Inkuru ndende

Ese urankunda? Agace ka 9

-Sha nkurikije igihe maze mubona nta mugore afite

-Umaze igihe kingana gute se umubona?

-hashize imyaka isaga itanu rwose muzi. Kandi nta makuru y’umugore ndumva bamuvugaho. Mbona atajya anambara impeta

-Impeta se ubundi wowe ntiwayigura ukayambara? Ndumva impeta ntacyo ivuze rwose. Ahubwo nawe ndumva nta makuru afatika ufite

-None se ubundi nkubaze. Abaye bwo afite umugore wabuzwa n’iki kumukunda?

-Cyoo. Ubuharike mu Rwanda ntibwemewe muko

-Ni nde se uvuze ubuharike. Ariko jya ureka kwigira injiji ujijutse. Gukundana no kubana ni ibintu bitandukanye

-None ubwo aramutse ari umugabo naba mukunda ngo bimarire iki?

-Sha uwanshyira aho uri ngo urebe. Mu myaka itanu naba mfite shato yanjye, ngenda mu modoka itikoraho rwose.

-Ni wowe kiryabarezi bavuze tu

-Ninshake. Umva nyine ko kirya abarezi. Ubwo nyine azanye uburezi namukosora yazana amenyo nkayakura. Nkareba amaherezo ye

-Izo ngamba zawe sinazibasha rwose jyewe. Nzarya ducye ndyame kare.

-Umva mwana singushutse ngo uziyandarike kugira ubone amaronko ariko umuntu nagusaba urukundo, ukabona urwo rukundo rufite cash inyuma yarwo ntuzazuyaze kurwakira.

-Sha nyine nanjye uko ari kunyitwaraho biri gutuma mukunda ariko sindafata umwanzuro wo kumubwira yego. Nzabitwara bucye ndebe aho bigana rwose. Kuko mbona akuze cyane arambyaye rwose pee

-Imyaka ni imibare yewe. Ubu se niyo yaba afite 50 byababuza gukundana

-Sha uzi ko ubwo yaba ankubye kabiri ubu? Ibaze rero umuntu umbyaye. Harya ubwo yamfata nk’umugore cyangwa nk’umwana we

-Ese umugore gute? Banza ukunde umuntu, ubugore buzaza nyuma cyangwa ntibunaze. Injiji gusa

-Uramponda sinoga rwose sinzatatira igihango sinzateshuka ku mpanuro za mama

-Sawa rero. Ndanisonzeye nyihera ibiryo ndye

-Nutabiteka ubireke jyewe maze kwirira ifi n’ifiriti

-Maye se mbiririre. Abandi bana bafite ba boss babo babaha care si nka njye wumiwe

-Iryo ni itiku hoshi nawe. Ahubwo ngwino tujye mu gikoni dufatanye duteke mugani wawe. Ndanatekera rimwe ibya nijoro ubwo. Nizere ko uri burare?

-Ndarara nkumbuye tante cyane.

 

Twagiye mu gikoni turateka tunaganira. Solange ni mubyara wanjye tungana kandi dukundana rwose. Ni umwana mwiza uganira, arisanzura kandi ntajya aripfana. Ikintu kimwe tudahuza ni icyerekeye abagabo. Kuri we umugabo ni cash ibindi bikaza nyuma. Naho jyewe umugabo ni urukundo ibindi bikaza nyuma. Icyakora buri wese yubaha ibitekerezo by’undi.

 

Gusa nanjye nakomeje kwibaza cyane ku byerekeye uriya boss wanjye, noneho kuba ari we nyiri business byarushijeho kuntera ikibazo ku mutima. Kuba umucungamutungo kandi boss agukunda, ushaka wanyereza akakwihorera ariko nanone ukomeje kumwanga yanakugambanira ugahomba ugahanwa.

 

Iryo joro ryarije, mama ataha kare kuko yari abizi ko umwisengeneza we ahari, tuganira cyane tugeza mu gicuku tubona kuryama.

 

Iminsi yarisunitse nuko umunsi wo gutangira akazi uragera.

 

Nagombaga kujya ntangira akazi saa mbili, nkaruhuka saa saba nkageza saa munani ngataha saa kumi n’imwe.

Gusa ku munsi wa mbere nagombaga kuhagera kare ngo babanze banyereke abandi bakozi bananyereke aho nzakorera ndetse banampe ibitabo nzakoresha mu kazi

 

Mu ikanzu y’ubururu ndende, udukweto duciye bugufi, isakoshi mu ntoki nagiye gutega bus ingeza ku kazi.

 

Nagezeyo ku gihe nsanga abandi bakozi ntibarahagera, uretse umusore umwe nasanze ari kumanika amatangazo.

 

Nahise musuhuza

 

-Muraho

-Uraho neza. Twabafasha iki ko mwizinduye se

-Nitwa Uwase Faina nje

Nabaye ntaravuga ikingenza ahita anca mu ijambo

-Eeeeh. Karibu mu kazi Faina. Izina ryawe ndarizi bari babitubwiye ko kontabure mushya ari buze uyu munsi. Jye nitwa Kamana Francois, ni jye ushinzwe abakozi

-Murakoze cyane. Nishimiye kubamenya

-Nanjye ni uko, Faina.

