Ubuzima

Birashoboka. Agace ka 16

Muhizi: None se Diane we, ngo izo nkuru zimeze gute? Nako numvise na manager abizi ho. Mumbwire rero
Manager: Boss, buriya abakobwa ubanza baba batifuza ko mugenzi wabo yagira ibyiza ageraho. None dore Jacques ni we wari ugiye kubigenderamo
Muhizi: Mwerure mutange inkuru yose. Ese ubundi Jacques umushyitsi wawe ntari burambirwe?
Jacques: Arihangana nubundi yaje antunguye. Nta kibazo kandi ni inshuti yanjye ya hafi. Ni nawe buriya wamfashije kugera kuri Mugeni
Akivuga Mugeni, Diane yahise avuga
Diane: Ehheeee. Ni uwo mukobwa yavugaga Sandrine. Mugeni rwose ni we pee.
Jacques: None se Mugeni ahuriye hehe na byo kandi?
Diane: Nyine Sandrine yatubwiye ngo yari yakwikundiye nuko uza kumubwira ko wifitiye indi nshuti yitwa Mugeni, ngo kandi uwo Mugeni akaba akorana n’umukobwa ubana na Sandrine maze bituma nyine Sandrine akwikuramo. Rero yabitubwiyenibuka ko musaza wanjye hari umukobwa yambwiye ngo wamuteye indobo witwa Mugeni. Nkomeza kubaza Sandrine ambwira neza uwo Mugeni numva neza ni we musaza wanjye yambwiraga. Numvise rero nkurakariye gusa byari ishyari ririmo ubujiji kuko n’ubundi si wowe wabwiye Mugeni kwanga musaza wanjye. Rwose muce inkoni izamba mumbabarire ubu nize irindi somo
Jacques: Rwose jyewe nakubabariye nta kibazo ngufiteho. Ahubwo nari nagize ngo hari ikindi kibazo dufitanye da. None se boss ntiwareka tugakomeza akazi?
Muhizi: Mukomeze akazi ariko mwirinde ubwo bugambo butangiye kwaduka. Ntabwo mbikunda rwose na buhoro. Diane nawe umenye ko Jacques agukijije naho jyewe ubu nari kuba namaze kukwirukana kare. Ngaho mujye mu kazi
Basubiye mu kazi, Diane atekerereza bagenzi be uko bigenze bose bahita batangira gutinya no kubaha Jacques.
Jacques nawe yarimo aganira na Paul, dore ko yari yamurindiriye amutekerereza uko byari bigenze nuko
Paul: Jacques rero ibibaye ntibigutere ubwoba cyangwa ikibazo ahubwo bigushimishe. Ku ruhande rumwe biguteye kubahwa no gutinywa mu kazi kuko babonye ko boss ari ku ruhande rwawe cyane. Bwa kabiri abakozi bose bamenye ko ufite inshuti, ntawe uzaza kukwibambazaho kuko bazajya bagufata nk’umugabo ufite umugore. Bwa gatatu, buriya Sandrine yavuye ku bintu kandi nta nzika agufitiye naho ubundi ni we wari kuba yagushyirishijemo. Ahubwo umunsi wo gutera ivi uzawukorere hano mwana. Bizaryoha cyane
Jacques: Ntera ivi se mfunga imishumi y’inkweto cyangwa ngiye kuramutsa Mariya?
Paul: Ugiye kwambika impeta Mugeni. Ntuzamugira umugore se?
Jacques: Njyewe mu buzima bwanjye sinshobora gutera ivi. Biriya se ni ibiki? Buriya nubwo ngendana n’ibigezweho ariko hari ibyo mba mbona ntacyo bivuze. None se ko mu muco wacu ubundi habaho gufata irembo, iyo warifashe ubwo nyine uba werekanye ko uwo mukobwa uzamushaka. Ahubwo nsetswa n’ukuntu abasore bafata irembo, bagasaba bakanakwa umunsi umwe, bagahita babashyingira bakanabatwikurura uwo munsi. Biriya nibyo binsetsa. Ngo ni imibare, igihe, n’ibindi ntazi. Sha simba mbyumva rwose.
