Ubuzima

Birashoboka. Agace ka 8

Mugeni: Nako ndumva bitandeba reka mbyihorere
Jacques: Oya sha mbaza. Buriya kubaza bitera kumenya ni ukuri kandi byongera ubusabane hagati y’abantu kuko bituma mumenyana bihagije
Mugeni: Nshaka kukubaza ibyerekeye hahantu nagusanze ugahita ugenda
Jacques: Sha burya ni ukuri wasanze namaze gusezera. Nari ngiye pee
Mugeni: None se kuki wambonye ugahita usubira mu nzu nk’aho wari unyikanze
Jacques: Nari ngiye kubaza niba ari ho uje?
Mugeni: Wari ugiye kubibaza nde se
Jacques: Wa mukobwa
Mugeni: Nyine yitwa nde, ko wambwiye ko musanzwe muziranye
Jacques: Ugirango se izina rye ndanaryibuka
Mugeni: None se kuri terefoni ye wanditseho iki
Jacques: Sha urebye ibyo nanditseho waseka
Mugeni: Mbwira nta kibazo
Jacques: Nanditseho seriveri
Mugeni: Ngaho mbwiza ukuri. Niba ushaka ko dukundana koko wige kuvugisha ukuri kuko urukundo rwubakiye ku kinyoma ntiruramba. Kandi nanone guhisha umuntu hari igihe amenya ukuri akagutakariza icyizere
Jacques: Nyine urabona, ..

Yagiye kuvuga terefoni ya Mugeni iba irasonnye, arebye abona ni nyina umuhamagaye

Mugeni: Allo mama
Mama: Bite se mwana wa? Ni amahoro?
Mugeni: Ni amahoro mama. Ko umpamagaye se bite
Mama: Nashakaga kumenya niba ari amahoro mwana wa. Erega niba ugiye ahantu uba ukwiye kumbwira niba wagezeyo amahoro, wajya no kuza ukambwira ko utashye. Nari mpangayitse rwose
Mugeni: Mama humura ni amahoro turacyari kuganira ndataha mu kanya ndakubwira noneho ninjya kuza.
Mama: Ngaho reka ndeke kubarogoya.
Mugeni: Urakoze mama

Akimara gukupa, Jacques yahise ahindura ikiganiro

Jacques: Eeeh sha mama wawe aragukunda. Uzi ko aba ahangayitse nk’aho ukiri umwana muto
Mugeni: Ariko ni zo nshingano z’umubyeyi ku mwana. Aba akwiye kumenya aho umwana we ari akanamenya ibyo arimo
Jacques: Benshi ntibabyitaho. Hari n’abarara aho bagiye iwabo batanahazi.
Mugeni: Ese buriya ikibazo twagishyira kuri nde
Jacques: Jye mbona ikibazo kiri ku babyeyi bataye inshingano zabo. None se ni gute umwana ava mu rugo akagenda akagaruka ntubaze aho yari ari cyangwa ibyo yari arimo
Mugeni: Nyamara hari abana bananirana wibyirengagiza na byo. Ababyeyi bakigisha bagahana ariko bigafata ubusa rwose. Rero ku bwanjye twabirebera ku mpande zombi. Ababyeyi bateshuka ku nshingano zabo zo kurera ndetse n’abana batumvira bagatwarwa n’ibigezweho n’amarari anyuranye. Tukiri aho ariko ntiwanshubije uko wamenyanye na Sandrine
Jacques: Sandrine wa hehe se kandi noneho
Mugeni: Eeeh navugaga seriveri. Mbwira muri macye ikibahuza, ibyo mupanga, mbese uko muziranye ntazavaho ngwa mu ruzi ndwita ikiziba
Jacques: Rero nubundi narafashwe singiye kwirarira. Twagiye muri kariya kabari akoramo, murebye numva mugiriye irari. Musaba nimero nuko nza kumuvugisha anyemerera kumusura, ni bwo wahansangaga ntashye. Gusa naramusuye gusa nta kindi twakoze
Mugeni: Buriya rero wasanga mumaze icyumweru mumenyanye jyewe tukaba tumaze imyaka. Urumva ko nshobora kuba nzi byinshi utazi. None ko utangiye kumbeshya tukimenyana se nitumara igihe bizacura iki
Jacques: Mugeni, mbabarira ntibizongera
Mugeni: Ibiki bitazongera se kandi
Jacques: Kukubeshya
Mugeni: ngaho mbwiza ukuri rero
Jacques: Sha nagiyeyo ngo turyamane ariko rwose nta rundi rukundo mfitanye na we. Na nimero ye ndahita nyisiba rwose

Yahise ako kanya afata terefoni, asiba nimero ya Sandrine Seriveri yereka Mugeni ko abirangije.

