Inkuru ndende

Birashoboka. Agace ka 3

Mugeni yabonye abantu bose bari kumureba nuko yanga gukoza isoni Jacques maze arahaguruka batangira kubyinana. Gusa wabonaga Mugeni bimeze nk’ibitamurimo neza ariko uko injyana zisukiranyaga zihindurwa na we yagendaga arushaho kujyana n’injyana, arirekura arawubyina karahava.

 

Jacques na we yaboneyeho uburyo bwo kumuganiriza uko bagendaga babyinana

 

Jacques: Sha wakoze kunkura mu isoni

Mugeni: Wasanze nararezwe naho ubundi burya mba nabaguteje. Kuza gusaba umuntu mutaziranye kubyinana koko

Jacques: Ariko turaziranye nyamara nubwo wanyimye akanimero

Mugeni: Sinayikwimye ahubwo wayisabye nabi. Nuyisaba neza nzayiguha nta kibazo

Jacques: Ubwo se neza ni gute basi ngo ari bwo buryo nzayisabamo

Mugeni: Ushaka nimero cyangwa ushaka nyirayo

Jacques: Nshaka nyirayo

Mugeni: Sawa rero nyine uzanshake. Hagati  aho burije ndashaka gutaha. Iyi nirangira ndahita ngenda.

Jacques: Kuguherekeza biremewe se?

Mugeni: Oya si ngombwa kuko ndahita mfata moto

 

Indirimbo irangiye Mugeni yegereye bagenzi be nuko arabasezera asohoka ahabereye ubukwe arataha.

 

Ubwo yageraga iwabo yasanze nyina ari koga ibirenge hanze nuko aramusuhuza

 

Mugeni: Mwiriwe mama

Mama: Uraho. Ese muko izi saha ubu ni ryari?

Mugeni: Mama mbabarira naryohewe n’ibirori isaha zirancika ariko sinzabyongera

Mama: Ngaho injira ubisobanurire so

Mugeni: Papa yaje se mama?

Mama: Ataza se urabona saa tatu zitageze? Icyakora ugiye kunanira wa mukobwa we. Ndabona ahasigaye uzajya utaha bugiye gucya nka ba baturanyi

Mugeni: Mama wambabariye koko? Sinagiye wampaye uruhushya

Mama: Injira se ibyo winjira ureke niyogere.

 

Mugeni yarinjiye nuko asanga se aricaye ari gusoma ikinyamakuru

 

Papa: Ese sha ni wowe bazajya bategereza mbere yo kuryama? Icara aho umbwire aho uvuye vuba

Mugeni: Papa mvuye mu bukwe bwa Sonia na Laurent.

Papa: Niko se muko, ubwo bukwe bwarangiye saa kumi n’ebyiri, andi masaha wari uri gukora ubwawe mbimenye?

Mugeni: Oya papa. Nari nambariye umugeni erega. Rero twagiye gutaha nuko bashyiramo umuziki maze

Papa: maze maze iki? Erega wabonye umeze amabere ugirango ubonye uburenganzira bwo kurenga ku mabwiriza? Niko nakubwiye ngo iki ubwo warangizaga amashuri?

Mugeni: Warambwiye ngo sinkarenze saa moya ntarataha.

Papa: Komeza

Mugeni: Ngo ninzirenza njye nguma aho nari ndi ndareyo

Papa: None ubu ni ryari

Mugeni: Ni saa tatu

Papa: Igisubizo gikurikiraho ntucyumva ubwo se?

Mugeni: Papa mbabarira ntibizasubira. Si ubwa mbere koko bibayeho?

Papa: Ngaho nzanira amazi noge ariko ntuzasubire gutinda gutaha

Mugeni: Urakoze papa

Papa: Mugeni mwana wanjye si ukukubuza uburenganzira bwawe ariko ni ukukurinda. Ni uburyo bwo kukurinda kuzigomeka ku mugabo wawe. Umenyereye gutaha igicuku nkiriho, ntiwazataha kare uri aho ntari. Ibaze rero umugabo avuye gufata agacupa agasanga nturataha? Waba urushenye

Mugeni: Papa urakoze kandi inama zawe ndazumvira pee. None se nzane amazi akonje cyangwa mbanze nyashyushye

Papa: Banza uyashyushye niriwe ngenda n’amaguru nabize ibyuya byinshi kandi amazi ashyushye niyo meza akuraho ibyuya ku buryo bworoshye kurenza akonje.

