Ubuzima

Ishyano: Agace ka 1

-Mwana wanjye, dore ugiye kujya kure yanjye. Ugiye aho utazongera kugendera ku gitsure cyanjye, ugiye aho uzamenya ko ubwiriwe cyangwa uburaye, ugiye aho uzamenya ko inzu ubamo yishyuwe cyangwa itarishyurwa. Mfura yanjye, dore imyaka 20 yose nakuruhanye jyenyine, sinakwimye icyo mfite, icyo ntaguhaye ni uko ntari ngifite.

Uramenye ntuzabe nka ya hene iciye ikiziriko ngo wiyandarike, kuko niwigira agatebo uzayora ivu

-Ariko mama sigaho nawe kuntongera humura rwose inama zawe wampaye kuva namenya ubwenge ndazizi ndanazikurikiza zose rwose kandi aha ngeze iyo ataba wowe simba mpageze

-Umva mwana wa, uvuga aba atarabona pee. Nanjye iyo numvira mama wambyaye, simba narabyaye nkiri muto, kandi agahinda ko kutamenya uwanteye inda aho ari sinteze kuzagakira. Sinabiguhishe urabizi so ntumuzi, nanjye duherukana mubwira ko yanteye inda. Ijambo yanshubije sinifuza ko wazaribwirwa nawe. Yarambwiye ngo si we musore utera inda wenyine. Kuva uwo munsi kugeza ubu sindamuca iryera. Yaba abaho cyangwa atabaho simbizi. Wowe rero, uzirinde ibishuko, uzirinde agakungu, wirinde inshuti mbi, ugendere kure abakoshya bose. Uzite ku kikujyanye, nibwo uzaba umpesheje ishema. Ngaho rero genda witegure amasaha ndabona ari kugenda, utaza kugerayo bwije dore ntunahazi ntunahamenyereye

Munyihanganire sinivuze nahise nivugira ibyo mama yambwiraga.

Nitwa Gatesi, ni jye mwana rukumbi mama yabyaye, ndi ikinege.

Gusa sinigeze menya data kuko mama yambwiye ko baheruka kubonana ubwo yamuteraga inda, yamubwira ko ari iye undi akamwihakana agahita anaburirwa irengero nubu akaba ataraboneka.

Mama yandeze jyenyine, mu bikomere byo guhemukirwa nuwo yari yarihebeye kandi byamubayeho akiri muto, dore ko yambyaye afite imyaka 18.

Yakoze uko ashoboye andihira amashuri, nanjye niga nshyizeho umwete none ubu ngiye kujya kwiga kaminuza ku nkunga ya Leta.

Guhangayika kwa mama gufite ishingiro, ariko nanone ntakwiye guhangayika kuko uburere nahawe na we kuva mvutse, inama ze, ngomba kuzigenderaho bihagiye.

Uwo ni we jyewe Gatesi, ndi umukobwa utari muremure cyane ariko sindi na mugufi. Nta mikufu njya nambara, nta maherena, umusatsi wanjye ndawogosha iyo ukuze kuko sinabona ubushobozi bwo gushyiraho imisatsi cyangwa kudefiriza, ariko ntacyo bintwaye kuko ndabimenyereye.

Aho noherejwe kwiga nasanze mu bo twize hamwe bose nta we boherejeyo, ubwo ngiye guhanga inshuti nshya, ntangire ubundi buzima bushya.

Mama yikokoye ambonera ayo kwishyura icumbi, ka matora naryamagaho mu rugo niko nazinze ndi bukajyane, ntabwo naririra byinshi kandi ntari bubibone.

 

***************

TUGERE KU ISHURI

 

Abanyeshuri bashya bari kuhagera ari benshi, abakobwa biga mu mwaka wa mbere bemerewe gucumbikirwa, bakuru babo bo mu yindi myaka nibo bari kubafasha kumenyera kaminuza.

Gatesi na we arahageze, asanganirwa n’abakobwa batatu beza, bambaye udupira tw’umweru dusa, amapantalo y’amakoboyi n’udukweto dufunze. Banambaye kandi ingofero z’umukara, bisukishije ibitendera mu mugongo.

Bari kugenda baganira mbere yuko bamugeraho

Jolie: Noneho ariko uyu mwaka haje abaturagekazi benshi weee!!!! ndebera nk’uriya tugiye kwakira uko ameze

Sheilla: Buriya sha wasanga atari ubuturage ahubwo ari ubukene. Urabona kariya gakobwa atari keza? Ukuntu disi kambaye rukubitihuku n’agasatsi ka penke. Ubanza ari nzakagendana pee

Jacky: Ushaka kuvuga se ko abiyogoshesha bose ari abarokore? Reka sha wasanga ari ubukene cyangwa style twe tukaba twarasigaye inyuma. Ahubwo uriya ndamwikundishaho azanyigishe style zo muri antiquite

 

Bahise bose basekera rimwe bakubitana mu biganza nuko bakomeza kwegera Gatesi. Ubwo nawe yari arimo agenda yikoreye akavarisi ke ku mutwe, indobo na matela mu ntoki, mbese wagira ngo agiye mu mashuri yisumbuye.

 

Aho ari na we yagendaga yivugisha mu mutima:

 

Mana wee!!! ubu se aba bantu bose ndi kubona biga hano koko? Ubu nzabamenya bose se? Ese ubu bagira rimwe muri refe cyangwa barya mu ma series? Ese ubu animatrice bose abona uko abacunga cyangwa bariyobora? Nako bambwiye ko muri kaminuza buri wese akora ibimujemo ngo baba bakuze. Ubu nzamenya ishuri nigamo se? Ubu koko aha nzahamenyera bigenze bite?

