Inkuru ndende

Ese urankunda? Agace ka 1

Nari ndangariye muri terefoni gato ndi gusubiza abanyandikiye ngo mbone kuyizimya nuko mpita numva aravuze ati

 

-Nk’uko amategeko y’ikizamini mufite abigaragaza, ikizamini cyanditse mu ndimi eshatu ari zo ikinyarwanda, igifaransa n’icyongereza.

Umukandida arahitamo ururimi asubizamo ibibazo byabajijwe gusa ntibyemewe kuba wasubiza mu ndimi zose icyarimwe.

Ibibazo byose bifite amanota angana, nk’uko ari ibibazo 50, buri cyose gifite inota rimwe. Gusimbuka ikibazo ntibyemewe kuko kugisimbuka bihita bigukuraho inota rimwe mu yo wakoreye

Ikindi usabwa gusubiza uko bikurikirana utavangavanze kandi umwanya wagenewe gusubizamo ntuwurenze ngo wandike ahandi.

Musabwa kutandikaho amazina yanyu ahubwo buri wese code yahawe muri SMS imwemerera kuza gukora ikizami ni yo ari bwandike mu mwanya wabugenewe.

Ikizami kiramara amasaha atatu ariko urangije kare yemerewe kwisohokera.

Ufite ikibazo yakibaza mbere y’uko dutangira kubara amasaha

 

Uwo yari uyoboye abahagarariye ikizami cy’akazi ku mwanya w’ushinzwe gucunga umutungo wa sitasiyo ya esanse. Nari maze imyaka 4 mu bushomeri nyuma yo kurangiza kaminuza mu ishami ry’ubucungamutungo.

 

Nkuko mubizi rero mu kizamini haba harimo abantu b’ingeri zose, umwe yahise atera agatoki hejuru:

 

-None se ko mbona umwanya wo gusubizamo mwageneye ibisubizo ari mutoya kandi hakaba hari abantu bandika ibintu binini ubwo ntituri bubihomberemo?

 

-Ubwo murasabwa kwandika bitoya cyangwa kwandika mu ncamake. Urupapuro rwo gusubirizaho murabona ko kuri page imwe hagenewe ibisubizo 5, ntabwo uwo mwanya ari mutoya rwose

 

Undi na we yahise abaza:

 

-None se ko mwatwicaje twegeranye cyane ubu ntibari budukopere?

 

Icyumba cyose cyahise gisekera icyarimwe, uhagarariye ibizami na we ntiyihanganiye guseka nuko aramubwira ati ukingeho akaboko ntibagukopere.

 

Abantu bakomeje kubaza ibibazo binyuranye, bamwe bagasubizwa abandi tukabaha inkwenene. Gusa nyine byamaze akanya katari gato, ikizami kiratangira.

 

Ubwo nafunguraga urupapuro rw’ibibazo nabuze na kimwe nandika maze ntangira kurira cyane. Nararize ndaboroga ku buryo icyumba cy’ikizami bose bahise bahaguruka baza kumpoza maze umwe muri bo ankomanga ku rutugu.

 

Nashidukiye hejuru nsanga zari inzozi.

 

Yari mama wari uje kumbyutsa ngo nitegure njye mu kizami cy’akazi.

 

Nitwa Uwase Faina nkaba ndi umwana wa mbere iwacu. Ababyeyi banjye barikokoye bandihira amashuri abanza n’ayisumbuye ndetse na kaminuza kuko ntabashije kubona inguzanyo ya Leta.

Narangije mu ishami ry’icungamutungo muri Kaminuza yigenga ya Kigali, ULK.

Nashoje mfite amanota meza ariko ubu maze imyaka ine yose ndi umushomeri. Nubwo mu nzozi narotaga ibintu bitandukanye ariko aho nasabye akazi ni mu kigo gishinzwe gutunganya ibikomoka ku mbaho, aho bakora utubati, intebe, ibitanda, ameza n’ibindi binyuranye ariko mu buryo bugezweho.

Narabyutse nditegura nuko njya gufata imodoka yagombaga kungeza aho ikizamini kiri bukorerwe.

 

Ubwo nageraga aho kiri bubere nasanze abandi bamaze kwicara no guhabwa amabwiriza, nuko nanjye ndicara ku ntebe inyuma y’abandi bose, banzanira urupapuro rw’ibibazo n’urwo gusubirizaho.

 

Nakoze ikizami kandi rwose nari nize bihagije ku buryo numvaga nizeye kugitsinda.

 

Ubwo nari maze iminota 30 ndi gukora nashishikaye, hahise hinjira umugabo ubona ko ari munini rwose wambaye neza nuko ahagarara imbere afata ijambo ati:

 

-Nagirango nibutse ko muri iki cyumba hari gukoreramo abasabye akazi ku mwanya w’ushinzwe kwakira abantu, customer care. Niba hari urimo hano yarasabye akazi ku mwanya w’umucungamari yasohoka akaza nkamwereka aho bo bari bukorere ikizami kuko icyabo na bo kimaze kuhagera bagiye gutangira.

 

Nahise ndambika ikaramu hasi ndiruhutsa nuko ndahaguruka ndasohoka. Ku bw’amahirwe kuko nari nicaye inyuma nta n’umwe wanyitayeho naho iyo mba nicaye imbere ubanza nari guhuzagurika.

 

Ubwo nasohotse ntegereza uwo mugabo hanze, aza nta wundi usohotse bivuze ko ari jye gusa wari wayobye icyumba.

 

Nuko angezeho aransuhuza:

 

-Bite muko?

-Ni byiza

-Umuntu w’inkumi nka we mwiza koko uyoba aho ukorera gute?

-Naje nakererewe nuko mpita ninjira ntanarebye ku rugi abari bukorere hano

-Ubu se ko ikizami gikomeye uri bukibashe ra?

-Ndagerageza kuko kano kazi ndagashaka rwose

-Kuki ugashaka cyane se

-Ariko uzi kumara imyaka ine yose uri umushomeri wowe

-Ngaho genda ukore ikizamini, nkwifurije intsinzi. Ariko nusohoka mu kizami uze kunshaka nkubwire

-Yego murakoze

 

Yahise ampereza business card ye, mpita nyibika ntanarebye ibiriho nanjye njya mu kizami.

 

Uyu mugabo se utangiye kuvugisha gutya Uwase yaba ari muntu ki?

 

Ubu dutangiye iyi nkuru yacu twise “Ese urankunda” aho tuzasangamo byinshi binyuranye harimo: Urukundo, ubugambanyi, guhemuka, imbabazi, itonesha, itoteza.

 

Iyi nkuru izajya isohoka kabiri ku munsi, mu gitondo mbere ya saa tatu na nimugoroba nyuma ya saa kumi.

Nkuko twabanye mu zindi nkuru, kuri buri gace, usabwa kujya utubwira uko ubyumva, isomo wakuyemo, icyo ubona cyakongerwamo, kugirango irusheho kuryoha no gutanga amasomo anyuranye

 

Ntuzayicikwe.

Umwanditsi BIRAMAHIRE Francois JASSU

6 comments

  1. Murakoze cyane rwose nubwo njye ntangiye ntunze ariko nzasoma zose kuko nkunda gusoma unkuru ndende!!!!

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s