Ubuzima

Birashoboka. Agace ka 20

Dusubire inyuma gato
Uko iminsi yagendaga yisunika niko urukundo rwa Jacques na Mugeni rwarushagaho kwiyongera. Byibuze rimwe mu cyumweru barasuranaga, gusa Mugeni  yari atarafata umwanya wo kumwerekana nk’inshuti ye, nubwo mama we yari abizi ariko papa we, dore ko atari akiboneka kenshi mu rugo kubera akazi, ntabwo yari azi umubano uri hagati y’umukobwa we na Jacques.
Ku kazi naho byakomeje kugenda neza, abakozi bose biyumvamo Jacques, ndetse bituma boss arushaho kumugirira icyizere no kumukunda bihagije. Sandrine na Diane bakomeje kuba intangarugero ku kazi ndetse bari inshuti magara haba hagati yabo no hagati ya buri umwe na Jacques na Mugeni.
Cynthia yikomereje kujya ategereza tip abakiriya bamusigiye, manager we yaje kubona akandi kazi aragenda bazana undi, gusa na we ntiyatinze kumenyerana n’abandi bakozi.
Umunsi umwe rero, Mugeni yabwiye se ko afite umushyitsi kandi ashaka kumumwereka.
Papa Mugeni: Uwo mushyitsi ko numva ubanza afite ikindi kimugenza ra. Abandi bose wagiraga ko utabanyerekaga
Mugeni: Hari igihe baba ari abashyitsi basanzwe ariko undi ni umushyitsi w’imena. Kandi nshaka nyine umumenye na we akumenye
Papa Mugeni: Nta kibazo mwana wanjye uwo mushyitsi wawe ahawe ikaze.
Amasaha yarisunitse nuko Jacques arahagera. Ntiyaje wenyine ahubwo yazanye na Paul, dore ko wari umunsi wo kumenya niba ahawe ikaze mu muryango cyangwa se akumiriwe.
Bahawe ikaze baricara, barabazimanira, nuko batangira kuganira bisanzwe. Bigeze hagati, papa Mugeni, nka nyiri urugo dore ko yabonaga umukobwa yabuze aho ahera amwereka abashyitsi afata ijambo.
Papa Mugeni: None se Mugeni, ko aba bashyitsi ntabamenye waba wowe ubazi
Mugeni: yego ndabazi ni bo nari nakubwiye bari bunsure. Uyu yitwa Muhire Jacques, ni inshuti yanjye kandi dufite imigambi myiza ahazaza. Uwo mugenzi we bari kumwe yitwa Paul, ni inshuti ye.
Papa: Eeeeh. Bahawe ikaze rwose. Mbwirira mama wawe aze hano sha
Yahise ahamagara mama Mugeni nuko na we araza
Papa Mugeni: Niko, ko utaje gusuhuza abakwe wo gacwa we. Mugeni yakuze ngo agiye kurongorwa da.
Yabivugaga byo gutebya no gutera urwenya. Nubwo yari umusaza utavugirwamo ariko ntiyari intare ahubwo yangaga agasuzuguro no kwitwara nabi.
Papa Mugeni: Umva mukecu, nyaruka uzane agacupa nsangire n’aba basore dore Mugeni yabahaye imitobe ubanza yabananiye. Uzane kakandi nkunda.
Jacques: Ariko nibi turi kunywa twari twashimye
Papa: Wa musore we ntuzambeshye nkuze. Abanywi b’inzoga turiranga aho turi hose. Erega ikibi ni ugukabya naho kunywa mu rugero ntacyo bitwaye.
Bakomeje gusangira, nuko ubwo amasaha yisunikaga barasezeye ngo batahe. Baragiye, Mugeni arabaherekeza.
