Ubuzima

Birashoboka. Agace ka 30

Bakomeje kurebana maze bahita basingirana barahoberana cyane bamara akanya bameze gutyo, ubwo Jacques na Muhizi bari bumiwe bayobewe ibyo barimo.
Bamaze guhoberana, na byo byamaze akanya katari gato, baje kwicara
Mugeni: None se Jacques uyu ni we mama wawe
Jacques: Yego. Ahubwo se wowe muziranye mute?
Mugeni: None se Jacqueline muravukana?
Jacques: Ngaho da. None se mushiki wanjye we kandi umuzi ute? Ibi ni ibiki banyarwanda?
Mama Jacques: Ese bana ba, ko muterana amagambo nk’aho mutaziranye na mwe ahubwo? Niko se Jacques, mwazanye kunsura n’umuntu mutaziranye? Ahubwo se uyu mugabo mwazanye na we ko ntamuzi? Nsobanurira mudukure mu rujijo
Muhizi: Ahubwo ndabona mubyeyi ari wowe uri budukure mu rujijo. Naho jyewe nitwa Muhizi, nkaba narahaye akazi umuhungu wawe, ubu ni umwe mu bakozi banjye ariko yarenze kumbera umukozi ubu yambereye umwana. Mu kuganira rero nibwo naje kumenya ko ufunze, musaba ko twazazana kugusura nubwo byabanje kugorana dore ko we rwose atabikozwaga kuko yavugaga ko yakurakariye bikabije. Naho uwo mukobwa ubona, nubwo mbona musanzwe muziranye ariko ndacyeka utari uzi ko ari hafi kuba umukazana wawe. Ngayo nguko, ibisigaye nawe tubwire.
Mama Mugeni: (Azamuye amaboko) Habwa ikuzo Mana ya Aburahamu na Isaka na Yakobo. Singizwa muremyi w’isi n’ijuru, gitare cy’amahanga buhungiro bwacu. Nkuzamuriye ishimwe natuza akanwa kanjye ngushima nguhimbaza. Nibyo koko ijambo ryawe ntirigenda ubusa, ibyo nagusabye urabinkoreye Mana nziza. Urahambaye uri igihangange igitangaza, umukozi w’umuhanga. Ni nde utagutinya ngo akubahe agukunde koko Mana we? Ubu se mvuge iki ndeke iki ko bindenze? Mpere hehe ngeze hehe mvuga ibitangaza ukora?
Urakoze gusa.
Rero wa mugabo we, urakoze kunzanira umuhungu kunsura. Kuva nakatirwa nari ntaramubona. Byanteye igikomere ku mutima ariko nanone sinamurenganya kuko azi ko nagize uruhare mu rupfu rwa se. Nubwo ari inkuru ndende, ariko ntabwo yari azi ukuri kuri se bihagije, niyo mpamvu nta kosa mushyiraho. Nari ntegereje umunsi nzarekurwa ko nzamubwira ukuri kose ariko Imana ni igitangaza kuko mperutse kurota ndi kumwe n’umuhungu wanjye twishimye, ndacyeka wa munsi ari uyu pee. Naho aho nziranye na Mugeni na we arahibereye nabibasobanurire.
Mugeni: Ubwo nari mu wa gatanu, ni bwo Jacqueline yaje kwiga mu wa mbere. Kuva ubwo nabonaga ari umwana witonze gusa nkabona nanone ameze nk’umunyabibazo. Naramwiyegereje mugira inshuti aza kumbwira ko mama we afunze, akaba abana na muka se ariko na we atamufashe neza. Ntiyajyaga akunda kuvuga kuri Jacques, ahari iyo amuvugaho nari kuba narabimenye kera. Rero rimwe yambwiye ko yabuze amahoro akumbuye nyina, kandi twari turi ku ishuri. Mubaza niba afite tike ambwira ko yagenda n’amaguru yashaka akagwa mu nzira. Nibwo naje kumusabira uruhushya kuko nari umuyobozi w’abakobwa mu kigo, muherekeza ntyo tuza gusura nyina. Kuva ubwo rero uko yazaga twarazanaga, ni aho namenyaniye na mama Jacques. Gusa ndumva ndushijeho kwishima kuba nsanze mama we naramubereye umwana mwiza.
