Ubuzima

Birashoboka. Agace ka 9


Tugaruke kuri Jacques

Jacques yavuye guherekeza Mugeni, nuko araza arongera aricara akomeza kwinywera ariko ubona ibitekerezo bye biri kure cyaneeeee.
Nuko aho yari yicaye agiye kubona abona umugabo atazi araje amwicaye iruhande, abanza kumusuhuza
Jacques: Uraho
Umugabo: Uraho neza. Uri wenyine se twicarane
Jacques: Yego ndi jyenyine ariko ndumva ntameze neza ntabwo nzi niba nakuganiriza. Niba ushaka uwo muganira wareba ahandi.
Umugabo: Oya nta kibazo reka nicare hano. Jyewe nitwa Muhizi. Wowe se witwa nde
Jacques: Nitwa Jacques jyewe
Muhizi: None se koko uri wenyine
Jacques: Yego ndi jyenyine. Uwo twahoze turi kumwe amaze kugenda
Muhizi: Ahubwo da. Nakubonye umuherekeje erega
Jacques: Noneho wari uri gushaka amakuru
Muhizi: Oya mwana wa. Urambona ndi mukuru. Numvaga nkeneye kukuganiriza kuko nakomeje kukwitegereza aho umariye kuva kumuherekeza mbona wamanjiriwe. Aguteye indobo se
Jacques: Oya siko biri ahubwo arantunguye wa mubyeyi we. Sinari nzi ko abakobwa nka we bakibaho pee
Muhizi: Uti bigenze bite?
Jacques: Ibaze umukobwa nahaye tike akayanga. Ibaze ko mbizi ko anywa inzoga ariko akaba yayanze akanywa soda. Ibaze isaha atahiye kandi ntabuze icyo mugurira cyangwa icyo muha. Urumva wowe bidatangaje
Muhizi: Oya ndumva ari ibisanzwe ibyo ariko. Ahubwo ibidasanzwe ni uko yari kubyemera. Erega kuba ibintu bikorwa na benshi si byo bituma biba byo.
Jacques: Noneho uramushyigikiye?
Muhizi: Ndamushyigikiye cyane. Abakobwa benshi iyi minsi bavuga ko babuze abagabo ariko mbona nabo babigiramo uruhare. Niba ugikundana n’umusore ugashaka atangire akemure ibibazo byawe byose. Guhera ku nzara kugeza ku myenda. Amavuta sinakubwira. Umusore na we kuko abona ko umukesha byose ahita abyuririraho uko agasonga kamufashe agahamagara akakwicundaguraho ugataha akaguha iyo tike ya bitanu, ukwezi abiri umwaka akaguhaga akakujugunya agafata undi. None se urumva uwo musore azirirwa ashaka umugore kandi afite umumara irari igihe cyose abishakiye?
Jacques: None se ubwo ari wowe umukobwa yagutura ikibazo cyose afite wagikemura ntakemure ibyawe? Ni bo batwiteza. Ariko nanone abagore barabuze muzehe we
Muhizi: Nyine abagore bazima nk’uvuye hano barabuze. Kandi abasore aho mubera babi muraganira byose. Umukobwa ava iwawe ugahamagara mugenzi wawe uti uzi ko burya ari ubwiza bw’inyuma gusa naho mu buriri ari igihama. Cyangwa uti uzi ko arekura amavangingo ukibaza niba akiri inkumi cyangwa ari umugore…
Ibyo byose mubaganiraho bituma umukobwa asigara ari iciro ry’imigani atabizi. Agategereza umugabo agaheba. Iri terambere na ryo rero rirushaho kubizambya. Umwari akifata akajya mu kabyiniro agataha zibika. Kandi ubwo niko asimburanya amayoga anywa, uwamusohokanye uyu munsi si we uzamusohokana ejo, yemwe ab’ubu we. Nzaba mbarirwa ahazaza hanyu.
Jacques: None se ubwo muzehe we tuzashaka abo dukuye hehe?
Muhizi: None se urumva umwanzuro udahari? Niba ushaka umugore nyawe wo gushyira mu rugo ntuzamukura aho ubonye hose uzitonda umushake. Gusa nutaba umwana nabonye ufite umwari utamwaye
Jacques: Noneho waturebaga kuva kare
Muhizi: Ubundi se nyiri aka kabari uramuzi?
Jacques: Oya simuzi ni n’ubwa mbere mpageze. Ni nde se
Muhizi: ni jyewe. Mwaje mbareba, barabakira ndeba, byose nabikurikiraniraga hafi. Nanjye natunguwe n’uburyo nabonaga muganira mwari mumeze nk’abari mu nama ikomeye cyane. Nta gusomana bya hato na hato njya mbonana abandi, nta dushyi cyangwa udutwenge, mwari mutuje ingingo ku ngingo. Byanejeje mwana wa.