Paul: Sha ntabwo byoroshye byo ariko nanone nyine buriya biterwa n’impamvu nyinshi. None se hagati aho bite byanyu na Mugeni?
Jacques: Sha wa mugani w’ab’iki gihe, she said yes. Ubwo nyine nsabwa gukomeza kumwereka ko mbirimo ngo na we akomeze kunyereka ko turi kumwe
Paul: Ese Jacques urumva koko uzashobora kumara ukwezi, abiri nta gakumi wisengerereye ko nkuzi
Jacques: Sha byose ni ukwiyemeza. Ubu se aka kazi ko nzajya nduhuka umunsi umwe gusa, ubundi urumva nazabibonera umwanya. Gusa byo nyine nanone birakomeye sinkubeshye. Nka kare iyo mba ndi ahandi ubanza nari kongera nkagwa mu mutego wa Sandrine.
Paul: Abanyarwanda bavuga ko umwana atavuka ngo ahite yuzura ingobyi kandi intambara yo kwirwanya ukitsinda irakomeye cyane. Wowe komeza ururwane, ufashijwe no kwiyemeza, no guha agaciro uwo ukunda uzarutsinda. Hagati aho nari nje kuguha felicitation mu kazi kandi courage bizaza. Reka nkamaremo ntahe sinazanywe no kuguhombya mwana.
Basezeranyeho nuko mu minota micye Jacques na we asubira mu biro azana igitabo cyo gusinyamo uko uje mu kazi agishyira kuri reception na we arataha. Mu nzira agenda abona Mugeni aramuhamagaye nuko undi aramwitaba
Mugeni: Cheri wabaye amahoro ko utamvugishije
Jacques: Yego ni amahoro gusa nari nahuye n’akazi kenshi bituma ntabona uko mvuga
Mugeni: Nanakwandikiye kuri whatsapp mbona nturiho
Jacques: Iyo yo uyu munsi sinigeze nanayifungura. Erega ubundi nta mpamvu yo kuyijyaho mu gihe uhuze. Gusa ku kazi ahabaye agashya keretse turi kumwe imbonankubone ni bwo naziguha neza
Mugeni: Sha mbwira winyicisha amatsiko
Jacques: Nyine hari umukozi washatse kumbeshyera baramuvumbura bari bagiye kumwirukana.  Ni story ndende kuko hanajemo Sandrine, nawe uzamo.
Mugeni: Najemo gute se kandi
Jacques: Ese ubundi wazanyuze ku kazi iwacu utashye nkaziguha neza? Kuri phone sinjya menya kubara inkuru neza. Uzaza?
Mugeni: Nzahanyura ejo nta kibazo nje no kuguha felicitation. Paul se yakubwiye ko twabonanye
Jacques: Yabimbwiye yananyuze ku kazi iwacu. Wari waranze kumbwira aho ukorera none nahamenye
Mugeni: Sinigeze mbyanga ariko ahubwo ntiwigeze uhambaza. Ahubwo se ko nari namubujije kuhakubwira
Jacques: Rata ntaho yambwiye singiye kumubeshyera. Gusa ejo nzahakubaza uje ku kazi iwacu. Sibyo?
Mugeni: Nta kibazo. Rero nari nanze kuryama ntakuvugishije jyewe ubu ndi mu buriri, ubwo ni ah’ejo
Jacques: Sawa cherie. Nanjye ndi hafi kugerayo ngahita noga nkabona kuryama. Ku kazi nta kibazo bazajya bangaburira ubu nzajya ndushywa no kwishyura inzu gusa. Ibintu bimeze neza rwose.
Basezeranyeho, nuko ubwo Jacques yageraga mu rugo acyinjira mu nzu, yumva umuntu arakomanze. Yaje kumukingurira, agikuraho urugi atungurwa no gusanga ari…
Ni nde se umutunguye kandi iri joro?

Biracyaza…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s