Ubuzima

Mabukwe: Agace ka 21

(Willy)

Twihutiye kujya kwa muganga, dore ko batari banatubwiye udushaka uwo ari we.

Tugeze aho bakirira abarwayi twavuze ko duhamagawe ko hari umurwayi udukeneye byihutirwa.

Umukozi wo ku bwakiriro yaturangiye ko uwo murwayi bamujyanye mu ndembe nuko twihutira kujyayo.

 

Ubwo twageraga yo twasanze abaganga bazengurutse igitanda nuko turebye dusanga ni Ismael uryamye aho.

 

Akitubona yagerageje kundembuza nuko ndamwegera mwegereza ugutwi ariko ananirwa kuvuga. Icyo yakoze yampereje urupapuro yari afite, nuko aba ashizemo umwuka.

 

Twujuje impapuro zisabwa zose, nuko bamujyana mu buruhukiro.

 

Twaratashye ariko tubanza kunyura kuri burigade gusaba ko bakemerera mama akazaza gushyingura, na bo batubwira ko nta kibazo bazamuherekeza akaza.

 

Mu gutaha nafunguye rwa rupapuro. Rwarimo inyandiko ndende, gusa yasozaga ivuga ko nzayisomera ku gituro cye tugiye kumuhamba.

 

Nategereje umunsi wo gushyingura, nuko ubwo abantu bose bari bamaze kuhagera, nsaba ijambo uwari ayoboye gahunda

 

-Bavandimwe mwese muteraniye hano, uyu muvandimwe mbere yuko ashiramo umwuka hari urupapuro yampaye, kandi yansabye kuzarusomera abantu bose mbere yo kumushyiraho itaka. Reka rero ndubasomere uko rwanditse

 

Uru rwandiko niba ruri gusomwa ni uko ntakiri ku isi. Kuba ntari ku isi nta n’umwe wabigizemo uruhare, ahubwo ni umwanzuro wanjye bwite nafashe, kuko nari maze kwisuzuma nsanga ntagikwiye kuba hamwe n’abantu.

Sinafashe uyu mwanzuro mpubutse ahubwo nabitekerejeho igihe gihagije.

Ndasaba imbabazi umuryango wa Willy na Jasmin kuko narabahemukiye bikabije. Guhera ku mafaranga bampaga ngo niteze imbere, jyewe nkayajyana mu bagore no mu rusimbi, yashira nkagaruka nsaba ayandi. Ibyo bankoreraga byiza nta gaciro nabihaye, ahubwo mbirengaho nifuza ibirenze. Ndabasaba imbabazi kandi kubera icyaha ndegakamere mperutse kubakorera, ari na cyo cyatumye mfungwa. Nari mbizi ko nzakatirwa imyaka irenga 20, ariko numvaga ntazabasha kwihanganira iyo myaka yose, no gukomeza kurebana na Jasmin n’igikomere namuteye. Nsabye imbabazi rero.

Nyamara kandi nubwo nsaba imbabazi, sinabura kunenga no kugaya masenge kuko ibyo nakoze byose ari we wabingiragamo inama. Nta mubyeyi ukwiye gusenyera umuhungu we, niyo yaba atishimiye umukazana we. Gusa we ni yo ntego yari afite, nubwo atabashije kuyigeraho kuko mubyara wanjye Willy akunda umugore we kandi azi agaciro ko gushinga urugo. Ndabimushimira rwose. Naho masenge, niba ari aho uru rwandiko ruri gusomerwa, namusabaga kwatura agasaba imbabazi, akavuga icyo aziza umukazana we, nibwo azabaho atuje kandi yishimye. Ndamusaba imbabazi ko namufungishije, ariko nanjye si jye, numvaga ndambiwe gukomeza guhishira ukuri. Niba atiteguye kubivuga, uri gusoma uru rwandiko asome urundi rukurikiraho rugaragaza ibyo nshinja masenge byose ndetse n’icyo aziza umukazana we Jasmin.

Murakoze, muzarangwe n’urukundo iteka.

 

Narangije gusoma uru rwandiko abantu bose bifashe ku munwa, ariko mama we aho yari ari, ku mapingu aherekejwe n’abapolisi babiri, yahise apfukama hasi atangira kurira.

 

Abamwegereye bose batangiye kumwihanganisha no kumuhoza ariko we araboroga cyane. Twaratuje arabanza ararira, nuko asaba ijambo, bararimuha na we aravuga ati:

 

-Bana banjye narabahemukiye bikabije. Sinari nzi ko urwango nagiriye Jasmin rushobora kuba intandaro yo gupfa kwa Ismael, umwisengeneza wanjye rukumbi nagiraga. Namufataga nk’umwana wanjye, nyuma yuko Willy nibyariye ashakanye na Jasmin kandi ntaramukundaga.

Mu by’ukuri Jasmin nta kosa yankoreye ryatuma mwanga aka kageni ahubwo uwahoze akundana na Willy ni we wampumye amaso. Nawe se, yansuraga kenshi kandi uko aje akanzanira impano, iyo katabaga agapira cyabaga igitenge. Si uko hari icyo mbuze, ariko byanyerekaga ko ankunda kandi anyitayeho. Byatumye nanjye mukunda cyane ndetse mufata nk’umukobwa wanjye bwite. Ubwo Willy yambwiraga ko azabana na Jasmin, narababaye pee. Ndetse ubwo namenyaga ko Lea yabyaye umwana upfuye nababye cyane kuko nari nzi ko iyo nda yari iya Willy, ariko nyuma nabajije Lea arabihakana. Nakomeje kubigira iturufu ngo nshwanishe Willy na Jasmin ariko birananira. None dore icyo bibyaye. Ndababaye, ndigaya kandi ndicuza. Nabaye umubyeyi gito, narikunze ndakabya. Sinahaye umuhungu wanjye umutuzo n’ubwisanzure mu rugo rwe kuko namuhozaga ku nkeke, nshaka ko yirukana Jasmin nitwaza ko atabyara. Amagambo nakoresha ngo nerekane ko nicuza nayabuze, ariko muryango n’inshuti, ndabasaba imbabazi.