 

Yahise anyereka icyumba kiberamo inama mba ariho nicara mu gihe ntegereje abandi bakozi.

 

Nkiri aho nahise mbona ubutumwa bugufi buvuye kuri boss

 

Mwaramutse. Sindi bubashe kugera ku kazi mu gitondo, nabwiye ushinzwe abakozi ko akwereka bagenzi bawe, ubwo aranakwereka ibiro byawe. Ibindi ndabikubwira mpageze.

 

Namaze kuyisoma mbona wa mu Kamana arinjiye arampmamagara

-Faina

-Karame

-Mu gihe abandi bakozi batarahagera ngo mbakwereke ngwino mbe nkwereka aho uzakorera n’ibindi uzakenera byose

Twatambagiye uruganda rwose, ahari imashini n’abandi bakozi batunganya imbaho, aho babika ibyakozwe, icyumba gicururizwamo. Mbega ibitanda mbega ameza n’utubati. Mu moko yose, amabara yose, ingeri zose. Nabanje kuhahagarara nibuka udutebe iwacu twicaraho ndavuga nti hari abantu baba heza pee.

 

Tuvuye aho twasanze abandi bakozi bahageze nuko twese twinjira mu cyumba cy’inama. Ngiye kwicara Kamana arambuza ati ngwino hano nkwereke abandi

 

Namuhagaze iruhande nuko afata ijambo

 

-Mwaramutse mwese. Nkuko mubizi uyu munsi twagombaga kwakira umucungamutungo mushya. Ni uyu rero umpagaze iruhande, yitwa Uwase Faina. Ubwo namwe azagenda amenya amazina yanyu buhoro buhoro. Akazi katangiye, ndumva nta byinshi mfite ndenzaho. Amatangazo yo ari aho asanzwe amanikwa.

 

Amaze kuvuga umusaza umwe yateye agatoki hejuru nuko ahabwa ijambo

 

-None se ko mbona umuntu yashyiraho umutemeri buriya nta kuntu wahita utera ivi ibirori bigakomeza?

 

Bose bahise bakoma amashyi, baraseka, nuko Kamana ati

 

-Muzehe rwose urwenya rwawe ntirushira. Uyu mwari ucyeye urabona koko yaba ari aho batararitera?

-Mba nkwambuye mwana wa. Nabyivugire na we arahari

 

Nahise mvuga

 

-Muze, ndabona umusore wawe arwaye intinyi, cyangwa wenda yambenze mu mutima

 

Bahise banyishimira, babona sindi igifura kandi nzi kuganira

 

Nahise njya mu biro byanjye mbanza kubitunganya uko nshaka. Ku meza hagombaga kuba hari mudasobwa, terefoni y’akazi, impapuro zihutirwa za ngombwa, ibindi byose bikaba mu kabati.

Hari intebe imwe yicarwaho n’uje kugira icyo ambwira, nuko mpita mpamagara Kamana (nimero ze nari nzibonye kuri lisiti iriho nimero z’abakozi bose)

 

-Mwaramutse. Ese nta kuntu mwazana izindi ntebe cyangwa intebe imwe itambitse yakicaraho abantu nka batatu? Hari igihe hashobora kuza abantu barenze umwe bahuje ikibazo

-Reka mbwire muri atelier bahite bayitunganya mu kanya irahita iza.

-Murakoze

 

Nakomeje akazi kanjye, hashize akanya gato CEO araza, aransuhuza ambaza niba namaze kumenyera, mubwira ko nta kibazo

 

Yagiye mu biro bye, nuko isaha zo kujya kuruhuka zigeze nitegura gusohoka ngo njye gushaka resitora naryamo

 

-Ugiye hehe Faina?

-Ngiye muri pause boss

-Pause ibera hano ariko. Ntabyo bakubwiye?

-Oya

-Abakozi bose hano turabagaburira. Bituma ntawe ukererwa mu kugaruka mu kazi

-Ndabikunze rwose ni byiza.

 

Narasohotse njya kurya, na boss araza, mbese ku meza abantu bose baba bareshya. Boss yisanzura ku bakozi be.

 

Turi kurya, Kamana yaraje anyicara iruhande nuko aranyongorera

 

-Nyamara muzehe buriya yamvugiye

-yakuvugiye iki se kandi?

-Gutera ivi yewe

-Uramenye da.

-Umbenze ku manywa y’ihangu se?

-Uzi ute se niba bitararangiye wenda?

 

Uko twaganiraga niko boss yarimo atureba, nuko ngiye kumva numva terefoni yanjye irasonnye mbona ni SMS ya boss

 

Nyifunguye nabaye nk’ukubiswe n’inkuba, kuko amagambo yari yanditse sinari nyiteguye izi saha.

 

 

Yamwandikiye ate se kandi?

 

Biracyaza…

5 comments

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s