Ubuzima

Birashoboka. Agace ka 11


Dusubire mu kabari
Muhizi na Jacques bakomeje ikiganiro
Muhizi: None se sha uriya mukobwa waba umuzi neza cyangwa ni bimwe byanyu byo guhurira mu tubyiniro
Jacques: Yewe buriya nta n’ukwezi turamarana. Twahuriye mu bukwe yambariye umugeni nanjye nabutashye bisanzwe. Ni aho byahereye urebye
Muhizi: None se umufiteho uwuhe mugambi
Jacques: Rero sinabiguhisha numvaga nshaka uwo kuryoshya ubuzima gusa. Ariko iminsi tumaranye yatumye mpindura ibitekerezo
Muhizi: Gute se musore wanjye
Jacques: Uko aganira, ibitekerezo afite, imyitwarire, urukundo n’ubumuntu afite bituma numva nkwiye gushaka ubushobozi nkamugira umugore
Muhizi: Icyo gitekerezo ni icya kigabo ndagushyigikiye ariko si icyo guhubukira. Biragusaba kubanza kumenyana na we bihagije. Ukamenya imiryango ye, akamenya iyawe. Ukamenya byinshi bimwerekeye. Umuntu muzasangira ubuzima ushigaje kuri iyi si ni umuntu uba ukwiye kwiga neza ukamumenya. Ntuzakururwe n’amagambo asize akunyu ngo ukururwe n’ikimero, indoro n’inseko. Umugabo ushaka kubaka ntarongora imiterere arongora imitekerereze. Umugore nyawe si wawundi bose barangarira ngo arasharamye mu mvugo y’ubu, ahubwo ni wawundi bose batangarira bati umugabo we yarahiriwe. Rero ukwezi kumwe cyangwa abiri ntibiba bihagije ngo umenye koko ko uwo muntu azavamo umugore nyawe.
Jacques: Inama zawe ndazikunze. Nawe ndagukunze rwose ubaye aho data atari. Nzahora nkugana ngusaba inama z’ingirakamaro nk’izi rwose
Muhizi: Ariko rero umenye ko nawe usabwa guhinduka naho ubundi uzaba uvomera mu rutete
Jacques: Gute se kandi papa
Muhizi: Ubwo se uzi ko utazwi? Wabaye iciro ry’imigani basigaye bakwita mucutse umumpe. Ngo abakobwa benshi ni wowe ubambura ubusugi. Ibyo rero niba ari ukuri usabwe kwisubiraho. Umenye ko gusambana n’umuhisi n’umugenzi nta bugabo burimo, nta nyungu na nkeya irimo ahubwo kwicuza, indwara, abana, kuba iciro ry’imigani ni wo musaruro wabyo.
Jacques: Abantu baba bakabya na bo. Gusa guhinduka nanjye nabyiyemeje kandi nizeye ko nzabigeraho. Biragoye kwirwanya ukitsinda ariko buhoro buhoro bizakunda. Noneho nyemerera ngende ndabona amasaha amaze gukura
Muhizi: Akira business card nunkenera ujye umpamagara. Ese ubundi sha ufite akazi ko twaganiriye byinshi
Jacques: Ubu nta kazi gafatika mfite ni ibiraka ndi gutera
Muhizi: Noneho ejo uzazane ibyangombwa byawe ndebe niba wujuje ibisabwa nguhe akazi. Nkunda abasore bashaka kugaragaza impinduka kandi bakaba bakunda gukora. Ureke abasongarere birirwa basaba igihumbi nk’aho bacitse amaboko
Jacques: Ni ukuri murakoze cyane pee. Ejo nzabahamagara mbere yo kuza.
Jacques yaratashye nuko ageze mu rugo agarama ku buriri atangira kwibaza byinshi. Yibaza ku mateka ye yahise, yibaza ku myitwarire yifuza, yibaza ku rukundo rwe na Mugeni niba ruzakomera cyangwa se bizanga. Yanibajije kuri Muhizi umwemereye akazi, yibaza ukuntu burya amahirwe y’umuntu aza mu kanya gato. Akiri kwibaza ibyo yabonye nimero atazi imuhamagaye.
Jacques: Allo
Utazwi: Uraho cheri ese ko utakimvugisha
Jacques: Ni nde se ko ntakumenye
Utazwi: Ni Sando
Jacques: Sando wa hehe
Sandrine: Eheee. Mwibagirwa vuba cyakora. Ubu se umuntu mwaryamanye aka kanya unyibagiwe ute
Jacques: Eeeeh. Sha uziko ariko utari warigeze umbwira izina ryawe
Sandrine: ku buryo se wibagirwa n’ijwi
Jacques: Reka ibyo byihorere ntacyo bimaze. Amakuru se
Sandrine: Ni meza. Ko ngukumbuye se ejo wazaje kunsura. Nzagutekera inyama dore mvuye kuzigura
Jacques: Sha wari ukoze ariko ejo simpari