 

Naramwegereye ndamuhagurutsa, ndamuhanagura nuko ndavuga

 

-Mu by’ukuri uri mama kandi nzakomeza kubikubahira. Ibyo wakoze wabikoreshejwe n’inarijye no kwikunda, gusa wararengereye. N’abandi babyeyi bari hano bibabere isomo, iyo umwana wawe ashinze urugo, icyo aba agukeneyeho ni inama gusa, naho wowe nta kindi uba ukimukeneyeho kuko aba agomba kumenya uko azamura urugo rwe, na we akaba umugabo mu bandi. Rero mama ndakubabariye, kandi nzanasaba urukiko ko bakubabarira, kuko icyaha wankoreye sinari kugufungisha ubwanjye, ariko sindi hejuru y’amategeko, ni bo bazagena igikwiye.

 

Namaze kuvuga na Jasmin asaba ijambo

 

-Mabukwe arabizi ndamukunda ndanamwubaha nubwo mu minsi ishize yanteye kumwubahuka, ariko nabikoreshejwe n’agahinda n’umujinya. Jyewe ndamubabariye rwose kandi niteguye kumufata nk’umubyeyi niba yiteguye guhinduka.

 

Mama yahise yishima, arihanagura, imihango yo gushyingura irakomeza.

 

Nyuma…..

**************************

(Jasmin)

 

Ubukwe bwa Victoria bwabaye bwiza cyane, ndetse data yaje kugura rya vuriro yakoragamo, ariduhamo imigabane jyewe na Victoria ubu ni jye muyobozi ushinzwe abakozi naho Victoria ni we muyobozi waryo mukuru.

 

Narabyaye umwana mwiza w’umukobwa, kandi turishimye

 

Mu rukiko, kukouwashinjaga mabukwe yari Ismael kandi akaba yari yapfuye, batubajije niba twe hari icyo tumushinja, tuvuga ko twamubabariye, kandi nta cyaha gikomeye yadukoreye, icyakora we yemeye icyaha cyo kudutesha umutwe no kutubuza umutekano akatirwa amezi ane gusa n’ihazabu y’amafaranga, ubu yarafunguwe. Ni we mubyeyi wa hafi mfite, tubanye neza ndetse turakundana cyane pee.

 

Claudine ubu aba iwabo, kandi namuhaye akazi ku bitaro, ubu ni we ushinzwe iberekeye amasoko ku bitaro. Ni inshuti ikomeye y’umuryango

 

Mama na papa nta kibazo bafitanye ku bya Victoria, ubu babanye neza nka mbere kandi mama angira inama buri gihe yo kubabarira umugabo wanjye ku ikosa ryose yankorera kuko urukundo nyarwo rubabarira byose, rwihanganira byose

 

Umugabo wanjye Willy aracyari icyitegererezo cyiza haba ku kazi ke, mu baturanyi ndetse ni inshuti yanjye. Nishimira kuba ubu mbayeho ubuzima bwishimye.

**********************

(Lise)

 

Nubwo abana banjye(umuhungu n’umugore we) ubu tubanye neza, ariko mu mutima mporana agahinda. Kwikunda kwanjye n’urwango rudafite ishingiro byanteye kwihekura, kuko kwiyahura kwa Ismael ni jye byaturutseho. Iyo ntamushora mu mugambi wo gushaka gutandukanya Willy na Jasmin ibi byose ntibiba byarabayeho. Mwa babyeyi mwe, mujye mureka abana banyu bisanzure mu ngo zabo, mwirinde kubatesha umutwe. Erega baba bakeneye nabo guharanira iterambere ry’ingo zabo. Rwose ibyambayeho bibere isomo buri mubyeyi wese kandi Imana ikomeze impe imbaraga zo kwakira ibyambayeho

Abakazana nka Jasmin siko baboneka hose, ubu rwose arankunda nk’aho nta cyabaye, ajya ansigira umwuzukuru agiye ku kazi akagaruka kumutwara atashye, ajya ansura akankorera isuku, akamfurira, mbese ntiyigira nk’umwana nibyariye. Azi imirimo yo mu rugo kandi iyo afite akanya arabyikorera.

Umuhungu wanjye Willy ndamushima, niyo nakisazira nzagenda nishimye kuko nzaba nzi ko nsize intwari, imfura, umugabo nyawe

 

IHEREZO

 

Musomyi, ngushimiye akanya kawe watanze ugasoma iyi nkuru. Ndasaba imbabazi kubera ko inkuru itagiye iza ku gihe neza, byaterwaga n’indi mirimo nabaga ndi gukora. Ndizera ko buri wese wasomye iyi nkuru ayikuyemo isomo: abasore, inkumi, abagabo, abagore, ababyeyi, buri ruhande rwose harimo ibirureba. Nongere nti mwarakoze kuyisoma no kuyitangaho ibitekerezo

Umwanditsi

BIRAMAHIRE Francois JASSU

Tel: +250788553260

Email: fbiramahire@gmail.com

3 comments

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s