Inkuru ndende

Birashoboka. Agace ka 2

Mugeni: Ariko se Jacques ubundi wambwiye icyo ushaka udaciye ku ruhande koko? Nawe se wampamagaye nkagirango urananzi nkwitaba ntazuyaje, nyuma uti nshaka ko tumenyana none uti mpa nimero? Singusuzuguye ariko ndumva aka atari ko kanya ko kuziguha. Niduhura bwa kabiri nzaziguha nta kibazo

Jacques: Ubu se tuzahurira hehe koko? Ngaho mbwira aho uba ntacyo

Mugeni: Nyine nk’uko twahuye utari uzi ko uri bumbone ni ko n’ikindi gihe bizabaho nta wamenya.

 

Ayo magambo yayamubwiye ahindukira asanga bagenzi be aho bari bari. Jacques na we yahise asubira kuri Paul.

 

 

Uwera: Niko Mugeni ko wari watwibese mwana? Nawe rero ntiworoshye

Mugeni: Wahora n’iki ko ari umusore wari unyiyongoje

Grace: Uti yari akwiyongoje? Gute se

Mugeni: Nyine arambwiye ngo yashakaga ko tumenyana, aba ambajije iwacu aba ambajije nimero. Mbese iyo ntinda gato yari no gutera ivi ahari akanafata irembo

 

Bose bahise basekera rimwe, nuko Jacques aho ari agenda arahindukira abona ko ari we bavugagaho. Isoni n’ibimwaro zaramukoze ariko yihagararaho akomeza kugenda, abandi na bo bikomereza ikiganiro

 

Grace: Nizere ko utabaye umwana ukaba wahise umubwira byose

Mugeni: Sha burya unzi igice. Ntabwo banyendera aho bamboneye jyewe uzabaririze

Uwera: Ni akazi kawe uzahera ku ishyiga jya ubura gufata neza abasore. Umenye ko abagabo babuze

Mugeni: Iyo myumvire jyewe sinyifite. Abasore baravuga ngo abagore barabuze, natwe tuti abagabo barabuze, ubwo se amaherezo azaba ayahe? Ariko se ko babuze, ubukwe twatashye bari basanzwe babana?

Grace: Oya ntibabanaga ariko nanone ntiwabyitwaza ngo ubure kwitwara neza.

Mugeni: Nyamara ushobora gusanga imyitwarire y’abakobwa bamwe ari yo ituma abagabo babura

Uwera: Kagire inkuru rero

Mugeni: None se ndabeshya? Kuki kera wasangaga umusore agira imyaka 25 agashaka umugore none ubu hakaba hari n’abageza 40 bakiri ingaragu?

Grace: None se ushaka kuvuga ko tubigiramo uruhare?

Uwera: reka ahubwo abasore b’ubu barakubiswe nta kintu baba bibereyeho. Erega kera babaga ari abahinzi. Yaba yejeje, yujuje inzu agakurikizaho umugore. None ubu ararangiza kaminuza akabura akazi, akabaho atabasha no kwigurira isogisi, ubwo se yabona ibyo gutungisha urugo?

Mugeni: Muramponda sinoga nyamara. Ibyo simbihakana ariko nanone urundi ruhande mbona tubigiramo uruhare. Ngaho ibaze ukundanye n’umusore, buri weekend urajya kumusura ukarara ugataha kuwa mbere. Bikaba gutyo umwaka ugashira undi ugataha. Harya ubwo yaba agushaka ngo ataba iki? N’ubundi ko ibituma umugabo ashaka umugore aba abibona buri uko abishaka, bamwe bakaba baranabyaye bifitiye abana, ubwo ari wowe waba ugishatse?

Grace: Ariko ntabwo ari twese nyamara. Ubu se wowe uheruka kuraza umusore ryari? None ko utarabona umugabo?

Mugeni: Inkono ihira igihe ariko. Buriya igihe cyanjye nikigera umugabo nzamubona. Kwanza si urubanza kari agatekerezo.

Uwera: Jyewe nyibwirira uko ubirangije n’uriya musore

Mugeni: Arambwiye ngo yitwa Muhire Jacques nanjye nti nitwa Mugeni. Ati nifuzaga ko tumenyana, nti izina rirahagije. Nuko ati mpa nimero ndayimwima. Ngiye ati basi mbwira aho utaha mubwira ko icyo atari cyo gihe cyo kumfatirana.

Grace: Sha jyewe nari guhita nyimuha.

Mugeni: Si nguriya hirya genda uyimuhe.