 

Yari akiri kwivugisha ni bwo bahise bamugeraho baramusuhuza nuko baramwibwira

 

Uraho. Jyewe nitwa Jolie ndi gusoza muri Office management. Aba bagenzi banjye, uyu yitwa Sheilla we yiga level two muri Business Administration naho uyu we ni ikimene yiga Computer engineering ari muri level three. Tuje kukwakira no kukwereka aho uzarara, tunagutembereze campus yose unatubaze ibibazo byose ufite. Wowe se witwa nde

 

Jye nitwa Gatesi Christine, nturutse mu karere ka Nyamasheke, nkaba nje kwiga muri Law.

 

Waouuu! Ntiwumva ko na we uri ikimene, ahubwo iga vuba uyasoze ubundi uzatuburanira twakoze amabara tu. None se kuki ivarisi wayikoreye ntiwabonye ko ku muhanda hari abakarani ngufu bari kugutwaza ukabatera deux cents gusa

 

Nabonaga aho njya mpageze kandi nanone nabonaga nta mpamvu yo gupfusha ubusa amafaranga. None se ko mumbwiye ngo mugiye kunyereka aho nzarara, iyo dortoire ni nini tuzabanamo namwe?

 

Oya ntabwo turara muri dortoire, ayo ni amagambo yo muri secondaire uyibagirwe. Wasanga ubwo uzanavuga ngo turira muri refectoire!

None se ubwo twarira hehe handi hatari muri refe? Ese ubundi ko mbona abantu ari benshi ubu kurya ni mu ma serie cyangwa hari refe nyinshi?

 

Yewe ufite ibibazo byinshi ngwino tubanze tukwereke aho uzarara, ibindi turabikubwira byose turi kugutembereza, wowe humura utuze byose uzabimenya unabimenyere, natwe niko twaje

 

Iki kiganiro cyose cyari kuba hagati ya Jolie na Gatesi, Sheilla na Jacky bo bari bibereye mu gufata selfie, no kohereza amafoto kuri bagenzi babo.

 

Baramuherekeje bagana ku macumbi y’abakobwa

***************

KU RUNDI RUHANDE

 

Hano turahabona Thierry na Yvan, abasore bikundira ubuzima bworoshye. Bageze mu mwaka wa gatatu ariko biga gacye gashoboka. Gusa bahorana amafaranga menshi, ntiwamenya aho bayakura. Ikiganiro cyabo cyaratangiye

 

Yvan: Ariko man Titi, ko mbona uyu mwaka haje utujiji twinshi noneho condoms ntizizatubana nkeya?

Thierry: Yvan wa murezi we bariya batoto bavuye muri za Mbyo na Mushubati, za Gasetsa na Ndego ntabwo nakambara wallah. Nzamanuka kizimbabwe bariya nta gasimba baba bafite mwana. Jya utinya abavukiye muri city nibo bashobora kukuraburiza, yanakubeshyera ngo wamuteye umuntu kandi uri ingumba

Yvan: Man jyewe ndatinya kuba nakangiza umwana w’abandi nkanamutera ibibazo. Uyu mwaka nintasujyura mo nka batatu ariko ntirizarema tu. Nta kuntu hariya haburamo udusugi.

Thierry: None se urumva isugi hari umugera yaba ifite nyine we kadage? None ngo udushashi? Nzajya nkambara ngiye guhura na Rosine. Uziko we ubwe yanyibwiriye ngo abasore bose bakundanaga baramuryaga mwana. Kandi ngo hari n’uwamuryaga bango

Yvan: None se wa muswa we uretse ko wa mugani injiji ari abize, ntuzi ko hari abantu bavukana ubwandu? None se ubwo nuba ari we muhura rahira ko utazanyara ku kayiko? Shahu nazakurwaza nguseka. Nyine uri ishumi yanjye ariko sinjya mbabazwa n’abiyahuzi

Thierry: Ibyo bivemo ahubwo umbwire gahunda z’umukire aho zigeze

Yvan: Sha umukire yarambwiye ngo uyu mwaka nitwitwara neza noneho azajya adupangira ku madolari apana amanyarwanda. Nawe urabyumva tugomba gukora ijonjora neza twitonze nta guhubuka, ubundi akazashima na twe akadusiga ku noti.

Thierry: ariko man ko ibintu uriya mukire adukoresha njyewe bindya ahantu. Nsigaye numva nazabivamo

Yvan: Ariko ntuzi ko igihugu kitubwira kwihangira imirimo wowe? Uziko tubikoze neza twazarangiza kwiga tutaririye muri ndagaswi tutanaraye muri ghetto ya fake. Ngaho reba ukuntu wifunze. Urumva se nubivamo uzabaho ute? Abana wisengereraga ntawe uzongera kukwiteza. Iyo Apple wari kuzapfa uyiguze wa njiji we? Utantera umujinya ahubwo

Thierry: Mpfubiriza shumi. Nyine ni kwa kundi intekerezo ziyongoza ibindi tu. Ngaho se mbwira deal nyine neza

Yvan: Umva nigga, iki cyumweru tugomba kubanza kwiga umushinga neza ubundi nzakwereka uko tuzikina. Sibyo shumi. Ahubwo hindukira urebe inyuma yawe

 

Yarahindukiye nuko ahita yiyamirira:

 

Abonye iki se?

 

Biracyaza…

2 comments

  1. Aba basore ko mbona bafite amarere no gushaka gushyira ubuzima bwabo mu kaga bishora mu ngeso mbi n'ubwo mbona babimenyereye Nzaba ndora amaherezo yabo

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s