Bucyeye bwaho ubwo papa Mugeni yaganiraga na bagenzi be b’abagabo, akabatekerereza ko umukwe we yamusuye, bamubajije uwo mukwe nuko akibabwira ko ari Jacques bamusamira hejuru bati reka reka uwo si umukwe aje kukwangiriza umwana. Undi yababwiye ko we yamushimye rwose nta kibazo kandi nta mutagatifu ubaho. Gusa ubwo yatahaga yakomeje kwibaza ku byo abantu bamubwiye ashaka uburyo yaba atandukanyije Mugeni na Jacques, ngo abe yiga uko bizagenda.
Yahise yibuka ko Mugeni ahora yifuza kwiga ibijyanye no gukora mu ndege, bihuza nuko muri Kenya hari hari ahantu yabyiga igihe cy’umwaka umwe. Nuko ubwo Mugeni yatahaga, aramwicaza ngo baganire
Papa Mugeni: Niko se Mugeni akazi ubona kagenda neza
Mugeni: karagenda ariko ni induru amafaranga bampemba mbona ari macye
Papa: None se washatse uko ujya kwiga
Mugeni: Papa ntabonye aho niga ibyerekeye gukora mu ndege nta kindi nziga
Papa: Itegure rero ushake ibyangombwa uzajye kwiga muri Kenya. Umwaka umwe uzaba ushoje uze ushake akazi
Mugeni: Yooo. Papa urakoze cyaneeeeee. Reka mpite iyi nkuru nziza nyibwira Jacques
Papa: Ariko ubanza Jacques umukunda cyane
Mugeni: Papa nkunda jacques. Ni imfura yarahindutse ku buryo bugaragara kandi azi no gukora, mbese ni umuntu ugaragaza impinduka zifatika
Papa: Ko mba numva abantu bose bamuvuga ra. Ubwo koko urahamya ko yahindutse bifatika?
Mugeni: Wenda nta mezi menshi ashize tuziranye ariko mu gihe gito gishize rwose biraboneka ko yahindutse
Ubwo Mugeni yahise ahamagara Jacques, amumenyesha uko gahunda zose zigiye kugenda.
Jacques yabanje kubabara, kumva ko agiye kumara umwaka wose atabona Mugeni ariko nanone gashimishwa nuko azaza yongereye ubumenyi bityo akazabasha gutera imbere
**************
NYUMA Y’AMEZI 2 MUGENI AGIYE
Jacques: Cherie ndumva ngukumbuye byo gupfa pee.
Mugeni: Sha nanjye ni uko ariko nyine urabizi sinzi igihe nzabonekera. Uzakomeza kwihangana nanjye ndi kurwana n’urugamba rwo kwihangana. Si byo mutima?
Jacques: Yego ni byo ariko nyine birananira kuba aho ntakubona hafi yanjye.
Mugeni: Erega amasomo ni umwaka nk’uko nakubwiye ariko bishobora no kumanuka cyangwa bikazamuka bitewe n’uko abarimu baboneka.
Jacques: Ndaza gutereta boss nzamusabe agahushya nze kugusura
Mugeni: Oya si ngombwa cheri. Iyo tike ni nini ntabwo byaba ari byo. Tuzajya tuganira kuri chat uko bishobotse, ubundi nige nawe ukore akazi. Ahubwo se ba bakobwa sinzasanga barakuntwaye ko bakwemera kubi?
Jacques: Humura ntibizabaho. Ngaho reka mbe nkora akazi, ubwo turasubira.
Yarakupye, nuko akomeza akazi ke yakoraga.
Nyuma y’iminsi micye, umunsi umwe yibereye mu kazi nk’uko bisanzwe kuri reception bamuhamagaye bamubwira ko hari umuntu uhari umushaka
Jacques: Ni umugabo cyangwa ni umugore?
Reception: Ni umugabo
Jacques: Mumwereke aho nkorera aze
Reception: yanze ngo ashaka ko umusanga hano

Jacques yahise agenda kureba uwo mugabo umushaka.
Ese uyu mugabo uje gushaka Jacques akanga kujya mu biro bye ni nde?

Biracyaza…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s