Ubuzima

Birashoboka. Agace ka 15

Jacques yagiye yibaza ikibaye nuko ubwo yageraga aho boss ari asanga yarakaye cyane
Muhizi: Niko Jacques ibyo utangiye ni ibiki ukigera mu kazi?
Jacques: Ibihe se kandi boss. Ni ukuri ndumva nta kosa nakoze
Muhizi: Komeza uhakane ninzana abatangabuhamya ubwo nibwo wemera
Jacques: Rwose nibaze banshinje ndabyemeye
Muhizi yahise ahamagara Diane araza ahagarara aho ngaho
Muhizi: Diane ngaho mbwira ibyo umaze kumbwira mu kanya kuri terefoni
Diane: Nyine mwatubwiye ko mu kazi nta kunywa inzoga kandi uyu muyobozi mushya ari kuzinywa. Ikindi kandi yarongoreye Sandrine mu biro.
Muhizi: Ibyo uvuga urabizi neza wabihagararaho?
Diane: Cynthia ni we rwose wamushyiriye inzoga na we mwamwibariza. Naho Sandrine we rwose ntawe utabizi ko yagiye mu biro agatindayo kandi yavuyemo ijipo yayambaye ihindurije. Ubwo se yihindurije gute? Si uko yari yayikuyemo?
Muhizi: Jacques urumva ibyo ushinjwa? Urarenza ho iki?
Jacques: Ndumva bintunguye, birambabaje birananshekeje. Abo babiri nabo mwabahamagara bakaza bakabyihamiriza nibwo nabona icyo ndenzaho.
Muhizi yahise ahamagara Cynthia na Sandrine baraza na bo
Muhizi: Niko Cynthia, ni wowe uri guseriva Jacques?
Cynthia: Yego ni jyewe
Muhizi: Ari kunywa iyihe nzoga
Cynthia: Reka nta nzoga ari kunywa. Namuhaye amazi. Inzoga iri kunyobwa n’uwo bari kumwe
Yavuze atyo Diane ahita areba hasi isoni n’ubwoba biramukora.
Muhizi: None se Diane, wamenye ute ko Jacques ari kunywa inzoga
Diane: Nyine ni uko Cynthia yajyanye inzoga n’amazi akavuga ngo babyandike kuri Jacques ni we ubyishyura, numva ko ubwo ashaka kuvanga inzoga n’amazi ngo wenda tutamenya ko yanyoye inzoga kandi twebwe atubuza
Muhizi: Sawa ibyawe ndaza kubicyemura. Ngaho Sandrine nawe mbwira. Mu biro bya Jacques wagiye gukoramo iki
Sandrine: Nari ngiye gufata uniform y’akazi
Muhizi: None ko wasohotsemo ijipo ihindurije? Byanyuze mu zihe nzira ngo uyikuremo uyisubizemo ihindurije?
Sandrine: Yego ko Mana. Icyakora abakozi bawe bagira umunwa. Ubwo se nabyo babitanzemo raporo koko? Jyewe nari nzi ko uniform ari ijipo n’umupira, nkuramo byose ngo nigere ibinkwira, nuko ndebye mu gikarito nsanga ni imipira gusa irimo. Ubwo rero nambaye vuba ijipo ngo hato Jacques atinjira nambaye ubusa, niyo mpamvu nayihindurije. Nta kindi
Muhizi: Muhite mubwira abakozi bose duhurire muri salle y’inama vuba vuba. Nimugende mubabwire. Jacques wowe ba usigaye hano
Bamaze kugenda
