Ubuzima

Birashoboka. Agace ka 12

Jacques: Yego mbwira nditeguye rwose. Erega iyo wasabye igisubizo cyose uba witeguye kucyakira
Mugeni: Ese koko urankunda cyangwa ushaka gukinisha umutima wanjye?
Jacques: Mugeni, uko iminsi igenda yiyongera ndushaho kugukunda no kukugirira icyizere gihambaye. Imyitwarire yawe, ubuhamya mpabwa n’abandi, byose bituma ndushaho kumva ngukunze kurenza mbere.
Mugeni: Urakoze cyane kunkunda. Waje mu gihe ntari mfite umukunzi, gusa nanone sinaguhisha ko imico yawe ya mbere atari myiza. Niba witeguye kandi wemeye kugaragaza guhinduka, urukundo wansabye ndarukwemereye. Shyira umutima hamwe
Jacques: Ndarota cyangwa ndabonekewe? Mugeni?
Mugeni: Karame mukunzi
Jacques: Urakoze urakoze cyane pee. Nanjye sinzatuma wicuza icyatumye wemera kunkunda. Icyakora iyi minsi ndi mu bisubizo peee. Imana iri kunsekera rwose
Mugeni: Ngaho se mbwira andi makuru meza ufite atari ayo nkubwiye
Jacques: Burya hahandi twahuriye, nyiri akabari ni we wa musaza nakubwiye wasigaye anganiriza. Rero yantumye ibyangombwa ngo ampe akazi. Ubu ndabyukirayo ndebe ko akampa
Mugeni: Waouu. Biranshimishije cheri. Uzayacunge neza sha ntuzayangize. Umenye ko imbere ariho hari ngombwa kurenza ahahise. Sibyo? Ndagusengera ejo bizacemo
Jacques: Sha urakoze cyane. Gusa sinzi akazi ashaka kumpa ako ari ko sinazi ayo nahembwa nkabonye ariko uko azaba angana kose nzayakoresha neza. Nawe uzajya umfasha. Si byo?
Mugeni: Yego ni byo. Gusa nanone mbabayemo gacye
Jacques: Kubera iki se
Mugeni: Sha Sandrine amaze kumbwira nabi cyane. Ariko bibaho nta kundi
Jacques: Mbabarira rwose byose ni jye wabiteye. Ubwo ni uko nari maze kumukurira inzira ku murima. Cherie, nagize ahahise habi, narivuruguse bishoboka ariko nshaka kugaragaza impinduka zishoboka rwose. Sinifuza gukomeza kuba iciro ry’imigani. Nshaka kuba umugabo uhamye, bose bashima. Nshaka kuzakubera inshuti nyayo, umujyanama, umuvandimwe, intangarugero. Ngusezeranyije kukubera imfura n’inyangamugayo
Mugeni: Urakoze cyane. Byakabaye byiza ayo magambo uyambwiye nkureba. Ndumva byaba biryoshye kurutaho. Ufite amagambo arema umuntu umutima. Nizere ko avuye ku mutima. Ngaho rero ryama uruhuke nanjye reka ndyame ejo ni akazi. Ubwo uzambwira icyavuyemo nuva guhura na wa musaza. Ndagukunda
Yahise akupa, Jacques ahita abyuka akubita amavi hasi ashimira Imana kubera ibyo iri kumukorera. Jacques wari ruharwa mu kwiruka inyuma y’amajipo, yahise guhera uwo munsi yiyemeza kuba umusore ntangarugero, ushimwa na bose kandi ufite icyerekezo.
Bucyeye yagiye kureba Muhizi ndetse asanga ahari amutegereje.
Muhizi: Jacques ubanza uzi kubahiriza igihe. Cyangwa sha ni uko ushaka akazi
Jacques: Oya boss. Jyewe isaha nyubaha kurenza ikindi cyose. Burya umunota umwe utakaje uba uhombye cyangwa uhombeje byinshi. Ibyo mwantumye nari nabizanye
