Ubuzima

Birashoboka. Agace ka 22

Jacques: Oya boss ubanza nasobanuye nabi icyifuzo cyanjye
Muhizi: Ngaho nsobanurira neza
Jacques: Urabizi narakwibwiye bihagije, kandi wangiriye inama unampa akazi kuko wabonaga ngaragaza impinduka ndetse nkanerekana ubushake bwo gukora. Rero umusaza yangiriye inama yo kuba nakimuka ino, kubera mpafite amateka mabi, noneho nkajya aho batanzi nkaba ari ho nkomereza ubuzima. Guhitamo Kigali ni uko ari ho na Mugeni byamworohera kubona akazi ku byo ari kwiga. Kuko ndifuza ko nava kwiga nzahita mfata irembo ngatangira gutegura ubukwe
Muhizi: Ntiwumva ahubwo ko ubisobanuye neza. Uwo musaza nanjye ndamushyigikiye rwose. Buriya abantu ntabwo twese bitworohera kubona ko umuntu yahindutse. Uzasanga niyo tubyakiriye ariko dukomeza gukoresha inyito yerekana ko wa muntu hari ibyo yigezemo. Tuti uwahoze ari umujura, uwahoze ari indaya, wawundi wajyaga afatana ku ngufu n’ibindi byo gufatira ku hahise he. Rero nawe birashoboka koko ko rubanda rwakomeza kujya rukubona muri ya shusho rukuziho, ku bagore rero kiba ari igisebo kandi bishobora guhungabanya umubano wanyu. Gusa nkibaza nti I Kigali ko ubuzima bwaho buhenze, uzabasha kuhaba ute? Akazi se ko uzakabona ute?
Jacques: Ni byo ndi kwibaza nanjye nshaka ko mungiramo inama mukanampamo ubufasha. Kuko ni mwe babyeyi mfite rwose
Muhizi: Rero wa musore we kukureka ukagenda ntabwo mbyishimiye kuko kuva wagera hano business yanjye yarungutse ku buryo bugaragara, abakozi basigaye bakora neza, abakiriya bishimira servise bahabwa. Ndumva kukurekura bigoye. Ariko nanone nshyigikiye ko wimuka rwose nanjye.
Jacques: None se tubigenze dute boss?
Muhizi: Nubundi nashakaga kwagura ibikorwa nkakorera muri Kigali. Ubu nujujeyo guest house, inafite ibyumba biberamo inama, ubusitani bwo gukoreramo ibirori, n’akabari gasobanutse. Ndumva ahubwo mu bakozi nzakoreshayo ugomba kuba uwa mbere, ukanareba mu bakora hano babiri muzajyana, kuko izatangira gukora mu kwezi gutaha. Ubwo noneho wazaba ari wowe ushinzwe ibikorwa byose, mu cyongereza ni CEO. Umushahara na wo uzaba ari mwiza uzagufasha kuba muri Kigali no gutunga urugo. Ubwo nubishima niho uzanakorera ubukwe, sinzakwishyuza rwose. Urabyumva ute?
Jacques: Boss murakoze, murakoze cyane pee. Sinzi uko nabona mbashimira rwose. Murakoze pee.
Muhizi: Erega uretse ko abantu twikunda, dore ko ngo bakunda inkwi bakanga abashenyi, ubusanzwe umukozi ukora akazi ke neza aba akwiye kuzamurwa mu ntera, umushahara ukiyongera, naho kwishimira inyungu ariko ntiwiture abatumye uyigeraho si ibintu byo gushima. Umenyeko uzaba ufite inshingano zikomeye kurenza izo wari ufite hano, ubwo rero ni ugufunguka mu mutwe kurenza ubu, gusa mbikwizeyeho. Ngaho komeza akazi kawe.
Yamaze kugenda, Jacques yumva ayo makuru ntiyayihererana aba ahamagaye Paul dore ko ari we nshuti magara yagiraga amutekererza byose.
Paul: Sha burya hari umuntu uza mu buzima bwawe akazanamo imigisha gusa gusa. Nawe rwose Mugeni mvuze ko yaguteye ishaba sinaba mbeshye. Uzi ko kuva mwamenyana neza neza ibintu byawe byose biri ku murongo ugororotse.
