Ubuzima

Mabukwe: Agace ka 20

-Allo. Bite Rose?

-Mabuja mukecuru aracyapfukamye muri salon kandi na zamu ambwiye ko hari imodoka irimo abapolisi ihagaze ku gipangu

-Yakubwiye se ko bashaka iki?

-Ngo baje gushaka mukecuru kuko bageze iwe bababwira ko ari hano.

-Shyira zamu terefoni abahe tuvugane

Nahise mbwira Willy ko bagiye gufata nyina kandi akiri iwacu, nuko muhereza terefoni ngo avugane n’abapolisi

-Allo. Muraho afande

-Muraho. Ko umuzamu wawe adafungura tumene urugi se?

-Oya mwihangane ngiye kuhagera nanjye nze tuvugane mbere yuko mumufata

Twarihuse mu minota micye tugera mu rugo.

Twinjiranye n’abapolisi bari baje gufata mukecuru, nuko basanga akiri aho twamusize apfukamye.

Naramurebye ngira impuhwe, nuko Willy amusaba guhaguruka

-Mama, si jye ntanga imbabazi ku byaha bya Ismael, kandi ubu tuvuye kuvuga ibyo aregwa ku rukiko. Yavuze ko mu byaha ashinjwa ari wowe nyirabayazana kuko yabikoze ari wowe umutumye. Aba bapolisi rero baje hano kugufata bajye kugufunga bakomeze iperereza kuri ubwo bufatanyacyaha.

-Mwana wa. Uratinyutse uramfungishije? Wiyibagije ameze icyenda nagutwise koko? Wiyibagije ko ari jye nakonkeje, ukaba ugeze aho uri ubu?

-Mama, numara kumenya icyaha cyawe n’ikosa ryawe, niteguye kukubabarira. Si jye ngufungishije, ufungishijwe no kwica amategeko, ubugambanyi, kumbuza umudendezo, n’ibindi bazakubwira. Naho si jye ngutanze utanzwe n’umwisengeneza wawe, kandi ngo ibyo yakoze byose nkwibutse ko ari wowe wamutumaga. Ese ubundi mama wamporaga iki? Koko kugeza ubwo ugambirira ubugome bugeze aha? Jasmin yagutwaye iki gituma ushaka ko dutandukana

Yabaye agiye kunsubiza abapolisi bahita bamuhagurutsa bamwambika amapingu baramutwara. Bamubwira ko ibyo ashaka kuvuga azabivugira mu rukiko imbere y’umucamanza, kuko kubivuga ubu ntacyo byahindura.

*******************

(Ismael)

 

Aho nari muri gereza natangiye kwibaza ibyo nanyuzemo byose, urusimbi, ubusambanyi, ubuhemu, ubwambuzi, ubujura, nsoreza ku gufata ku ngufu umugore wa mubyara wanjye. Numvise isi indangiriyeho. Niyo nafungwa nkazafungurwa, ubu koko nzarebana gute mu maso na mubyara wanjye n’umugore we? Ese masenge we mfungishije, ubu azongera kunyita umwana we?

Ibi byaha byose nakoze ntibinyemerera kubana n’abandi peee. Ndaje ndebe undi mwanzuro nafata kuko sindi umuntu nabaye inyamaswa

**********************

(Jasmin)

 

Nyuma y’igihe nasubiye kwisuzumisha inda nuko muganga ambwira ko iri gukura neza, ndetse nta kibazo cyihariye mfite ariko ansaba gukomeza kurya neza no kunywa bihagije. Uwo munsi njyayo natunguwe no guhurirayo na Victoria, kandi mbona abakozi bose bamwubashye cyane. Mvuye mu isuzumiro nagiye kumusuhuza

 

-Uraho

-Yoo. Jasmin bite?

-Ni byiza. Ko uri hano se urarwaye nawe?

-Oya. Ni jye nkuriye inama y’ubuyobozi y’ibi bitaro. Ntiwari ubizi se?

-Oya pee. Uzi ko burya ukomeye wa.

-None se wowe bite? Warwaye?

-Oya ndatwite ahubwo nari jye gupimisha inda.

-Eeeeh. Felicitations sha. Ni byiza rwose. Ese n’ubu nturava ku izima koko? Uzi ko ubukwe buri mu mezi ane ari imbere. Ndifuza ko uzabutaha rwose nka murumuna wanjye

-Vicky, Imana ishimwe yo itumye duhura. Iyi minsi nanyuze mu bihe bikomeye rwose kandi byanyigishije byinshi. Niteguye rwose kuzaguhuza na papa kandi nizeye ko azakwakira mu bana be. Na mama nzabanza mutegure mu mutwe ku buryo bitazahungabanya urugo rwabo

-Ndagushimiye cyane. Ahubwo bigire vuba vuba rwose.