Jacques: mama rero uranzi sinjya menya guca ibintu ku ruhande. Kuba nemeye kuza kugusura ni uko boss yabinsabye naho rwose sinari kuzaza kugusura na rimwe. Naho kukurakarira urabizi kuba warabeshyeye papa ngo yari yaguteye baragutabara ni byo byatumye ngushinja, sinzabyicuza rwose. Gusa umbabarire kuba ntaragusuye. Naho ibindi byo rwose sinzi
Mama Jacques: Jacques mwana wanjye, niba waba ubyibuka neza, so yaje yari amaze imyaka hafi ibiri atagera iwanjye. Nta terefoni zabagaho ngo byibuze yaranterefonaga. Nta n’urwandiko. Kandi yari yarambujije kuzagera iwe, dore ko ntari nanahazi. Twatungwaga n’ayo nabaga nasambaniye, na papa wa Jacqueline akatwishyurira inzu. Ndemera ko nababereye umubyeyi gito. Gusa icyo utazi, ni uko nyuma ya ya myaka hafi ibiri, ni bwo papa wa Jacqueline yemeye kuntunga nk’umugore we, ansaba kureka uburaya burundu. Urabizi yari asigaye ahataha buri munsi. Abagabo rero barafuha, ubwo yazaga atashye agasanga so iwacu, yumvise ahari ko twongeye gusubukura umubano batangira kurwana. Sinari gukiza kuko sinari kumenya uruhande mpereraho niyo rubaho nari guherera kuri papa wa Jacqueline, wari waremeye kuncyura kandi simumvaga ko barwana kugera aho hazamo urupfu. Mu rubanza rero sinari kubona uko niregura, navuze ko nari natewe, dore ko n’ubundi yari yamaze kwitaba Imana. Mwana wanjye sinifuje kukugira imfubyi, kuko ndi umubyeyi. Umbabarire rwose.
Muhizi: Jacques ubu na we uritegura kuba umugabo, ibyo mama wawe avuga ushobora kuzabibona. Umugabo wese aho ava akagera ntaba yifuza ko hari umubano wihariye waba hagati y’umugore we n’abandi bagabo. Kuba rero papa wa Jacqueline yararwanye, yego simbishyigikiye ariko bifite ishingiro. Rero ku ruhande rwanjye ndumva waha umubyeyi wawe imbabazi, urabona ko abayeho arwana n’umutima. Wituma hafungwa umubiri ngo na roho ye ifungwe.
Jacques: Mama, imyitwarire yawe yatumye nitwara nabi. Kubona abagabo batatu bane mu rugo basimburana byatumye ntamenya guha agaciro umugore. Numvaga ko abagore babereyeho gushimisha abagabo, kandi igihe cyose umushakiye ugomba kumubona. Gusa ndashimira Mugeni kuko yanteye guhinduka no guhindura imyumvire. Ubu nzi agaciro k’umugore. Ndashimira kandi boss, kuko iyo ataba we ubu nashoboraga kuba ndi imbwa idafite icyo yimariye. Yambereye boss aba papa aba umujyanama, umunyamabanga, mbese yambereye byose. Kubera bo ndakubabariye rwose. Kandi nubwo utazabasha kuza mu bukwe bwacu, ariko tuzakomeza kugusura kugeza igihe uzafungurirwa. Maze kubona ko buri wese ashobora gukora ikosa bitewe n’ibihe arimo, impamvu zitandukanye, n’ibindi. Rero rwose ndakubabariye kandi mbikoze bivuye ku mutima
Mama we yahise ahaguruka barahoberana cyaneeeee. Mbese biba ibyishimo ku mpande zombi. Gusa bakiri guhoberana, ushinzwe abagororwa yahise aza ajyana mama Jacques ku ruhande amubwira ibintu abandi batabashije kumva. Nuko amaze kumuvugisha aragenda, maze mama Jacques agaruka ubona yarushijeho gucya mu maso
Mama Jacques: Mwihangane nk’iminota 30 nsubire mo hariya ndaje mbabwire ibyo uriya mucungagereza yari ambwiye. Ariko disi Imana irahambaye peee.
Ibi byishimo se kandi Mama Jacques abitewe n’iki?

Biracyaza….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s