Ubuzima

Birashoboka. Agace ka 21

Ubwo Jacques yageraga kuri reception yasanze ari Papa Mugeni waje kumureba. Akimukubita amaso yabanje kugiramo ubwoba yibaza ko wasanga Mugeni yahuye n’ikibazo dore ko bari bamaze iminsi ibiri batavugana, ariko arebye mu maso y’umusaza abona hacyeye nk’aho nta kibazo afite. Uko yamwegeraga niko yarushagaho kwibaza icyaba kizanye uwo musaza aho ku kazi.
Yaramusuhuje nuko amuha karibu mu biro bye.
Bageze mu biro, batangiye kuganira
Jacques: Papa icyakora urantunguye rwose
Papa Mugeni: None se ko nari mbizi ko uri ku kazi nari kwirirwa nguteguza mwana wa. Amakuru se, akazi karagenda?
Jacques: Yego akazi karagenda neza. Mwebwe se bimeze bite? Mama Mugeni araho na we?
Papa Mugeni: Yego twese ni amahoro. Ko utambaza se n’amakuru ya Mugeni?
Jacques: We byibuze tujya tuvugana ariko hashize iminsi ibiri tutavugana. Araho nawe se?
Papa Mugeni: Araho na we. Ngo amasomo ayamereye nabi.
Jacques: None se tubakirize iki papa? Twakomeje kuganira ndarangara
Papa Mugeni: Kamwe nanywaga mudusura ntukibuka se? Iriya ni yo nzoga y’abasaza nka njye.
Jacques yahise atumizaho inzoga y’umusaza, we yikomereza kunywa amazi
Papa Mugeni: Ese sha ko uri kwiyahuza amazi uri ku miti?
Jacques: Oya ahubwo ni uko ku kazi tutemerewe kunywa inzoga. Sinaba nyoboye abandi rero ngo mbe ari jye nica amategeko twishyiriyeho. Bituma gakorwa neza.
Papa Mugeni: Sha uwo mwanzuro ni wo rwose. Ndabishimye cyane. Hanyuma rero sinje kukureba gusa hari impamvu ikomeye yari inzanye
Jacques: Mumbwire mbateze amatwi
Papa Mugeni: Ese umaze igihe kingana gute utuye ino?
Jacques: Uyu mwaka ni uwa gatanu
Papa Mugeni: Eeeh. Uraharambye rero byo. Inama nshaka kuguha rero ntuyifate nk’aho uyihawe na papa Mugeni, ahubwo nshaka umfate nka papa wawe, umusaza mukuru se, mbese uyumve neza kandi aho ugira akabazo ntutinye kumbaza
Jacques: Nguteze yombi rwose
Papa Mugeni: Ntabwo nshaka kugushinja ariko hano hanze hari amakuru atari meza akuvugwaho. Sinzi niba ari ukuri ariko burya nta nduru ivugira ubusa. Umunsi uhura na Mugeni bwa mbere, mugahurira hano, amakuru yahise angeraho. Umunsi mudusura na mugenzi wawe nabwo nabonye andi makuru, ari na yo yatumye buriya mfata umwanzuro wo kohereza Mugeni kwiga hanze ngo byibuze mbanze menye ibyawe neza. Nubwo ntashobora guhitiramo umukobwa wanjye aho azashaka, ariko sinakemera nanone ko yiroha kandi mbibona. Amahitamo ye sinayivangamo ariko sinabura kumuha inama no kumuburira. Gusa mbere yuko agenda yambwiye amagambo y’ihumure, kuko nasanze nawe azi amateka yawe akanamenya ko wahindutse. Ese mbanze nkubaze koko warahindutse cyangwa ni ukwihishira ngo umwegukane ubundi uzasubire mu ngeso zawe?
Jacques: Papa, mu kuri siniraririye imbere yawe, ahahise hanjye si heza pee. Narasayishije mba iciro ry’imigani. Ariko Mugeni yanteye guhinduka ku buryo bugaragara, ari we na bagenzi be bantangira ubuhamya. Si ukwijijisha kuko nubundi ibyo nakora ntabwo byose byamugeraho, ariko nubu kuba atari hafi hano, amakuru yanjye yose nyamugezaho uko ari.
