: Nubwo wenda ntaremererwa kuvuga, ariko ndashaka gushimira byimazeyo imiryango yanyu. Urukundo n’impuhwe mugira muzabihorane. Jacqueline ntagire ikibazo, akazi ke nzakamuha bitarenze uku kwezi kuko aho ngiye kuzakorera nemerewe kwishakira umukozi umwe, ubwo ntawundi mpitamo rero. Mabukwe rero ubwo Jacques abe ari we asigara yitaho.
Bose bashimiye Mugeni igitekerezo cye, nuko bugorobye bajya kuryama maze bucyeye baherekeza Mugeni yerekeza iwabo.
Igihe cyagenwe kigeze, bafashe inzira nk’uko umuco ubitegeka bajya gufata irembo, ibirori bigenda neza cyane, ku buryo ababyitabiriye bose wabonaga babyishimiye. Itariki y’ubukwe na yo yahise ivugwa, mbese iby’ingenzi byose birategurwa.
Bageze mu rugo batekerereje abasigaye uko byagenze, dore ko mama Jacques nk’uko umuco ubivuga atari kujyayo. Bamaze kubatekerereza byose uko byagenze, Mukandekezi yaraturitse ararira, bagerageza kumuhoza biba iby’ubusa.
Ese uyu mubyeyi noneho arijijwe n’iki?
Ntuzacikwe n’agace gakurikira, kazaba kanasoza iyi nkuru igice cya mbere.

Biracyaza…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s