 

Naramusezeye ndataha, mpamagara musaza wanjye mubwira byose bya Victoria, nuko na we aranyumvira anyemerera kubwira papa tukazahurira ahantu

 

Ntibyatinze umunsi twagennye warageze nuko turicara na papa, mpita mubwira ntaciye ku ruhande

 

-Papa, turagukunda kandi nawe uradukunda. Watubereye umubyeyi mwiza ntacyo twakuburanye. Gusa hari kimwe namenye vuba aha wakoze mama atabizi natwe tutabizi, kandi wacyirengagije nkana. Hari umukobwa witwa Victoria, yaransuye aranyibwira ananyereka impapuro zose zerekana ko uri se. Ese n’ubu nturava ku izima ngo umwakire mu bana bawe?

 

Papa yahise apfukama imbere yacu, aratura

-Bana banjye, mundushije ubutwari. Mubaye intwari jye nabaye ikigwari. Rwose nagize isoni, numvaga ntaho nzahera niyemerera ko nahemukiye nyoko nkamuca inyuma nkanabyara. Ubu niteguye kumwakira ubwo namwe mubizi, kandi murakuze mwese buri wese afite urugo rwe. Nyoko we asanzwe abizi, ahubwo igihe cyose abimbajijeho mugira umusazi. Ese uwo mukobwa wanjye ari hehe koko?

 

Nahise mpamagara Victoria ngo aze asuhuze papa, kuko nari namubwiye ko nitumukenera turi bumuhamagare. Na we ntiyazuyaje yahageze vuba, agikubita amaso papa, araturika ararira. Papa na we ntiyihanganye yarahagurutse amugwamo, bose amarira abazenga mu maso

 

Papa: Uraho mwana wa? Ni wowe se ungana gutya?

Victoria: Uraho papa. Ni jyewe, kandi rwose ndishimye kuba munyakiriye.

 

Bamaranye iminota nka 20 bagihoberanye, nuko nyuma dukomeza ibiganiro

 

Victoria: papa n’abavandimwe mbashimiye urugwiro munyeretse. Nari maranye intimba imyaka myinshi, ndetse nyuma yo kubura mama nahoraga nibaza amaherezo. Mboneyeho kubatumira mu bukwe bwanjye buzaba mu mezi macye ari imbere, kandi mbasaba kuzanshigikira nk’umuryango, papa na musaza wanjye na murumuna wanjye mundi iruhande. Bizanezeza cyane. Kandi ntabwo nzabatera impagarara ku mitungo, rwose uko mbayeho birampagije, icyo nshaka ni umuryango

 

Papa: Mwana wanjye nkwemereye inkunga yose umubyeyi aha umwana we, ndetse gusaba no gukwa bizabere iwanjye niba ubyemeye. Sinshaka kuzasaza nabi nicuza ibyo nakabaye narakoze mbere.

 

Musaza wanjye: Ibyo muvuga byose mwibuke ko mama aya makuru atarayamenya. Ndumva byaba byiza dushatse umunsi wo kwakira Victoria mu rugo, mama akaba yarabitegujwe. Niho byose bizagenda neza.

Papa: urugo ni urwanjye sha nyoko ntantegeka.

Jasmin: papa wikihagararaho kuko iyo ruba urwawe gusa wakabaye warakiriye Victoria hakiri kare. Nanjye nshyigikiye kuzakira Victoria umunsi nugera, nibwo byose bizanyura mu mucyo. Nzaza mu rugo dufatanye kubibwira mama

Twarasangiye, turanezerwa nuko twiyemeza umunsi wo kuzahuriraho. Twari turi hafi gutandukana ubwo nabonaga Willy ampamagaye

 

-Allo

-Allo cherie. Uri hehe mbese?

-Ndi kumwe na Vicky na papa

-Vicky se kandi ni uwa he

-Ni wa mushyitsi uheruka kuza mu rugo agasanga ugiye kugenda. Burya duhuje papa. Ibindi nzabikubwira. Ko umpamagaye se ni amahoro?

-Tebuka duhurire kwa muganga barampamagaye ngo hari umurwayi udukeneye byihutirwa kandi ngo ameze nabi cyane

 

 

Uyu murwayi se ni nde kandi uri kwa muganga igitaraganya?

 

Biracyaza….

4 comments

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s