Ubuzima

Birashoboka. Agace ka 25

Margo: None se mwaretse tukoroshya ibintu tukabirangiriza hano koko? Sinshaka gufungisha uyu musore mwiza rwose ahubwo nyine nababaye
Polisi: Wababajwe n’iki se
Margo: Urumva kwamburwa ubusa n’umwana ubyaye koko bitakubabaza? Rwose impamvu mbazanye hano twenyine nagirango niyemera akansaba imbabazi tubirangize mwikomereze akandi kazi kanyu
Polisi: Naho se iyi nzoga tuyikorere iki? Ko dushaka kumenya ibiyirimo kandi ko yavuze ko ari iyo yagusanganye? Nawe kandi mu buhamya wivugiye ko yatumye utinywera neza. Ubwo ni uko yari iyawe
Margo: Reka sinzi ibirimo rwose ndarengana
Polisi: Ngaho Jacques, tubwire ikindi kimenyetso ufite wise simusiga ubundi tumenye igikurikiraho
Jacques yahise afata terefoni ye, abumvisha amajwi. Burya acyinjira agasanga Margo yambaye bidasanzwe, yacyetse ko ari umutego ashaka kumugushamo maze na we ahita afungura agafata amajwi kuri terefoni ye.
Byose uko byagenze kuva yinjiye kugeza asohotse barabyumvise, maze Margo wari ufite amashagaga ahita amera nk’urukoma rukubiswe n’umuriro, amasoni aramwica, ubwoba buvanze n’ikimwaro biriyongera.
Polisi: None Margo, ko biboneka ko ari wowe munyacyaha ahubwo se? Jacques ntiyakureze gushaka kumushuka ngo umushore mu busambanyi, none wowe umwituye kumubeshyera no kumuharabika? Ariko abantu mwabaye mute? Ngaho sobanura icyabiguteye ubundi umenye igikurikiraho
Margo: Nyine urabona rwose uyu musore nawe umubonye wamwifuza. Nitwaje ko mfite amafaranga numva ko atari bwange ko turyamana. Ibyago byanjye yampakaniye namaze gusa n’umwiyereka wese. Buriya benshi muri bagenzi bange banga uwababona ntabarongore, bakanga uwabumvira ubusa. Numvise agahinda n’isoni nanjye nshaka kumwumvisha mubeshyera. Ni bwo nahise nshaka uko nahimbahimba ibimenyetso, sinari nzi ko yaba afite ingingo zimurengera aka kageni. Rwose muce inkoni izamba mumbabarire pee.
Polisi: Si twe dufata umwanzuro wa nyuma. Jacques ni we wabeshyewe, ubwo ni ahe kuba yatanga imbabazi cyangwa se akazimana gusa ibizami bya labo byo icyo bigaragaza ntabwo tukizi kuko cyo ni icyaha ukwacyo. Gushaka kuroga umuntu ngo umukoreshe ibyo ushaka, no gushukashuka umuntu ni ibintu bibiri bitandukanye. Jacques natakuregera kumushinja ibinyoma, twe turakurega gushaka kuroga. Jacques tubwire umwanzuro wawe
Jacques: Jyewe ubwanjye sinjya nshaka ko hari umuntu twabangamirana kuko ibyo nakoze bibi birahagije. Mba numva abantu bose twabana mu mahoro nubwo inyangabirama zitabura. Ariko nkuko mwabibonye hano hahoze abashungerezi benshi, bivuze ko kuba ndi umwere batabizi. Ikindi ibyo yakoze byambitse isura mbi business, kandi sindi nyirayo. Ndumva yashaka uko asaba imbabazi boss wacu kuko ni we yakoshereje cyane kundusha. Ubu se abakiriya ntibagiye kudushiraho kubera ko bazajya bavuga ngo dufata abakiriya ku ngufu?
Ako kanya terefoni y’umwe mu bapolisi yarasonnye arasohoka kuyitaba, yinjira yahinduye isura