 

Barasetse bakomeza kuganira. Jacques na we aba ageze kuri Paul nuko Paul warimo akurikirana ibintu yibereye ku ruhande aba aramwanjamye

 

Paul: None se mwana Jacques akanimero barakaguhaye

Jacques: Ubanza uri bwa bwoko butera umwaku wowe tu. Ntahanye izina gusa

Paul: Na ryo ushimire ko uribwiwe niba atanakubeshye. None se amanimero ko utayahawe

Jacques: Sha sinzi kabisa. Ngiye rero kugusaba akantu ahubwo kandi ntumpakanire

Paul: Niba nagashobora sinakwima serivise urabizi

Jacques: Uyu mugeni se muraziranye cyangwa ni ubwa mbere wari umubonye

Paul: Ndamuzi ariko ntituziranye bihambaye. Wagirango se

Jacques: Nyine ejo nagirango tuzaze gusura abageni, noneho umunsabire nimero y’uriya mukobwa

Paul: Urabizi se ko ayifite?

Jacques: None se ni gute bamwambarira bataziranye. Mbabarira nzagura agacupa ariko uriya mukobwa ntancike

Paul: Ese uwo ufite ubundi we yagiye hehe? Mwarashwanye?

Jacques: Umuhanga wo kurya arya ihene aziritse indi sha. None se uwo mfite nzi gute niba atazancika cyangwa bitazarangira kandi ko ntabaho ntafite inshuti rwose

Paul: OK. Ibyo na byo. Si nimero gusa ushaka? Ejo rwose zizarara zikugezeho byizere

Jacques: Ni cyo ngukundira wowe. Ngaho nzanira akandi gacupa na njye nice iyi ngwagasi y’icyaka.

 

Ubwo Paul yagiye kumuzanira icyo kunywa, yanyuze kuri ba bakobwa aho bari arabasuhuza

 

Paul: Icyo kunywa se cyabagezeho cyangwa babarangaranye?

Grace: Jyewe nakamaze ako bampaye unzaniye akandi nakemera.

Uwera: Sha jyewe keretse umpaye ibiryo ndisonzeye

Mugeni: Jyewe unsigire nimero yawe

 

Yavuze gutyo bahita baseka

Paul: Nyamara nayiguha nkareba icyo uyimaza

Mugeni: Oya nivugiraga. Gusa ubwire uriya mugenzi wawe uti si uko abandi babigenza.

Paul: yagutwaye iki se

Mugeni: umuntu muba mutaranavugana n’iminota 20 ati nimero koko? Uzamwigishe uko batereta niba wowe ubizi

Uwera: Ariko Mugeni ubanza warariye amavubi si gusa

Mugeni: Oya abasore bakwiye gusirimuka. Ntibakumve ko bagomba guhita basaba nimero. Uzi ko umuhanga mushobora no kumarana ukwezi atarakubaza nimero yawe cyangwa izina. Ari kukwigaho gusa.

 

Paul yahise yikomereza ajya aho yajyaga abakobwa na bo basigara baganira

 

Grace: Munyibukije umusore wigeze kunsanga ku kazi ariko twamaze amezi 6 tuvugana ansanze ku kazi gusa. Gusa izina ryo nari ndizi na we azi iryanjye. Nuko ya mezi ashize ni bwo yahise ansaba nimero kuko ngo yashakaga ko tuzaganira bitari ku kazi. Sha nazimuhaye nihuse cyane

Mugeni: Uwo na njye nazimuha rwose ntazuyaje kuko aba akweretse kwihangana, ikinyabupfura, gahunda, mbese aba azi ubwenge.

 

Bakiganira MC yafashe ijambo

 

MC: Ndacyeka abageni bacu ubu bamaze guhindura ibyo bari bambaye kuko nk’uko mubizi umugeni wacu agomba kudufungurira piste tukibyinira. Abagifite icyaka abasore bacu barakomeza babanyanyagizemo icyo kunywa. Mwebwe gusa ntimugire irungu kuko DJ mpuzamahanga ku muziki ndamwizera. Reka musabe ashyiremo indirimbo abageni basohoke bayibyina nibageramo hano hagati baduhe uburenganzira na twe tubyine.

 

DJ yahise ashyiramo indirimbo nziza “Tout au fond des oceans” nuko abageni basohoka bayibyina buhoro buhoro

 

Umuziki warakomeje nuko abantu bose batangira kunyeganyega. Jacques aho yicaye yakomeje kwibaza niba abyina cyangwa abyihorera ariko bashyizemo indirimbo akunda aba avuye mu byimbo ayibyina buhoro buhoro yegera aho ba bakobwa barimo babyinira dore ko bari bakomeje kubyina bonyine. Uko abasatira Mugeni yahise abibona nuko ahita ajya kwiyicarira kuko yacyetse ko ari we aje kureba.

 

Jacques ntiyacitse intege yakomeje amusatira nuko abyina amuri imbere amurembuza ngo babyinane.

 

Abarimo babyina bose bahise bakoma amashyi bajyanisha n’injyana, bategereje ko Mugeni ahaguruka akabyina.

 

 

Ese arahaguruka abyine cyangwa aramukoza isoni?

 

Biracyaza…

Ngiyo indirimbo yafunguye piste

https://www.youtube.com/watch?v=YSTF5PHpO5U

2 comments

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s