Inkuru ndende

Ese urankunda? Agace ka 7

Nakomeje kwibaza byinshi, nibaza ukuntu nari nihebye ngo niyimishije akazi ariko nkaba nkabonye mu buryo ntacyekaga. Nahise njya guteka mfite ibakwe ryinshi kandi rwose ibinezaneza na we urabyumva byari byose.

 

Ubwo nyuma ya saa sita nariteguye njya ku mukozi w’Irembo kugirango nishyure ibijyanye na notification, mpita njya no kwifotoza amafoto magufi. Nashakaga kuzajya kureba CEO ibintu byose biri ku murongo dore ko n’ubundi twarimo dusatira impera z’icyumweru kandi nari gutangira akazi mu cyumweru gikurikiyeho.

 

Ibyo mbishoje naratashye ntegura ibya nijoro ntegereje ko mama ataha dore ko muri iyo minsi abavandimwe bose bari ku ishuri, ni jye wabaga ndi kumwe na mama gusa.

 

Atashye yahise ampobera ambwira ko yishimye cyane kubera akazi ngiye gukora

 

-Ariko mama jyewe ndumva mfite impungenge

-Impungenge z’iki se kandi watsinze ibizami byose

-Ikibazo ibizami nakoze birashekeje biranihariye

-Iyo Imana ishaka kuguha igira inzira nyinshi ibinyuzamo, wikibaza byinshi. Nyihera amazi nywe mbone kurya

-Ntushonje se mama

-Umva sha ahubwo reka mbe narura

-None se urarura ugiye kunywa amazi koko

-None se bitwaye iki mwana wa

-Amazi urabizi nta ntungamubiri agira. Iyo uyanyoye ugahita urya bituma urya bicye kuko amazi aba yafashe umwanya munini mu gifu. Iyo noneho unariye ibiryo byoroshye bibangamira igifu kubisya ukaba wagira impiswi cyangwa gutura ubwangati

-None ko mfite inyota

-uranywa amazi urindire byibuze hashire iminota 30 ubone kurya cyangwa se uze kuyanywa nyuma yo kurya

-Yego dogiteri wanjye. Nyamara ushaka wasubira kwiga ndumva wabamo umujyanama mu mirire

-erega ni uko abantu badakunda gusoma ubu interineti yacyemuye byinshi. Hagati aho ejo nzajya kureba boss yambwiye tuzabonane

-Uzamwitabe wumve washaka ashaka kukubwira ibyerekeye akazi uzakora

-Jyewe siko mbyumva mama

-Upfa kuzazana aya mbere tukayabyinira ngo ntawe ubika umushahara wa mbere

-mama ni ukuri nzagusohokana nimpembwa aya mbere rwose

-Ku Gisenyi ku mazi se mbe nshaka ka bikini

-Ibaze umukecuru na bikini ku mucanga noneho

-Sinjya mbona abazanye iminkanyari ku nda bazambaye ra

-Ushaka kubigana noneho

-Nivugiraga mwana wanjye. Uzaba ukorera ayawe uzayakoresha uko ubyumva. Uzirinde gusa kuyasesagura

 

Tumaze kurya twararyamye, nuko bucyeye nkora uturimo two mu rugo vuba vuba nihuse kugirango ntaza kwica gahunda.

 

Bigeze hafi ya saa yine nahise mfata moto nerekeza aho twari buhurire, iyi nshuro noneho narahamutanze mpita muhamagara

 

-Muraho. Ko nahageze se muri hehe

-Ndi mu nzira nahuye na embouteillage. Ba wicaye mu mutaka utumize icyo kunywa ndakugeraho vuba

 

Mu minota nk’itanu yari ahageze, ampereza umukono aricara.

 

-Felicitation nanone

-Murakoze cyane

-urumva se intsinzi warayakiriye ute

-Sinkubeshye yarantunguye rwose gusa byaranshimishije pee. Imyaka ine mu bushomeri yari indambiye

 

Umukozi wa hoteli yahise aza kutwakira kuko nari nanze kugira icyo mfata atarahagera. Nta mafaranga nari nitwaje, ibaze rero iyo ntumiza akagira impamvu ituma atakihageze, nari kwishyura iki?

 

Nasabye icyokunywa na we aratumiza nuko dukomeza kuganira.

 

-None se boss, ubundi ku kazi hari abakozi benshi?

