Inkuru ndende

Ese urankunda? Agace ka 10

Nasomye iyo SMS nibaza byinshi mu mutima:

 

Numara kurya unyitabe mu biro unsobanurire niba ako ari ko kazi waje gukora

 

Nahise nibaza byinshi mu mutima. Uku ni ugufuha se cyangwa ni ukunkanga? Umuntu sindanamwemerera urukundo none atangiye no kuntegeka uko nitwara mu kiruhuko? Narayisomye mpita numva no kurya birananiye, gusa sinahita mpaguruka ku meza ntegereza abandi tuhavira rimwe.

 

Twahagaze mu kibuga tuganira bisanzwe, twibwirana, abanyereka ko banyishimiye, abo ubona ko batabyitayeho, abampobera n’abampereza umukono gusa, mbese byari imvange. Gusa nabonaga Kamana yanyishimiye cyane, ariko sinabitindaho nkomeza kubifata nk’ibisanzwe.

 

Saa munani zuzuye nahise nitaba umuyobozi mu biro bye nuko ngezeyo ndicara ngo numve icyo ambwira

 

-Niko Faina, akazi kakuzanye hano urakazi?

-Yego ndakazi

-None se ibyo utangiye kwigira ni ibiki?

-Nakoze irihe kosa se nyakubahwa

-Niba ari ukurya ni ukurya si uguteretana. Uranyumva neza?

-None se naterese nde kandi

-Ubwo se sinabonaga ibyo murimo wowe na Kamana? Mwongoreranaga ibiki mbese? Nako ngo agiye kuguterera ivi

-Ibyo se kandi wabikuye hehe

-Erega akarenze umunwa karushya ihamagara. Nta kibera hano ngo mbure kukimenya. Niba ushaka kuramba mu kazi, uhindure uko witwara. Ngaho jya mu kazi kawe

-Murakoze

 

Nasohotse mu biro bye nibaza ibitangiye kumbaho. Burya bwose afitemo abamuha amakuru y’akabereye hano kose n’akahavugiwe? Mbega umuyobozi. Uyu rero unamubeshye ibitakozwe kubera yizera ko umuha amakuru y’ukuri yahita abishyira mu bikorwa. Si uku abakozi bamwe babigenderamo ugasanga ku kazi arirukanywe ku maherere kubera uwamuteranyije amubeshyera? None se iri fuha koko amaherezo yaryo bite?

 

Nicaye mu biro nikomereza akazi nkomeza kureba imibare nahawe niba koko ihuye neza ahantu hose, no kureba ibijyanye n’imishahara n’imisoro dore ko nagombaga kubitunganya hakiri kare.

 

Gusa nkiri mu kazi nagiye kubona mbona Kamana arampamagaye, mbanza kwanga kumwitaba ariko yongeye bwa kabiri nditaba

-Allo

-Bite kontabu? Ya ntebe se bayisige irangi cyangwa basigeho vernis gusa?

-Nibasigeho vernis gusa birahagije.

-Bwira umuyobozi rero ko wayikoresheje atazabaza aho imbaho zagiye mbona n’umusumari umwe uwubuze yawukuryoza

-Sawa reka mubwire

 

Nahise nkupa njya mu biro kwa CEO

 

-Boss hari intebe nasabye ko bakora itambitse

-Intebe se yo kugira gute

-Aho nakirira abantu hari intebe imwe gusa kandi hari igihe haza abarenze umwe bahuje ikibazo ubwo bagahagarara kandi si byiza rwose

-Aho watekereje neza cyane. Uwagira umugore yagira wowe rwose. Nibayizana umbwire nze ndebe uko imeze

-Murakoze

 

Narahindukiye ngo nsohoke, nkimutera umugongo ahita ampagarika ndahagarara arahaguruka aransatira arampindukiza

-Faina, uri mwiza. Ndagukunda kandi ushaka nawe wanyemerera urukundo nzi ko utazabyicuza

-Ndacyabitekerezaho nzagusubiza vuba kandi nzi ko uzanyurwa rwose.

 

Nasohotse mu biro bye umutima udihagura, rimwe nkumva nishimye ubundi nkumva amakenga. Rwose gukundana n’umuyobozi wanjye numvaga ari ikibazo gikomeye cyane.

 

Narakoze bigeza nimugoroba intebe batarayizana, nuko isaha yo gutaha igeze ndasohoka ngo ntahe, umuyobozi ambwira gutahana imfunguzo z’ibiro n’izifungura ku muryango rusange kuko hari igihe najya ntaha nyuma cyangwa nkaza mbere y’abandi.

Azimpereza arongera arambwira ati

-Ndifuza ko ikindi gihe nazaguhereza imfunguzo z’inzu yanjye, kuko iz’umutima wanjye zo namaze kuziguha ntegereje ko winjira ukishimira ibyiza biguhishiwe biwurimo.

-Urakoze

-Wihangane kuba nakubwiye nabi kare, umutima ukunda burya ntiwihishira rwose numvaga nafushye bidasanzwe.

-Nta kibazo kandi no kumpana mungira inama ntabwo byambabaza

-Ubu se urataha ute? Ufite tike?