Polisi: Margo, ubu rero ibintu bihinduye isura. Mpawe uburenganzira bwo kugusaka, aka kanya.
Margo: Ariko se koko mwakoroheje ibintu, basi mureke turebe uko tubigenza ariko ibintu byorohe rwose.
Polisi: Ushaka ko twabigenza gute se?
Margo: Rwose nashaka uko mbagurira agacupa ariko ibintu bikarangira. Munyemerere mbasinyire ka sheki ariko tubisoze
Polisi: Yisinye turebe
Margo yahise asinya sheki y’ibihumbi 200 arangije ayihereza umwe muri abo bapolisi nuko undi aho kuyakira ahita amwambika amapingu
Polisi: Uraregwa ibyaha bitatu harimo icyo guharabika no gushinja umuntu ibinyoma, icyo gukoresha aphrodisiac mu cyo kunywa ngo ugushe umuntu mu mutego n’icyo gushaka guha ruswa umupolisi ngo usibanganye ibimenyetso.
Bahise batumiza imodoka iraza iramutwara n’ibye byose, nuko Jacques na we ajyana na bo nk’umutangabuhamya w’ingenzi.
Agezeyo yahahuriye na boss kuko bari bamumenyesheje, nuko buzuza ibisabwa maze Margo aba acumbikiwe kuri burigade mu gihe hagikusanywa ibindi bimenyetso
Batashye bageze ku kazi, boss abwira Jacques ko bajya mu biro bakaganira
Muhizi: Jacques ndumva ndushijeho kugukunda rwose
Jacques: Kubera iki se boss?
Muhizi: Buriya nkunda umuntu uba azi uko yakikura mu kibazo kandi adahungabanyije ibindi. Nkunda umuntu uhora ashaka ibisubizo. Ngakunda umuntu uzi gucisha macye kandi akamenya gusubiza. Byose wabigaragaje uyu munsi. Gusa ukomeze usenge urabona ko uri kugabwaho ibitero binyuranye. Utabaye intwari wazahagwa. Hagati aho ngufitiye amakuru wari wahishwe
Jacques: ayahe se boss
Muhizi: Buriya uzi ko Mugeni azaza mu cyumweru gitaha? Ariko azaza utabizi uzabimenya yahageze
Jacques: Koko se? Ubwo se kuki ashaka kubimpisha?
Muhizi: Nyine kuko atazi ko waje Kigali, urumva ko adashaka ko uzirushya uza kumwakira. We ni iyo mpamvu afite gusa nta yindi. Ahubwo se ufite iyihe gahunda naza? Hari ikirori ngo ngutere inkunga?
Jacques: Numvaga nshaka kuzamwambika impeta, ariko bikabera hano nyine. None se niba ashaka kuzaza ntabizi ubwo ndacyabikoze?
Muhizi: Byose birashoboka. gusa akubonye ku kibuga yabona ko iwabo nta banga bagira. Buriya turaza gushaka ubundi buryo bizakorwamo kandi bwiza. None se uzatera ivi ko wavuze ngo uzamwambika impeta?
Jacques: Oya sinzaritera biriya jyewe simbishyigikiye, ubwo nzashaka inzira nziza mbinyuzamo kandi zizabatungura mwese
Muhizi: Noneho uwo munsi ni agashya gusa. Ese ko utajya ukunda kuvuga kuri mama wawe, kandi warambwiye ko ariwe usigaranye gusa, ubwo ntiwazamutumira akazaba ahari na we akamenya umukazana?
Jacques: Boss ibya mama byihorere nzabyimenyera
Muhizi: Oya mbwira. None se mama wawe afite ikihe kibazo?
Jacques: Boss waretse ibyo tukabyihorera koko?
None se Jacques nyina we bimeze bite? Hagati aho se uru rubanza Margo si we urwikwegeye? Iyi surprise se ku mpande zombi ko izaba imeze neza?

Biracyaza….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s