-Si benshi cyane, ariko abakora mu ruganda bagera kuri 50. staff turi 10 gusa. Wowe rero uzaba ushinzwe kumenya ibyerekeye amafaranga byose, ayinjiye, aho yavuye, asohotse n’icyatumye asohoka, umenye ko abakozi bahembwe kandi ku gihe, ibyerekeye imisoro, muri macye ikintu cyose kijyanye n’ifaranga ni wowe uzaba ugishinzwe

-Abakozi se bahemberwa kuri compte cyangwa tuyabaha mu ntoki?

-Muri iki kinyejana hari umuntu uhembwa mu ntoki koko? Ariko dufite ba nyakabyizi bahembwa iyo bakoze. Abapakurura imbaho, abapakira ibiguzwe, bo bahembwa bitewe n’akazi uko kagenze, hari ushinzwe kumvikana na bo umushahara, wowe ukayabaha bagasinya na we agasinyira ko bose bahembwe. Naho abakozi bahoraho bose bahemberwa kuri konti, kandi ntiturenza itariki 28 za buri kwezi tutarabahemba. Hagati ya 25 na 28 uzajye uba wamaze bose kubashyirira amafaranga kuri konti

-Murakoze. Ariko ndacyafite amatsiko ku byerekeye ikizami nakoze cyaba icyanditse na interview

-Ufite ayahe matsiko ngo nyakumare ko mfite umwanya uhagije se

-Mu kizami cyanditse numvaga mbonye menshi yaba 20, nuko mbona abaye 34. interview nayo uko nashubije icya nyuma nari nziko akazi nkabuze birangiye rwose. Ni gute ari byo byatumye nkabona?

 

-Baravuga ngo ntawiyima umwima ahari. Nibyo koko rwose mu kizami cyanditse wari wabonye amanota atakwemerera gukora interview, kuko wari ufite 18/50 kandi uwemererwa gukora interview ni uwabonye hejuru ya 25/50. icyo twakoze rero twakongereye amanota kugirango ugire amahirwe yo gukora interview

-None se mwabonaga mu babonye icya kabiri ntawe mwagaha?

-Ni jyewe mfata ijambo rya nyuma hariya. Bamaze gukosora banzanira amanota y’abakoze nsanga ababonye icya kabiri ni batanu, wari uwa gatandatu na we. Nanze kuba naguha atuma uba uwa mbere, ariko nanone numva naguha atuma uza mu ba mbere. Uwa 5 yari yagize 35, nuko mvuga ko baguha 34, bivuze ko nubwo nayongereye ariko ntawe warushije mu bari bakurushije na mbere hose.

-Ibyo ndabyumva. None se muri interview ho kuki byagenze kuriya?

-Interview nta bibazo utabazamo burya. Nashoboraga no kukubaza impamvu waje wambaye utyo, impamvu ukiri ingaragu, icyatumye wiga muri ULK… Rero nta kidasanzwe mu byo twakubajije

-Oya boss. Ikibazo cya nyuma se buriya hari abandi mwakibajije

-nakubwiye ko umuntu umubaza ibyo ubona ari ngombwa. Muri interview ahanini haba hagenderewe kureba uko witwara imbere y’abantu, uko wisobanura, uko wihagararaho, uko wumva ururimi .. Kiriya kibazo rero nakibajije nzi neza ko usubiza OYA

-Koko se?

-Niba wibuka neza ubwo duherukana wari wanyemereye ko ugiye kubitekerezaho ukazansubiza. Amanota yasohotse utaransubiza. Iyo yabaye imwe mu mpamvu nifuje ko wazaza muri interview ngo ndebe niba noneho kuba ugeze muri interview akazi kari buguhume amaso ukaba wasubiza ibitakuvuye ku mutima. Rero washubije OYA mpita numva urantsinze, numva ko rwose akazi ari wowe ugakwiye kuko udashobora kugurisha amarangamutima yawe ngo uyagurane ibizashira

-Noneho iyo nsubiza YEGO akazi nari kukabura

-Nabwo wari kukabona

-Gute se kandi nari kukabona kandi igisubizo kigomba kuba kimwe

-Hariya harimo umutego kandi wasimbutse umwe, ugwa mu wundi nubwo uwo waguyemo atari umwe bita mubi.

-Ngo naguye mu wundi mutego? Uwuhe se?

-Reka mbanze nsome kano gacupa ndaje ngusobanurire

 

Aka kazi ko ari indyankurye ra? Ubu se noneho yaguye mu wuhe mutego?

 

Biracyaza…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s