Ubuzima

Birashoboka. Agace ka 10

Mama Mugeni: Ariko se papa Mugeni, ko washaririye mugabo mwiza wabaye iki
Papa Mugeni: Utanyongerera umujinywa se ahubwo. Ese Mugeni ko utaza kwicara hano ngo unsobanurire
Mugeni: papa sinkubeshye ndumva unteye ubwoba. Kandi umutima wanjye nta cyo uri kunshinja
Papa Mugeni: Nshaka unsobanurire ukuntu usigaye wirirwa mu tubari n’abasore mwirenza za mushikake. Niko urumva umaze kubyimba ku buryo wakiha amategeko mu rugo rwanjye ukirirwa mu tubari nk’aho uri mu marushanwa
Mugeni: Ariko papa
Papa Mugeni: Ceceka aho se nyine. Dore agatsinda aho mubera iyo mutangiye kwigomeka no kwigira ibyigenge ntimwongera kubaha. Ndavuga nawe ukavuga ukanca mu ijambo nta soni? Banshakire inkoni ahubwo. Ntugirengo ni uko wameze amabere sha nta rutugu rukura ngo rusumbe ijosi
Mama Mugeni: Ariko se wacururutse ukareka umwana akagusobanurira. Ubundi se wamubonye mu kahe kabari
Papa Mugeni: Iyo mba byibuze namwiboneye. Nari kumukubitira imbere y’abo basore. Ni uwababonye wampaye amakuru
Mugeni ubwo yari yicaye yumiwe yabuze ayo acira n’ayo amira. Yibaza umuntu wahaye amakuru se, akibaza n’inyungu yaba afite mu kumubeshyera
Mama Mugeni: None se ko wumva ari uwabikubwiye nyine, waretse uwabikoze akisobanura. Erega uburakari bwinshi mugabo mwiza ntabwo bukemura ibibazo ahubwo bwabyongera. Mugeni, sobanurira so aho uvuye
Mugeni: Papa, ni byo koko mvuye mu kabari ariko..
Papa Mugeni: geza aho se nyine. Ntiwumva ko abyiyemereye? Icyo ni icyivugo cy’umwari w’I Rwanda koko? Ngo uvuye mu kabari erega ukabivuga n’amatama yombi. Nta soni koko?
Mama Mugeni: Ariko yagiye abanje kunyaka uruhushya
Papa Mugeni: Nabivuze nyine afite umwoshya akanamurengera. Ubwo ubutaha uzamubwira anarareyo ubwo utangiye kumushumuriza insoresore. Ese sha uwo musore mwari kumwe wowe yaguhaye angahe?
Mugeni: Angahe se y’iki kandi? Ese papa waretse nkagusobanurira koko
Papa: Ngaho vumvura dore ko havuze data
Mugeni (afite agahinda n’ikiniga): Umusore yambwiye ko ashaka ko tuganira. Mubwira ko niba ataba iwabo ubwo yashaka ahandi twahurira tukaganira, kuko na we yari yambwiye ko ataza hano ataramenya niba ibyo ambwira ndi bubyakire. Mbere yo kujyayo nabanje kubibwira mama nanamusaba uruhushya kuko wowe ntiwari uhari. Izo mushikaki uvuga nta n’izo nariye uwabikubwiye yambeshyeye. Nanyoye soda imwe gusa ambwira ibyo yashakaga kumbwira ndaza. Ni ibyo nta kindi
Papa: yashakaga kukubwira iki se kiriya kirara cy’umusore
Mama Mugeni: None se uramuzi kandi uwo bari kumwe?
Papa: Ceceka si wowe mbajije reka abanze ansubize
Mugeni: Yambwiraga ko ankunda kandi ashaka ko twaba inshuti
Papa Mugeni yahise yikorera amaboko, arimyoza nuko ati: Babonye ntangiye gukena none batangiye kunsuzugura koko? Uriya musore ubwo ngo ashaka kumbera umukwe rero? Ikirara cyirirwa mu tubari? Uriya yazakumarira iki ubwo?
Mama Mugeni: Ese ko wanze kumbwira, uriya musore uvuga uramuzi?
Papa Mugeni: Simuzi sinkanamumenye. Ntazanangerere mu rugo nkiriho. Agasuzuguro gusa
Mugeni: Nyamara papa wasanga bakubwiye ibitari byo
Papa Mugeni: Reka mbabwire uko byagenze neza. Nari nibereye hano mbona nimero ntazi irampamagaye ati ngwino nguhe amakuru. Musanga aho yambwiye kumusanga. Aba ambajije niba umukobwa wanjye yiriwe hano nti muheruka mu gitondo. Ati rero kurikiranira hafi dore yashudikanye n’umusore w’ikirara wamaze abakobwa ba rubanda abashukisha udufaranga abasambanya. Ndabihakana nti uwanjye ibyo ntiyabikora. Ati mu kanya bari bari mu kabari kandi ako kabari kanagira ibyumba baryamamo bakishyura. Ndamubwira nti umukobwa wanjye ubanza utamuzi, na we anshushanyiriza neza uko yari yambaye, uko areshya, mbese byose arambwira. Ngarutse nje kureba niba Mugeni yageze hano cyangwa se akiri kumwe n’icyo kirara. None koko imyenda bambwiye ni yo nsanze yambaye. Urumva ari hehe bambeshye ubwo?