Papa Mugeni: Urakoze kunyemerera ko ahahise hawe ari habi. Ntawe utagira ahahise kandi ntawe ubura icyasha nubwo biba bitangana cyangwa ngo tubimaremo igihe kingana. Iyo uteguye ahazaza hawe neza ntihakuraho ahahise hawe ariko hashobora kuhatwikira ndetse ukaba intangarugero rwiza ku bakuzengurutse. Ariko nanone hari inama nshaka kuguha yatuma urugo rwawe ruzaba mu mahoro nta bigambo byinshi bivugwa
Jacques: Ndakumva muze
Papa Mugeni: Imyaka itanu uri ahantu, uba warabaye nka kavukire. Iyo ufite imyitwarire mibi wahagiriye, bihora bigaruka mu biganiro hagati y’abantu. Nshaka kukugira inama yuko washaka akandi kazi ukimuka hano ukajya ahantu utazwi, mukazakomerezayo ubuzima. Numvaga naguhitiramo kujya I Kigali kuko ni nabwo bizafasha Mugeni gushaka akazi k’ibyo azaba arangije kwiga. Urabyumva ute?
Jacques: Mu kuri ndumva ari byiza ariko Kigali buriya sinyizi nta n’umuntu tuziranye ubayo. Kwizera kuhabona akazi biragoye
Papa Mugeni: uzabiganirize shobuja wumve niba ntacyo yagufasha kuko ndamwizera ni imfura kandi na we atanga inama za kigabo. Nibidakunda uzambwire nzaguhuza n’abagufasha. Sinifuza ko umwana wanjye yazajya ahora yumva inkuru z’incamugongo. Uzi gutambuka bati uriya na we umugabo wawe bararyamanaga, wagera mu kabari bati uriya na we ni uko, wajya mu isoko bikaba uko…
Jacques: Sinajyaga mbiha uburemere bungana butyo numvaga ko kuba narahindutse bihagije kandi abantu bazabibona. Naho wa mugani hari abantu bakomeza kurebera umuntu mu ndorerwamo y’ahahise.
Papa Mugeni: Burya uzi ko umukobwa witwaye nabi akabura umugabo iyo yimutse aho yabaga akajya aho atazwi akitwara neza adatinda kumubona. Burya n’indaya iyo itangiye kubura abakiriya yimura iseta mugani wazo. Ubundi abagabo bakayisamira hejuru bazi ngo ni mushya mu kazi kandi agasaziyemo. Yewe mwana wa nkuganirijeho reka nsubire imuhira. Kandi ujye unyisanzuraho ntabwo ndi nka ba basaza bakomeza ibintu. Kuba uzambera umukwe ni isano ikomeye integeka kuguha inama n’ubufasha.
Jacques: Yewe papa urakoze cyane. Ubu umbereye papa wa kabiri nyuma ya boss kuko nawe yambereye papa dore ko umbyara atakiriho. Kandi vuba nzababwira icyavuyemo. Nimugoroba boss naza ndi bumubwire iki gitekerezo.
Papa Mugeni yaragiye nuko Jacques asigara yibaza umugisha yagize ubwo yamenyanaga na Mugeni kuko ibintu byose biri kugenda mu nzira nziza cyane.
Ubwo byageraga nimugoroba ni bwo Muhizi yaje, Jacques na we amubwira ko yamushakaga
Muhizi: Ni amahoro se Jacques
Jacques: Ni amahoro. Databukwe yavuye hano kunsura. Hari ibyo twaganiriye binsaba kuba nahindura akazi. Nshaka ko mubimfashamo
Muhizi: Guhindura akazi nkabigufashamo?
Jacques: yego. Nshaka kuba najya gukorera I Kigali. Nabasabaga ko mwamfasha kuba nabona akazi I Kigali
Muhizi: Ubwo rero umaze kubyimba ubonye uduaranga ushaka kujya kuduhondagurira I Kigali? Urumva cyangwa warabuze aho ukomereza uburara bwawe sha? Mbwira niba wahaze akazi ngusezerere rwose ureke kuzana inzitwazo. Mbwira se vuba?
Muhizi se ari buze kubyumva koko cyangwa Jacques yikozeho?

Biracyaza….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s