Muhizi: Rero mwana wanjye, mu buzima ntabwo abantu bose bazagukunda. Kandi kugira ngo ugire aho ugera bigusaba kurenga inzitiro nyinshi, ibinogo, amahwa n’imitego. Gusa ubutwari ni bwo butuma ugera ku ntsinzi yawe. Buriya Diane ni we wahoze yungirije manager akajya ampa report ya buri cyumweru, nkabimuhembera. Buriya yabonye umukuye ku mbehe agira ishyari ashaka kugusiga icyasha. Ariko nawe nturi shyashya. Ni gute wicara mu kabari mu masaha y’akazi? Ibiro byawe wemerewe kubikoreramo buri kimwe cyose. Ugusuye wahamwakirira, uri umuyobozi bagomba kukuzanira icyo ushaka. No kurya niho uzajya urira. Hanyuma iriya myenda shaka icyumba kidakoreshwa ariho uyishyira, ushaka uniform ajye aza akubwire ugende umukingurire ajyemo ahindure cyangwa yigere umukwira ubundi asohoke ukinge.
Jacques: Boss ni ibiba bishaka kwigisha umuntu no kumuha isomo, ubu ndaribonye rikomeye rwose. Murakoze kandi ku nama mumpaye. None se boss kuki mutumije inama igitaraganya?
Muhizi: Urakimenya mu kanya. Ahubwo tugende
Bahise bajya mu cyumba cy’inama, nuko abakozi bose baricara, boss yicara imbere ari kumwe na Jacques.
Muhizi: Mwa bakozi mwe rero ubanza hari ikintu ntabasobanuriye. Nimubona Jacques mujye mubona jyewe, kuko uretse ko tudahuje amazina ariko umwanzuro wose afata awufata nka njye kandi icyubahiro ngomba ni cyo mugomba kumuha. Diane haguruka
Diane yahise ahaguruka nuko Muhizi arakomeza
Muhizi: Diane tugufitiye ideni ry’amafaranga angahe
Diane: Nta ryo uretse uku kwezi kutaruzura
Muhizi: Mu masezerano y’akazi twumvikanye gute
Diane: Twumvikanye gukora akazi nshinzwe gusa
Muhizi: None nigeze ngushinga gushaka amakuru noneho ukanashaka amakuru y’ibinyoma kuri bagenzi bawe?
Diane: Oya boss. Mumbabarire ntibizongera
Muhizi: Kugirango binabere abandi akabarore nguhagaritse ku kazi. Ndaguha amahitamo abiri. Kuva ku kazi burundu, ukigira gushaka akandi cyangwa se kwemera ugakora ukwezi udahembwa, ugaragaza kwikosora. Wabonekaho kwikosora ukazakomeza akazi, byaboneka ko nta kwikosora ugahemberwa uko kwezi ukigendera. Urahitamo iki
Diane: Ariko boss nanjye natanze amakuru uko nayahawe niba mumpana munahane abayampaye
Muhizi: Wayahawe na nde rero
Diane: Nyine nta we ariko byabonekaga
Muhizi: Ndumva ukomeje gutsimbarara, abandi musubire mu kazi Diane aze mu biro na manager na Jacques.
Basubiye mu biro nuko bagezemo
Muhizi: Jacques ijambo ni iryawe ni wowe ufata umwanzuro wa nyuma
Jacques: Boss Diane simuzi ni ubwa mbere mubonye. Ndacyeka habayeho kwibeshya, agatanga amakuru adafitiye gihamya, rero ku bwanjye kumukura mu kazi ntabwo ari wo muti, ahubwo twamuha imbabazi, akiga na we kubabarira ndetse akaniga kutavuga ibyo atahagazeho. Ni byo byiza
Muhizi: Ntacyo ndenza ku mwanzuro wawe. Diane urabyumva ute
Diane: Ni ukuri murakoze kumbabarira. Nabitewe n’ishyari nta kindi cyabinteye gusa imbabazi mumpaye sinzazipfusha ubusa.
Muhizi: Ishyari se kubera iki?
Manager: Hari amakuru erega Sandrine yaduhaye, ubwo rero wasanga Diane ariyo yatumye atishimira Jacques
Muhizi: Amakuru ameze ate se
Diane: Nyine Sandrine yatubwiye ngo….
Sandrine yababwiye ate se kandi? Ko akomeje kugarukamo cyane

Biracyaza…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s