Mama Mugeni: Ntibakubeshye nyine ahubwo wowe wahise utekereza byinshi. Wahise wibaza koko ko byamaze kubaho banaryamanye nicyo cyaguteye umujinya. Rero humura umwana wacu twamureze neza iryo kosa ntaryo yakoze ntazanarikora ndamwizeye.
Mugeni: Papa, impungenge ufite ndazumva kandi birananshimishije kuba umpangayikira ukanankangara. Ariko nanone ntabwo twagendera ku byo abantu bavuga cyangwa ngo tugendere ku mateka yahise ku muntu ngo tumucire urubanza. Niba yaranabikoraga cyangwa akibikora, wenda azahinduka cyangwa se nadahinduka nabyo birashoboka ubwo niho nzafata umwanzuro. N’ubundi ntabwo urwo rukundo narumwemereye, yarunsabye mubwira ko ngiye kubitekerezaho
Papa Mugeni: Icyakora amahirwe ugize ni uko ngusanze hano watashye. Iyo mpagutanga sinzi ko wari kurwinjiramo. Ndumva naniwe reka mbe nirambitse nimuhisha mumbyutse. Gusa umenye ko uwo musore wawe afite amateka mabi, ubwo wibaze nawe uko abantu bazajya bakubona nibakubonana na we
Yahise abasiga yigira kuryama, nuko basigara baganira, Mugeni na nyina
Mugeni: Mbega umujinya wa papa. Ni ubwa mbere mubonye yabishe kariya kageni pee.
Mama Mugeni: Mwana wanjye buriya nta mubyeyi udahangayikishwa n’umwana we cyane cyane uw’umukobwa iyo akiri mu rugo. Nubwo iyo bibaye ubyakira ariko kubona umwana wawe atwaye inda atarashaka umugabo birashavuza ndetse bikanatera ikibazo ku buryo bukomeye. Ni zo mpungenge so afite nanjye kandi ndazifite.
Mugeni: Mama, inama zanyu mwampaye nzigenderaho umunsi ku wundi kandi rwose humura nkwijeje kutazagukoza isoni
Mama Mugeni: urabona ko mba nkurengera imbere ya so, uramenye utazatuma na njye antakariza icyizere mwana wanjye. Ese ubundi ko uwo musore ntamuzi, iwabo ni hehe?
Mugeni: Yewe nanjye sindamenya neza aho akomoka gusa hano ahaba kubera akazi ni ko yambwiye, niyo mpamvu ahaba wenyine. Haracyari igihe ubwo nzamubaza neza amakuru yose amwerekeye. Ahubwo se mama hari ikintu wumva cy’ingenzi nazamubaza ngo ntazacyibagirwa?
Mama Mugeni: Uzamenye neza ibisekuru bye. Burya niba mufite urukundo rugamije kubana muba mukwiye kumenyana neza kuko iyo basanze mufitanye isano kugeza ku gisekuru cya 7 ntabwo mu murenge bashobora kubasezeranya.
Mugeni: Ubwo se twaba duhuriye hehe koko. Nta sano dufitanye
Mama Mugeni: abantu bagiye batatana mwana wanjye ntiwamenya. Buriya ibisekuru 7 ni byinshi ntiwahakana ko mutagirana isano. Uzamubaze wowe gusa.
Mugeni: Yego mama nzamubaza nta kibazo. Duteke vuba rero papa buriya ubwo avuze ngo tumukangure nibishya buriya arashonje. Ni ubwa mbere numvise abivuga
Mama: Sha ndumva umaze gukura mwana wa. Burya abagabo benshi ntibakunda kwerekana ko bashonje niyo ashonje agira inzira abivugamo azimiza. Ngaho cana gaz niyo igira vuba duteke amakaroni n’umuceri
Mugeni: Oya mama. Papa akunda amakaroni n’igitoki ndabizi ni byo ndi buteke.
Bagiye mu byo guteka, nuko bari mu gikoni terefoni ya Mugeni irasona. Arebye asanga ni Sandrine umuhamagaye
Mugeni: Allo
Sandrine: Ese wa nshinzi we unshakaho iki?
Mugeni: Ngo iki? Ubwo ntiwibeshye nimero Sando?
Birabe ari ukwibeshya da. None se kandi Sandrine we bapfuye iki?

Biracyaza….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s