Muhizi: Buriya erega si byo nari nkeneye cyane. Ikizami cya mbere wagitsinze. Kubahiriza igihe, no kuzirikana gahunda. Akazi nshaka kuguha karakomeye ariko karanoroshye. Bishobora kuba ari ubwa mbere ugiye kugakora, karagusaba ubupfura n’igitsure
Jacques: None se muhise mukampa boss?
Muhizi: Narabikubwiye, nkunda umuntu ugaragaza impinduka kandi wishimira gukora. Rero nshaka ko ari wowe uzaba ushinzwe abakozi ba hano bose. Ubundi nabyikoreraga ariko kubera akazi kenshi mba mfite ugasanga manager w’akabari ni we ubyirukamo byose hakaba rimwe na rimwe abica akazi, abanyereza amafaranga… Wowe rero nta kindi uzaba ushinzwe. Ni ukumenya buri mukozi n’igice akoreramo, amasaha agerera ku kazi, umunsi aruhuka, uko ahembwa, hagira ibibazo bivuka mu kazi ukabicyemura ibyo ubona bikurenze ukabimbwira.
Jacques: Ako kazi nzagakora nishimye kandi mbasezeranyije umusaruro ugaragara. Ineza mungiriye nzayibitura gukora neza cyane
Muhizi: Ikindi umukozi uzajya akora ikosa gatatu wemerewe kumusezerera ukamusimbuza gusa ukabanza kubimbwira. Kandi hano itegeko rya mbere tugenderaho nta mukozi wemerewe kunywa inzoga mu masaha y’akazi. Nawe rirakureba kandi. Hasigaye ikijyanye n’umushahara. Urifuza kujya uhembwa angahe?
Jacques: Boss, umushahara muzangenera wose nzawishimira kuko mvuze uwo nshaka nakubira ku bukene bwanjye nkifuza
Muhizi: Oya mbwira ayo wifuza nta kibazo
Jacques: Nkurikije aho ntaha, ayo nishyura inzu, n’ibindi nakifuza kujya mpembwa ibihumbi 200.
Muhizi: Yayayaaaaa. Ayo ni yo witaga menshi? Uzi ko manager w’akabari gusa ahembwa 250? urumva se wayobora umuntu ukurusha umushahara? Uzatangirira ku bihumbi 300 azagenda yiyongera buri mezi 6 bigendeye ku myitwarire yawe n’impinduka n’umusaruro ugaragaza mu kazi. Ngaho ngwino nkwereke ibice byose bigize hano, nkwereke ahanditse abakozi bose, ubwo ndaje bose mbabwire ko saa munani hari inama mbakwereke. Humura hano ku manywa abakozi turabagaburira, nimugoroba nabwo abakora ijoro turabagaburira. Ubwo wowe uzajya ufata amafunguro yose hano kuko uzajya uva hano abakora nimugoroba bamaze kuhagera bose, unarebye niba nta kibazo gihari.
Jacques: Murakoze cyane.
Bahise batambagira hose dore ko hari na hanini. Hari igice cy’akabari, kikagira abakozi bacyo. Hakaba igice cy’igikoni cyagiraga na cyo abakozi bacyo, gusa bagakorana bya hafi n’abakora mu kabari. Hakaba n’igice cy’amacumbi, ni cyo cyagiraga abakozi bacye ariko na cyo kikagira abakiriya benshi.
Bamaze kuhatambagira bakomeje bamwereka ibindi bikenewe kugera ubwo amasaha y’inama yageraga. Inama imaze guterana umuyobozi afata ijambo ati:
Muhizi: Bakozi rero nshaka kuba nduhutse gato murabona ko ndi gusaza. Nifuje kubereka uzaba ansigariyeho mu gucunga abakozi mwese, umuhungu wanjye Jacques Muhire. Niyigire imbere abaramutse.
Jacques yaraje imbere arabasuhuza ariko ubwo yararanganyaga amaso mu bakozi bose bari aho yahise yikanga ndetse agira ubwoba.
Uyu mukozi se uteye ubwoba Jacques ni nde?

Biracyaza…. 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s