-Yego ndayifite ndatega bus

-Nugira ikibazo cy’amafaranga uzandike usaba avance ubone uko ukora akazi neza. Biremewe hano iyo ugitangira akazi

-Murakoze nzabikora. Muramuke rero

 

Nasohotse ku kazi nerekeza kuri bus. Ndi kugenda numva umuntu ampamagara mpindukiye nsanga ni Kamana uri kwihuta ansanga ndahagarara ndamurinda

-Wari unsize we. Ese utega iya hehe?

-Ndatega ijya Nyabugogo kuko ntaha I Gikondo

-Ndumva turi bujyane kuko jyewe ntaha ku Gisozi ndaviramo ku Kinamba

-Tugende rero mbona nimugoroba abagenzi baba ari benshi

-Ese boss musanzwe muziranye

-Oya ntabwo nsanzwe muzi. Kubera iki ubimbajije

-Yari yaravuze ngo ntazongera guha akazi k’ubucungamutungo umuntu atazi neza

-Buriya ni Imana yamuvugiyemo ngo anyihere akazi gusa

-Ni byo rwose. Hanyuma se Faina andi makuru sha

-Sha ni meza akazi natangiye kukamenyera

-Uzamenyera nta bigoye birimo. Ikigoye si akazi ahubwo ni abakozi

-Abakozi gute se

-Yewe ni birebire wa mukobwa we. Mbona amaherezo nzasezera jyewe cyangwa se ngasaba bakampindurira bashaka bakamanura mu ntera. Uzi ibirego nakira baregana, bashinjana, mbese ni birebire

-None se bitwaye iki ibyo byose

-Biragitwaye kuko gukoresha abantu batumvikana kiba ari ikibazo gikomeye. Bishobora gutuma akazi katagenda neza

-Hanyuma se wowe boss mupfana iki

-Nta na kimwe ahubwo yiganye na papa wanjye

-Ngo iki? Buriya arakubyaye?

-Cyane rwose. Ubona se wowe adakuze

-None se kuki adashaka umugore koko

-Buriya uwe ntaraboneka wenda cyangwa afite izindi mpamvu. Sinjya ninjira mu bitandeba jyewe

-Mbibajije bisanzwe. Koko se nta mugore afite

-Ese kuki ushaka kubimenya cyane?

-Mbwira yewe nifitiye amatsiko. Umuntu ungana na so ni gute yaba adafite umugore koko

-Mbabarira iyo ngingo tuyiveho ntacyo itugezaho rwose. Ihute ahubwo dore bus igiye kuzura itadusiga

 

Twarihuse tujya muri bus, nuko ngeze Rwandex mvamo ndataha na we akomeza agana iwabo.

 

Ngeze mu rugo nakuyemo ibyo nagiye nambaye mpita njya mu gikoni gutegura ibya nijoro kuko mama atari yagatashye. Aho atahiye turaganira:

 

-Bite se mwana wa. Akazi bite?

-Byagenze neza natangiye kumenyera

-Umuyobozi wawe se bite

-Yewe aracyakomeje kunsaba urukundo rwose

-Ariko niba ubona nta kibazo ushaka warumwemerera. Erega uwo uzaheka ntumwisha urume. Kandi niba bitakurimo nabwo umuhakanire hakiri kare

-Ariko uzi ukuntu akuze ibaze ko dukorana n’umwana w’umuntu biganye

-Ariko bashobora kwigana batangana. Kandi umugabo ukuze ni we mwiza

-Ntuzi ukuntu bafuha wowe. Ubundi ngo umugabo mwiza ni ukurusha imyaka itageze ku icumi. Iyo irenze icumi aba ari wa mugabo ugufata nk’umwana, mutajya inama, mbese ashaka kukuyobora. Ngaho ibaze iyo akurushije 20 kuzamura

-Reka iyo ni imyumvire ntabwo ari ukuri rwose. Ariko mfite igitekerezo

-Ikihe se mama

-Ndumva twashaka umukozi wo mu rugo ubwo wabonye akazi

-Nibyo rwose arakenewe umukozi.

-Ubwo ndaza kubaza abandi bagore bandangire. Kuva mu kazi ukajya mu gikoni bituma utaruhuka. Kandi na benewanyu bari hafi kuza mu biruhuko

 

Nagiye kuryama ariko ntararyama mbanza kureba kuri terefoni nsanga Kamana yanyandikiye kuri WhatsApp,

 

-Sorry nari mu gikoni. Bite se

-Ni byiza. Nageze mu rugo amahoro. Nawe se

-Yego nanjye ni amahoro

-Nishimiye kumenyana nawe. Uri umukobwa buri musore wese yakifuza

-Gabanya ibikabyo nawe se. Ndi uwuhe se

-Ntawimenya erega. Gusa jyewe nabibonye.

-Urakoze basi

-Ngusabe akantu se

-Niba ngafite ntacyo

-Ufite iyihe gahunda se ejo uvuye ku kazi

-Sha ntayo uretse gutaha nkajya mu gikoni

-Hari ikibazo se nguherekeje nkakagufasha?

-Ngo iki?

 

 

Kamana se kandi we ibi ni ibiki atangiye? Ese Faina arabyemera cyangwa arahakana?

 

Biracyaza…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s