 

Mugeni yaragiye ashyushya amazi ya papa nuko arayazana papa ajya koga, mama na we yari amaze gutegura ameza maze bajya kurya. Bamaze kurya papa arabaganiriza, ubwo ni Mugeni, mama n’abandi bavandimwe ba Mugeni

 

Papa: Bana banjye rero buriya ntimugatwarwe n’iraha ngo mwibagirwe umuco muniyambike ibara. Kwidagadura ni byiza natwe twarabikoze ariko twe si nkamwe. Twe twabikoraga ari ku manywa ku buryo saa kumi n’ebyiri twabaga tuvuye muri spectacles tugataha. None ubu ngo ikirori wa mugani wanyu gitangira ahubwo mu gicuku. Simbyanze niyo si turimo ariko mukagira uko mwitwara. Ese ndibutse niko Mugeni watangiye kunywa inzoga ryari

Mugeni: Papa none se njyewe nywa inzoga

Papa: Urambeshya turaba babiri. Ufite imyaka ingahe

Mugeni: Mfite 22

Papa: Ubu rero wemerewe kwifatira imyanzuro. Kuki nkubaza ukambeshya nk’aho ndi bukubuze?

Mugeni: Papa ni ukuri ntabwo nzinywa pee. Uretse rimwe nagiye mu isabukuru ngasomaho

Papa: Uwasomyeho rimwe na kabiri yasomaho. Uzirinde kurenza urugero kandi wirinde ko zatuma ukora ibyo utari wateguye naho ubundi sinakubuza niba zikuryohera.

 

Bakomeje gutarama kugeza bagiye kuryama.

 

Bucyeye

 

Bucyeye tugaruke mu rugo kwa Sonia na Laurent. Birumvikana abageni baba bari gusurwa, ndetse mu babasuye harimo Paul kandi ikimugenza turakizi.

 

Paul: Ese mwamenye ko ikigega mwanshinze ntagikamije? Ubu ntabwo nabicira ingwagasi y’icyaka?

Laurent: Utabeshye se wasaguye?

Paul: Reka nze ahubwo nkwereke

 

Yahise agenda aterura ikaziye yuzuye inzoga arazana atereka aho muri salon. Aba apfunduye irya mbere arihereza Laurent

 

Paul: Ndabizi ejo ntiwabonye uko ugasoma wari wigize umwana mwiza

Laurent: Iyo menya ahubwo ko zihari se simba naraye nishe icyaka

Sonia: Ngaho se nanjye nzanira agasoda

Paul: nta soda nasigaza rwose ubanza abatashye ubukwe bari abarokore bose. Ariko wafata ka byeri gacye burya ngo kanakora umuti

 

Bahise bose basekera rimwe nuko bakomeza kuganira. Kera kabaye Paul aratangira

 

Paul: Ese mu bakobwa bari bakwambariye umwe wirabura wari ufite imisatsi ifungiye hejuru yitwa nde?

Sonia: Yitwa Mugeni. Nabonye nijoro baraye bamubyinishije wa

Paul: Nonese wandwanyeho ukampa akanimero ke mwana ukamfasha mu isi ko mu ijuru nzirwariza

Sonia: Urayishakira iki ubwo ko mbizi udakunda ibikara

Paul: Uriya mutype wamubyinishije ngo yemeye. Ni we wantumye kuyimusabira

Sonia: Kuki se atayimwiyakiye

Paul: Wahora n’iki ko yamucitse atayimwatse.

Sonia: Nzanira terefoni hariya icaginze nziguhe nta kibazo. Uriya mukobwa aritonda namubera umuranga

 

Paul amaze kuzibona yahise azoherereza Jacques atazuyaje undi na we akizibona yahise ahamagara ngo amenye niba koko ari Mugeni

 

Mugeni: Allo

Jacques: Allo. Amakuru Mugeni

Mugeni: ni meza. Ko ntakumenye se

Jacques: Waraye ugeze mu rugo amahoro se?

Mugeni: Ese uri nde ko utanyibwira ukambaza byinshi?

Jacques: Umva ijwi urahita umenya

Mugeni: Yewe niba wanze kunyibwira wirirweho

 

Yahise amukupa arambika terefoni hasi.

Gusa wa muntu arongera arahamagara.

 

Ese aritaba cyangwa aramwihorera?

Ari wowe wakitaba ra cyangwa wamureka?

 

Biracyaza…

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s