Jacques: Ibaze ko uriya mukobwa nshaka gutereta yansanze ahantu nagiye gukemura akabazo ariko akaba atabitinzeho. Yambwiye ngo ntiyabangamira ibyo nkunda, ngo gusa we sinzamuyobereho niba nshaka urukundo. Ubu se koko azambwira yego?
Muhizi: Kukubwira yego cyangwa oya bizaterwa nawe. Niba hari uko akuzi biragusaba kumwereka ko wahindutse.
Jacques: Na we ni ko yambwiye rwose wagirango watwumvaga
Muhizi: Imyaka mfite inyemerera kumenya igikwiye mwana wa. Buriya rwose namushimye nubwo ntamuzi. Ahubwo nibaguhe akandi gacupa ndakishyura nta kibazo
Jacques: Ko numvaga nshaka gutaha se
Muhizi: Oya nta wanga icupa. Nshaka kuba nguha inama za kigabo zizagufasha kumwegukana.
Tugaruke kwa Mugeni na nyina
Mama: Niko se muko, uwo musore wawe ati iki?
Mugeni: mama yambwiye ko ashaka ko dukundana ariko ndumva bitandimo rwose
Mama: None kuki utamuhakaniye se niba bitakurimo
Mugeni: mama si uko ntamukunze. Rwose afite igihagararo cyiza ariko simuzi bihagije, gacye muziho na ko ni kabi rwose. Ubu byanyobeye
Mama: Kabi gute se kandi?
Mugeni: Ntuzi ya ndaya isigaye ikora mu kabari yitwa Sandrine?
Mama: Ndamuzi Sandrine. Itabi rye nari nararirambiwe sijye wabonye yimuka.
Mugeni: Ibaze ko nagiye aho asigaye abana na wa mukobwa dukorana ngasanga Jacques niho avuye
Mama: Ibyo se hari ikibazo kirimo
Mugeni: Uhm. Mama nawe rwose. None se uruva yari aje kwicara gusa. Yanamusigiye ibihumbi 30 byose rero kandi ngo niho bakimenyana. Urumva uwo yazaba umugabo nyawe koko
Mama: rero mwana wanjye nta muntu utagiraikosa n’umwe. None se ubimubajijeho yakubwiye iki
Mugeni: yahise asiba nimero ye anambwira ko atazasubira
Mama: Umva rero mwana wanjye, ni byiza kuba byibuze wamenye intege nke ze aho ziri mukimenyana. None se ko ab’ubu kwifata byabananiye, buriya ni uko nta kundi yari kubigenza. Simushyigikiye kuko kugura igitsina si umuco ariko nanone ntawe udashobora guhinduka burya. Niba wumva witeguye gukundana na we nanjye nkwemereye ibitekerezo n’inama nyazo bizamufasha guhinduka
Mugeni: Mama baravuga ngo akabaye icwende ntikoga nyamara. Buriya koko…
Mama: Mugeni nguhe urugero. Uribuka inkoni za so za buri munsi yankubitaga yasinze? Uribuka igicuku cye yatahaga atongana adandabirana? Uribuka uko mwumvaga atashye mukihinda muhunga? Ubu se urabona bimeze bite? Ntiyabaye cira aha nikubite? Ubona atarabaye umubyeyi nyawe tujya inama? Ubu ntituba tukiri ba mbunze akarago? Ariko reba twarubatse kubera yahindutse tukumvikana. Byose nta kindi ni uko nagiye mwereka ingaruka mbi z’ibyo arimo, ntatonganye cyangwa ngo mvuge nabi. Ubu urabibona ko turi intangarugero
Mugeni: icyakora umpaye urugero nyarwo rwose pee. Ese ubundi wa mugani papa ari hehe?
Mama: Yasohotse yitaba terefoni sinzi aho yerekeje. Ariko buriya ari hafi mu baturanyi cyangwa kuri butike. Nsigaye mbona atagifatira icupa kure
Babaye bakimuvuga babona arinjiye gusa yinjira yabishe ubona afite umujinya w’umuranduranzuzi
Papa: Eeeeeeh. Agatsinda ni wowe umwoshya. Ngize Imana ndahagusanze sha. Ngwino hano vuba unsobanurire uko wigize. Mbega kurumbirwa n’imfura weee.
Mugeni (atitira): Nagize nte se papa?
Papa: Icara hano se vuba umbwire ibyawe. Eeeeeeeh iri joro urambona ariko. Ni nyoko wakoroye sha. Jyewe sinkina urabizi.
Mugeni se kandi yakoze iki gituma papa aza yarakaye?
Ya makuru se bamubwiye ni ayahe

Biracyaza…..

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s