Jacques: Sha byo rwose niko biri. Niyo mpamvu nanjye niyemeje kutazamuhemukira ngo mutetereze na gato. Ukuntu umuryango we unkunda na byo ubwabyo biranezeza bidasanzwe. Ariko nawe ubuzeho. Uzaze tunywemo sha dore nsigaye nsoza akazi saa kumi n’imwe, andi masaha nubwo mba mpari ariko mba nagashoje.
Paul: Nzaza rwose. Icupa na ryo se ko nta gihe ridakenerwa. Nzaguhamagara vuba aha rwose nze turisome. Amakuru se ya Mugeni? Azaza ryari
Jacques: Sha azaza nyuma y’umwaka uhereye igihe yagendeye. Gusa ngo ashobora no kuza mbere cyangwa nyuma bitewe n’igihe abarimu babonekeye. Yewe reka ngucikeho ngakore, turasubira
Iminsi yakomeje kwicuma, ari nako akomeza kwitwara neza haba mu kazi no mu bandi. Kwa sebukwe yari asigaye abasura nubwo Mugeni yabaga adahari, ni bwo yanabwiye sebukwe ko boss we yamwemereye kuzamwimurira I Kigali agakora muri guest house yahubatse.
Papa Mugeni: Ntiwumva se sha. Ibyo rwose ni byiza cyane. Ubwo nizere ko n’umushahara uziyongera
Jacques: Yego uziyongera birumvikana ariko nyine Kigali nubusanzwe irahenze kuyibamo
Papa Mugeni: Mwana wanjye ushaka iterambere ariyima. Ntuzagere I Kigali ngo uhugire mu maraha y’abasore, ngo wishinge ibitaramo bya buri munsi bihahora, wazacyura umunyu. Uzamenye ikikujyanye, umenye icyerekezo ni bwo uzabasha kuhitwara neza cyane. Ubugabo buraharanirwa wa musore we
Jacques: Ibyo ni ko bimeze rwose humura ubwira uwumva ntavunika. Nanjye nzi ko icyamvanye iwacu ari ugushaka iterambere sinavanyweyo no gushaka amaraha.
Hagati aho, Mugeni ntiyari azi ibyo guhindurirwa akazi kwa Jacques, yari yarabimuhishe ndetse anabwira iwabo ko batazabimubwira akazatungurwa ageze mu gihugu.
Ariko kuganira hagati yabo byabagaho kenshi gashoboka, urebye buri wese ku ruhande rwe nta rungu yicishije mugenzi we cyangwa ngo atume amukumbura cyane. Mugeni we yahoraga aharanira gutsinda ngo atazasibira bigatuma igihe yari afite cyiyongera kuko ntiyari gutaha adafite impamyabushobozi. Bagenzi be bahoraga bamuratira Jacques, bamubwira ko ari umwana mwiza, azi kubana no kuyobora neza.
Iminsi yakomeje kwicuma, nuko Jacques, Diane na Sandrine bimukira gukorera I Kigali, aho bahuriye n’abandi bakozi bashyashya bose batangira gukora no kumenyerezanya akazi. Ntibyatinze hatangiye kuyobokwa na benshi bahakundira serivisi nziza batanga, isuku iharangwa, ikinyabupfura kiranga abahakora. Ariko bose bashimaga cyane Jacques. Nuko umunsi umwe, ubwo yari ari kuruhuka, yumva terefoni irasonnye
Jacques: Allo
Utazwi: Allo. Ni Jacques tuvugana?
Jacques: Yego ni we. Muri ba nde se ko ntabamenye
Utazwi: Ni umukiriya wanyu, nakubazaga niba ahubwo uhari nagushakaga
Jacques: Yewe uyu munsi naruhutse ariko niba byihutirwa naza nta kibazo
Utazwi: tebuka sha ndagushaka cyane pee.
Jacques: Ni amahoro se munshakira?
Utazwi: Ni amahoro rwose musore wanjye.
Jacques yarabyutse arihumura nuko ajya ku kazi ahageze ahamagara uwo muntu amubaza aho aherereye, undi amurangira aho ari, Jacques atungurwa no gusanga uwo muntu umuhamagaye ari muri kimwe mu byumba bakodesha.
Jacques: None se ngusange aho mu cyumba?
Utazwi: Bitwaye iki se? Ngwino nta kibazo.
Yaragiye, ageze ku muryango arakomanga. Undi ati ni karibu
Acyinjira yatunguwe no gusanga….
Yatunguwe no gusanga bimeze gute se?

Biracyaza….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s