Sandrine: Ngaho basi ngwino nonaha nguhe agaturu kamwe ndumva ndi kwaka
Jacques: Umva rero nkubwire wa ndaya we. Nari nakwihoreye ariko umenye ko izo nzira ntakizigenderamo. Ayo watwaye uzajyane ayo nta yandi yanjye uzabona, ubu nafashe ingamba sinshaka kubabaza cherie wanjye Mugeni. Nagize Imana arabyihanganira rero sinshaka kongera kwita mu bibazo
Yahise amukupa araryama.
Sandrine acyumva ayo magambo yananiwe kubyihanganira aba ahamagaye Mugeni
Mugeni: Allo
Sandrine: Ese wa nshinzi we unshakaho iki?
Mugeni: Ngo iki? Ubwo ntiwibeshye nimero Sando?
Sandrine: Nibeshya se nibeshya iki? Si wowe Mugeni se hari undi?
Mugeni: Yego ni we. None se kuki unyita inshinzi nagutwaye iki ubwo
Sandrine: Ngo ntacyo wantwaye? Ese kuki mwumva mwabaho neza abandi bakabaho nabi? Ubonye nifatishirije umusore uzajya ankemurira utubazo, uba uribambaje uti va kuri iriya ndaya unyikundire. Ubwo se iyo ushaka uwawe niba nawe ushaka kuza mu mwuga?
Mugeni: Mbabarira udatuma vuga nabi Sandrine. Nta mugabo wawe natwaye nta n’uwo nzatwara sinamuzi. Ikindi ujye uvuga uziga unamenye uwo ubwira. Ayo magambo atameshe uri guhuragura nta na kimwe yakemura. Urumva neza
Sandrine: Keretse ahari ngufashe. Nibwo wabona ko kuri Sandrine nta mikino. Niba uzi ubwenge ureke Jacques si we musore wenyine. Cyangwa se uzarebe uko intama zambarwa. Uranyumva neza wa ndaya nshyashya we
Mugeni: Ubwo rero wabonye aguhaye udufaranga uratunara ngo ubonye aho uzajya ukura ayo utavunikiye. Singusetse ntazakubyara. Ndeka nikomereze ibyo nakoraga kuko rwose umwanya w’ibyo uvuga ntawo mfite. Simbunza innyo nka we jyewe ndakoresha amaboko yanjye nkabona icyo nshaka. Ubonye ibyo wirata cyakora.
Yahise akupa aranamubloka. Atangira kwibaza iherezo ry’ibi byose, yibaza niba koko akwiye kubwira uyu musore yego cyangwa akwiye kumuhakanira. Yahise yegera nyina ngo amugishe inama ya nyuma. Yabanje kumucira ku mayange ibyo Sandrine amaze kumubwira nuko aramubaza
Mugeni: None se mama, nyuma y’ibyo papa yambwiye, nyuma y’iterabwoba rya Sandrine, ubu koko uyu musore muhe urukundo cyangwa ndumwime?
Mama: Aho ndaguha inama ebyiri wowe urifatira umwanzuro. Iya mbere. Niba ushaka kubaka, niba ushaka kuzagira urugo rwiza, uzirinde kugendera ku byo abantu bavuga cyangwa bakubwira. Abantu bavuga ibyo bashaka bitewe n’inyungu cyangwa impamvu zabo, wowe ntuzabiteho ngo ugendere ku myumvire yabo. Gusa ntibizakubuze kugisha inama mu gihe byakuyobeye. Inama ya kabiri nshaka kukubwira ko umutimanama wawe niba uguhatira gukunda umuntu uzamukunde, niba kandi ukubwiye kumureka uzamureke. Rero baza umutima wawe, uwubaze niba ukwiye kwemerera urukundo Jacques cyangwa niba ukwiye kumuhakanira.
Mugeni: Mama inama umpaye ni nziza ariko ndumva atari zo nashakaga. Gusa ndarara muhaye igisubizo uko byamera kose.
Bakomeje guteka, bihiye bararya bararyama. Ageze mu buriri Mugeni yabanje gusenga asaba Imana kuyobora intekerezo ze n’ubwenge bwe, kandi ikamuha guhitamo igikwiye. Amaze gusenga yafashe terefoni ahamagara Jacques ngo amuhe igisubizo.
Jacques yari asinziriye nuko terefoni isonnye ashigukira hejuru azi ko ari Sandrine wongeye guhamagara ayifata ashaka kuyikupa arebye abona ni Mugeni uhamagaye.
Jacques: Allo bite se
Mugeni: Ni byiza. Nari nibagiwe kukubwira ko nageze mu rugo amahoro
Jacques: Nanjye natinzeyo hahise haza umusaza tuba tuganira.
Mugeni: Ndumva nshaka kuguha igisubizo rero. Ese witeguye kucyakira?
Ngaho re. Igisubizo se babanje guteguza ubu kimeze gute bahu?

Biracyaza….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s