Mugeni: Ibyo ukoze burya rero nta kinini bivuze. Ubu se ko uyisibye iwawe wenda ngo unshimishe, uyisibye muri terefoni ye? Cyangwa kuki wumva ko wagendera ku byifuzo byanjye. Sinje kubatandukanya kuko ufite icyo wamushakagaho, urakibona kandi ntaho cyagiye. Gusa nagirango ngutangarize ko niba nanjye aribyo wanyifuzagaho waba wayobye inzira. Wakomezanya na ba Sandrine ugakomeza kujya ubahonga ayakaguteje imbere ukayagura igitsina. Ubwo ariko urumva bitagayitse koko? Mbabarira si ukugutonganya ariko sinjya mpisha ukuri. Rwose kumva ngo wahaye umuntu amafaranga runaka ngo muryamane nta busirimu burimo.
Jacques: Wambabariye koko ko numvise. Nakwemereye ko bitazasubira. Naho wowe rwose si byo ngushakaho. Ndashaka urukundo nyarwo. Kandi burya nta muntu utahinduka. Ubwo rero, ahahise hanjye guhera uyu munsi tuhirengagize, nanjye ahawe nubwo ntahazi cyane sinifuza no kuhamenya cyane. Ahubwo niba unyemereye urukundo nkwemereye kuzakwereka impinduka rwose mu buryo bwose bushoboka
Mugeni: Urukundo sinarukwemerera aka kanya kuko si ibintu bahubukira ngo bahite bemera. Uko wafashe akanya ko kubyigaho, nanjye ngiye kubitekerezaho, gusa igisubizo nzaguha ni wowe uzakigiramo uruhare runini. Ntawundi musore ubu mfite dukundana, gusa sinakubeshya ngo haje undi nabura kumwumva ubundi ngashyira ku munzani. Ubwo rero ni yo mpamvu nanjye ntakubuza gukundana n’uwo ushaka, gukora ibyo ushaka ariko uzirikana ahazaza hawe, kuko niho h’ingenzi.
Hagati aho rero amasaha ngomba gutahiraho ndabona ageze, niba bitakubangamiye nagenda
Jacques: Ko wihuse se koko hakiri byinshi byo kuganira
Mugeni: Birahari kandi bizakomeza kubaho ariko nanone ntitwabivuga umunsi umwe. Kandi nanone ntitwahera hano kuko no mu rugo baba badukeneye
Jacques: Nta kibazo noneho reka nkugeze ku muhanda ufate moto

Barageye bagera ku muhanda, nuko aramusezera amupfumbatisha inoti ya 5000.

Mugeni: Aya mafaranga se?
Jacques: Ni tike nguhaye
Mugeni: Oya si ngombwa tike ndayifitiye. Kandi se bwo naba ntayifite, ahantu moto igendera 500 ni gute wampa 5000?
Jacques: Icyakora sinabura kukubwira ko uri kuntungura.

Mugeni yamushubije amafaranga ye mu kinyabupfura, yurira moto arataha.

Ageze mu rugo, nyina yamusamiye hejuru ubona ko hari amakuru menshi ashaka, muri macye wabonaga afite amashyushyu n’amatsiko.

Mama: Ubonye uvayo amahoro se mwana wa
Mugeni: Ni amahoro mama. Ariko ubanza utanyizera?
Mama: Si ukutakwizera mwana wanjye ahubwo mba nguhangayikiye. Ngaho ncira ku mayange rero

Twasize Mugeni ari kubwira nyina iby’urugendo rwe, ubwo ku rundi ruhande papa wa Mugeni yakiriye terefoni atazi aho iturutse

Papa: Allo
Utazwi: Allo. Ni Buregeya tuvugana?
Papa: Yego ni we
Utazwi: Ngufitiye amakuru ushaka wanshaka nkayakubwira
Papa: Amakuru bwoko ki? Ko utanyibwiye se wowe?
Utazwi: Niba ushaka amakuru nsanga hano ku kabari kari ahahoze umurenge.
Papa: None se..

Yahise akupa.

Uyu se we kandi ni muntu ki? Ayo makuru se azanye yo ni ayahe?

Ntuzacikwe ubutaha

Biracyaza….

2 comments

  1. Uyu mwana Mugeni rwose yakabereye ikitegererezo bashiki bacu kubw'imyitwarire ye myiza.Ngaho tebutsa n'akandi dukomeze twisomere dore war'umaze iminsi waraturyamishije!

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s