Imibanire Imyororokere Ubuzima

Isano iri hagati y’urukundo n’imibonano

Urukundo n’imibonano ni ibintu bibiri bitandukanye. Gusa mu bantu hahora ibitekerezo binyuranye ku isano yaba iri hagati ya byombi. Bamwe bavuga ko bigendana abandi bakavuga ko kimwe kiri ukwacyo. Bamwe bavuga ko iyo habayeho imibonano urukundo na rwo rutabura kuza. Abandi bati iyo wakunze umuntu imibonano igomba kuzamo.

Ese urukundo rutarimo imibonano (aha turavuga hagati y’abakundana bitari ukubyigirisha), rwaramba?

Ese gukora imibonano nta rukundo rurimo, byo byamara igihe?

Muri iyi nkuru tugiye kurebera hamwe ingingo zinyuranye zerekana ko urukundo n’imibonano ari ibintu bidasigana hagati y’abakundana, gusa turi bunerekane bimwe mu byo bamwe bibeshyaho.

    1. Urukundo no gushaka imibonano bikomoka hamwe

Abashakashatsi bo muri Canada mu mwaka wa 2012 bakoze ubushakashatsi bavumbura ko mu gace k’ubwonko ka insular cortex ari ho haba amarangamutima aganisha ku mibonano ndetse n’urukundo rukaba ariho rukomoka. Nubwo ushobora gukora imibonano nta rukundo ufite, amarangamutima azagutamaza kuko nyuma ya ya mibonano uko witwara bitandukanye n’uwayikoze kubera urukundo

Ikindi ni uko mu gihe ukoze imibonano kubera urukundo, ibyishimo byikuba kabiri kandi bituma urushaho kuryoherwa

    1. Urukundo rutuma imibonano igenda neza

Ubundi bushakashatsi bwakorewe ku bagore 98 bwerekanye ko iyo ukoranye imibonano n’uwo ukunda ari bwo ikuryohera ndetse no kurangiza bikoroha. Aha kandi ntibivuga kuba mubana cyangwa mutabana, upfa kuba gusa umukunda, umwiyumvamo

    1. Imibonano yongera icyizere ku wo mukundana

Umuntu mwahuye ijoro rimwe mukaryamana gusa ntabwo bishobora gutuma umwizera ahubwo kuri bamwe n’akizere wamugiriraga karayoyoka kuko wumva ko uko yakoroheye anabikorera abandi. Ariko iyo hari urukundo, imibonano iri muri bimwe bituma ugukunda arushaho ndetse akanakwizera cyane dore ko muba mwarushijeho kuba umwe, kumenyana. Uzabimenyera ku mugabo uryamanye na malaya n’ubikorana n’umugore we. Uwabikoze n’indaya azarangiza ahita abyuka agenda, naho uwabikoze iwe iyo arangije ahita yiruhukira agatuza, kuko aba yizeye umutekano. Umugore nyuma yo kubikora n’umugabo we ni bwo abasha kubohoka akaba yanamubaza icyo yari yaratinye kumubaza, bamwe ni naho bibukiriza abagabo babo ko nta gitenge baheruka!!!

    1. Imibonano igira ubusobanuro iyo hari urukundo

Kuba wakifuza umuntu ni bumwe mu buryo bwo kwereka urukundo umuntu. Ushobora kurarikira umuntu gusa nta rukundo, iyo ubikoze birangirira aho, nta kindi. Buriya nubwo mu mubiri wumva ko wanyuzwe, ariko muri wowe usigarana icyuho cy’uko byabaye nta rukundo rurimo. Kuko nyine nta gikurikiraho, nyamara iyo bibaye mukundana bifite ikindi byongera muri mwembi. Ari umubiri n’umutima byombi biranyurwa

    1. Iyo nta rukundo, uravangavanga

Uzasanga hari abantu bava hamwe bajya ahandi. Icyo baba bashaka si urukundo ahubwo ni imibonano gusa. Impamvu nta yindi. Si uko uwo baherukana atabashimishije ahubwo ni uko batamukunda. Ibyabaye hagati yabo byarangiriye aho, none arumva ashaka kongera ariko si we ashaka ahubwo ashaka undi.

Nyamara iyo bibaye hari urukundo, iyo umubiri ushaka imibonano mu mutwe wawe hahita haza wawundi musanganywe, ntihazamo wawundi w’amatuza mwahuye, ntihazamo wawundi w’amabuno mukorana, …

    1. Urugo rudakora imibonano ntirwaramba

Bimwe mu byo abashakanye bashinjanya hanazamo kuba umwe atagihindukirira undi. Niba uwo mwashakanye ahorana impamvu zituma mudakorana imibonano iyo hatajemo gatanya hazamo gucana inyuma nubwo iyo atari yo mpamvu yonyine ibitera. Niyo bitabayeho ariko usanga nta byishimo bisesuye muri urwo rugo. Niho uzasanga umwe agenda ukwe, akora gahunda ze uko abyumva, kuko umurunga w’urugo amaze gucika. Imibonano ni kimwe mu bikomeza umushyikirano w’abashakanye ni na yo mpamvu byiswe Kubaka urugo

    1. Imibonano ikomeza urukundo

Ubushakashatsi bwerekana ko abakundana bakorana imibonano kenshi kurenza abadakundana. Kandi bwerekana ko ku bashakanye gukora imibonano kenshi gashoboka byongera ubwumvikane n’ubwuzuzanye ndetse n’urukundo hagati yabo.

None?

Mu gusoza reka tukwibutse ko gukora imibonano nta rukundo bishoboka. Uzabimenyera ku bagura igitsina, ababikora kubera izindi nyungu, abakururwa n’ikimero, mwabikorana rimwe gusa bikaba birarangiye, ababikora byo kwihimura ku bo bashakanye, ababikora kubera izindi mpamvu.

Ariko nanone kuvuga ngo urukundo hagati y’umugabo n’umugore ruzakomera hatarimo gukora imibonano byaba ari ukwibeshya kuko uwo ukunda uramurarikira kandi iryo rari rimarwa nuko muryamanye.

Wenda kubera impamvu bwite, imyizerere se ushobora kuvuga uti sinabikora ntarashyingirwa, rwose ni byiza na twe turagushyigikiye iyaba bose babishoboraga. Ariko hagati y’abashakanye kudakora imibonano bihungabanya urukundo rwabo

Kwibeshya ko imibonano izakuzanira urukundo bizatuma uhora uhinduranya abo muyikorana kuko ntuzanyurwa bitewe nuko waciye umuvuno nabi. Ntabwo habanza imibonano habanza urukundo. Kandi imibonano ntituma ukundwa ahubwo imibonano ni umusaruro w’urukundo.

Kumva ko ugusabye ko muryamana wese aba yagukunze waba wibeshya ahubwo umubano hagati yanyu ushobora kuvamo kuryamana, bitewe n’urukundo mumaze kugeraho. Niba udashaka gusimburanya abantu, banza witonde mbere yo kugira uwo muryamana urebe niba koko ari urukundo rubahuje cyangwa ari imibonano gusa

2 comments

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s