Ubuzima

Ibyabafasha kurushaho kubahana

Mubanye neza rwose ndetse iyo urebye ubona agukunda nawe ukamukunda. Gusa nanone wakitegereza ugasanga mu byo akora nta kubaha akugaragariza. Ese birashoboka ko wakunda umuntu ariko ntumwubahe?

Ese wakora iki ngo uwo mubana mubashe kubahana, umwubahe akubahe?

Muri iyi nkuru twakusanyije ingingo zinyuranye ababana ndetse n’abakundana muri rusange bakwiye kwitaho mu kubaka umubano wabo, dore ko urukundo no kubahana iyo bigendanye birushaho kuryoha mugahora mumeze nk’abari mu kwezi kwa buki.

  1. Menya kuri we icyo kumwubaha bivuze

 

Abantu tuba twarakuriye mu mico inyuranye ndetse tukanarerwa binyuranye. Hari aho uzagera usange umugabo kumwereka ko umwubashye umwoza ibirenge, ahandi usange kumwubaha ni ukumusuhuza upfukamye. Ahandi usange kubaha umugore ni ukumutwaza isakoshi, ahandi kumwubaha ni ukumuhamagara mu izina ry’imfura ye (mama runaka), n’ibindi binyuranye. Muri macye hano bivuze ngo mbere yo gukundana, kubana n’umuntu banza umenye neza kuri we icyo kumwubaha bivuze. Niyo mpamvu gukopera uko runaka abanye n’uwe bishobora kugusenyera cyangwa guteza ibibazo mu rugo rwanyu. Niba kwa runaka basangirira ku isahani imwe, ushobora gusanga uwawe akunda kurira ku ye wenyine, ndetse mu cyumba. Byose byitoze. Umenye imvugo ukoresha kuri we ku buryo atabibonamo agasuzuguro, …

 

 

  1. Musuhuze

 

Iki ahari ushobora kumva ko nta gaciro kanini gifite ariko buriya abanyarwanda bajya kuvuga ngo mwaramutse iraguma ntibibeshye. Nubwo mwararanye ariko kuba wakanguka ukamubaza uko yaramutse ni kimwe mu bimwereka ko afite agaciro mu buzima bwawe. Wenda aramutse arwaye, yarose nabi, gahunda yapangaga arashaka kuzihindura, byose bibanzirizwe no kumusuhuza. Niba mutirirwanye ukaba utashye musuhuze. Mbere yo guhobera abana no kubaterura ibuka ko hari uwatumye baboneka. Kumusuhuza ni icyubahiro akwiye, wikimwima rwose

 

  1. Menya ko yihariye

Wishaka kumugereranya n’abandi. Baba abo muturanye, abo mwakundanye, bene wanyu se, wikumva ko akwiye kuba nka bo. Oya buri muntu ku isi nta fotokopi ye ihaba, burya n’impanga zigira ibizitandukanya. Mwubahire uko ari, imiterere ye muri macye uko ameze ni we we, wikumva ko yamera nk’abandi. Yego niba hari ibikubangamira akora wamusaba kubihindura no kubikosora ariko ukamenya inzira ubinyuzamo ukanamenya niba koko atabihinduye hari icyo byahungabanya ku mubano wanyu dore ko rimwe na rimwe aba ariko ateye.

 

  1. Mufate nk’uw’agaciro

 

Aha byumvikane neza si ukumufata nk’igicuruzwa cyangwa kumufata nk’aho hari ingurane wahabwa ukamutanga ahubwo nk’uko ubungabunga inzu yawe ngo itangirika, uko umukozi umutegeka koza amadongo atayamena, uko ubuza abana kwicara mu ntebe bakandagiyemo, ako gaciro uba wabihaye ibuka ko hari uwo mubana ukwiye na we guhabwa agaciro kandi kabirenze. Uko wita ku matungo yawe, imodoka ukayikorera entretien, menya kwita ku wo mwashakanye, menya kumucyemura no kumubungabunga, muzarambane. Wikumva ko abereyeho gucyemura ibibazo byo mu rugo gusa, kwita ku bana, guhaha, ahubwo menya ko kubana na we ari kimwe mu bizatuma utera imbere, ubimwubahire

 

 

  1. Ba umwizerwa

 

Muri iyi si ya tekinoloji bigenda bigorana kuba umwizerwa ijana ku ijana, dore ko isi yabaye umudugudu usanga n’icyo wowe utitaga ikosa we akibonamo icyaha gikomeye, yewe wanagira ngo wamuhishe ahubwo ugsanga birushijeho kuzamba. Kugirango arusheho kukubaha mubere intahemuka. Wimubwira ko ugiye I Kayonza kandi ugiye I Nyabihu. Wimubwira ko uwo mwasangiraga mu kabari ari mubyara wawe kandi bene wanyu bose abazi. Ikintu cyose cyazana agatotsi hagati yanyu gerageza ucyirinde

 

  1. Ha agaciro amarangamutima ye

Mbere yo kugira ijambo umubwira, igikorwa umukorera banza wibaze ari wowe bibayeho uko wabyakira. Wikumva ko uzakora ibigushimisha gusa utitaye kuri mugenzi wawe. Wivuga ngo ndabikora ikibyimbye kimeneke. Niba ababaye, menya icyabiteye. Niba ashavuye, wimwongerera ishavu, muhumurize umube hafi. Niba yacuruje agahomba, niba ku kazi bamwirukanye ba uwa mbere mu gutuma abona umutuzo no kuruhuka muri we. Wimubera umutwaro, ngo mu bibazo yagize nawe wongeremo ibyawe. Mubere umwunganizi

  1. Ha agaciro umubiri we

Ese niba ushaka ko mukora imibonano, wibuka ko agomba kubanza kubyemera no kubishaka na we? Nubwo mwashakanye, kuba wabanza kumubwira uti “nshaka ko dusomana”, hindukira nkubwire, ni ikizatuma yumva ko umwubashye kandi utamufata nk’igikoresho cyawe cyo kwimariraho irari gusa. Hari n’abagore usanga birengagiza ubushobozi bw’abagabo babo n’ingufu zabo ugasanga aramuhoza ku nkeke ati ubwo nutabikora uraba uvuye ahandi, uraba utankunda n’ibindi nk’ibyo. Ibyiza byatuma murushaho kubahana ni ukubanza kumenya no guha agaciro umubiri wa mugenzi wawe, bizatuma murushaho kubana neza.

Mbere yo kwinjira mu gikorwa cy’urukundo banza ubaze mugenzi wawe niba abishaka, afite na we akanya, utagendeye ku kuba wowe ubishaka gusa

  1. Wimucyocyora mu bandi

 

Wenda benshi iki barakigerageza ariko burya no kumuvuga umubwira undi (byaba ukuri cyangwa umubeshyera) si byiza si na ngombwa keretse mu gihe ukeneye inama kuri uwo muntu. Ariko niba muri mu bantu uwo mwashakanye agakosa, rindira muze kwiherera umwereke aho yakosheje, nushaka unamutonganye. Yego si byiza ko zirara zishya ngo nibucya zizime, kuko ntiwatwika inzu ngo uhishe umwotsi ariko nanone ni byiza kumenya kurengera uwo mwashakanye, kumubikira ibanga, no kumwubahisha mu bandi

Dusoza

 

Nubasha kubaha uwo mwashakanye, ukamwubahisha mu bandi, azabaho anezerewe kandi nawe azabikwitura. Bizabarinda intonganya za hato na hato, gushwana no gutandukana, kandi bizababera umurunga uzabahuriza hamwe iminsi yose.

 

1 comment

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s