Ubuzima

Mabukwe: Agace ka 19

(Willy)

 

Narasohotse kureba umuntu udushaka icyo gitondo cya kare nsanga ni Claudine. Natunguwe nuko adusuye mu gitondo, dore ko kuva yagera mu gihugu yari ataraza iwanjye. Namuhaye karibu nuko nsubira mu cyumba kubwira Jasmin ko umuntu udusuye ari byiza ko aza tukamuganiriza turi kumwe.

Akimukubita amaso nabonye ahindutse, ashaka gusubira inyuma atamushuhuje ariko arisubira aramuramutsa

 

-Uraho

-Uraho mada. Uzi ko ifoto neza neza zitabeshya

-Ifoto wazibonye hehe?

-Wasanga Willy atarakumbwiye kandi? Yajyaga anyoherereza amafoto yawe rwose n’ayanyu muri kumwe

Nahise mbaca mu ijambo

-Jasmin, uyu ni Claudine, umwe wahamagaye ukitaba ntavuge. Nanditseho Claude bitari ukujijisha nkuko ubikeke ahubwo twamenyanye kubera musaza we Claude twiganaga. Claudine, uyu ni Jasmin umugore wanjye

-None se Willy, ntaciye ku ruhande ushaka kuvuga ko umwana wa Claudine atari uwawe?

Twahise dusekera rimwe twese kuko twari tuzi ukuri kandi nari ngize amahirwe Claudine arizana, nubundi nari mfite gahunda yo kuzamutumaho. Nahise nsaba Claudine kumusobanurira kuko wenda jye atari kwemera ukuri kwanjye

 

-Jasmin, umugabo wawe ntabwo twabyaranye ntitwanaryamanye kuko mufata ndetse mwubaha nka musaza wanjye. Ukuri ni uko ubwo natwaraga inda, umuryango waranciye ndetse bambwira kutazongera kumbona mu maso yabo, bitaba ibyo bakanyiyicira. Ariko musaza wanjye Claude we twarahuzaga, rero abinyujije muri Willy yanyohererezaga amafaranga yo kwita ku mwana nyuma yuko mvuye mu gihugu na byo mbifashijwemo na we. Maze rero amezi 6 ngarutse kuko papa wantotezaga yitabye Imana. Naje nje kumushyingura, mama ambwira kuhaguma kuko nubundi na we atari ashyigikiye ko nkomeza kwangara. Mbasuye bitunguranye kuko nyuma yo guhamagara nkumva ni wowe, nanze kuvuga ngo ntateza umwuka mubi mu rugo, numvaga ngomba kuza kwisobanura ngo hato bitazazana umwuka mubi mu rugo rwanyu. Ikindi ni uko hari umuntu uherutse kunyoherereza CD ambwira ngo ibyanjye na Willy arabizi kandi bizatuma asenya urugo rwe, mbona ko ntihutiye kubibabwira byaba ibibazo

************************

(Jasmin)

Amagambo ya Claudine nayumvise nitonze, ndetse numva ko burya guhubuka mu magambo atari byiza, kandi kubaza bitera kumenya. Ubu iyo mbigenza nka kera nari kuba narageze iwacu peee

-None se Claudine, uwakoherereje CD waba uzi izina rye?

-Yego yitwa Ismael. Sinzi aho yakuye amafoto yose kuko ni menshi

Willy yahise avuga

-Jasmin mugore nkunda, iby’ayo mafoto nari naranze guhita mbivugaho ariko nanjye iyo CD niyo nohererejwe. Kandi ukuri kose Claudine arakukubwiye nta kindi nongeraho. Ibyo namukoreye byose byari mu mwanya wa musaza we wangaga ko umuryango we na we umuha akato. Nta kindi cyera cyirabura kiduhuza.

-Wumve ngo Ismael yaje anyereka ifoto ya Claudine ambwira ko nimuha miliyoni 15 azamfasha gutuma Claudine asubira aho yaturutse ubundi nkiberaho ntuje

-Ese nicyo nawe yagushakagaho. Nkayoberwe impamvu yambwiye ngo nunsaba amafaranga menshi utambwiye impamvu nzahite menya ko hari icyo ushaka guhisha. Icyakora Imana ni igitangaza rwose.

Twari tukiri kuganira nuko terefoni ya Willy irasona, atubwira ko ari kuri polisi bahamagaye. Yarasohotse kwitaba nuko hashize akanya aragaruka

-Bambwiye ko Ismael ari gukorerwa dosiye kandi ubwo ari jye umushinja ngomba kujyayo kuvuga ibyo murega. Ariko bansabye ko njyana nawe nk’uwahohotewe. Itegure tugende rero.

Claudine we wabonaga byamucanze, ariko tumusobanurira ibyo turimo kuko nta rwikekwe nari mufiteho na rucye.

 

Nagiye kwitegura, ariko ubwo nasohokaga mu cyumba nasanze muri salon hicaye undi muntu ntari niteguye kubona icyo gitondo, ntanifuzaga kubona mu maso yanjye. Yari mabukwe, yari apfukamye imbere ya Willy

 

Naramwegereye ndamwitegereza umwanya, nuko ndamwubahuka (ubusanzwe naramwubahaga ariko rwose yarambabaje)

 

-Ese mukecu wacyetse ko umuhungu wawe yabaye padiri ko umupfukamye imbere?

-Mwana wa, nawe ndi bugupfukamire rwose ariko mufunguze umwana wanjye Ismael

 

Willy yahise amuca mu ijambo

 

-Mama, kuva navuka ntawundi nubahaga nkawe. Narakubashye ariko ubirengaho unsuzugurira urugo, unsuzugurira umugore. Ntupfukamye unsaba imbabazi zo kumvogerera urugo ahubwo uri gusaba gufunguza Ismael. Ese ubundi uzi icyo afungiwe? Niba ukizi umenye ibizakurikiraho. Niba utakizi, ushatse waza tukajyana aho afungiye kuko tugiye kujyayo, uri bukimenye. Gusa mfite ubwoba ko nukimenya ushobora kumusangamo, kuko amakuru nahawe ni uko icyaha ashinjwa ugifitemo uruhare

-Reka reka nkurahiye inkanda y’abakuru. Shwiiii. Kiriya kirara se ngituma nahuriye hehe na cyo. Umwana nabyaye ni wowe Willy wenyine, rwose nakureze neza sinigeze ndera kiriya guhararumbo cyirirwa mu nnyo z’abagore kinywa ibiyobyabwenge

-Ariko se mama uvugishije ukuri nta kintu wigeze utuma Ismael gukora?

-Mba nkwambuye mwana wa.

-Usanze tugiye rero, ubwo tuzabonana ikindi gihe ariko imbabazi usaba zo ntazo uhawe. Niba usigara upfukamye aho, niba uhaguruka ugataha, umwanzuro ni uwawe

 

 

Twarahagurutse turagenda, umukecuru tumusiga koko agipfukamye, tubwira Rose ko amuba hafi yasohoka agafunga, yagira ikindi kibazo akaduhamagara.

 

Tugeze ku biro bya polisi twasanze Ismael yicaye ari kuzuza imyirondoro badusaba kwicara tukavuga ibyo tumushinja

 

Jasmin: Njye ndamushinja kumpa uburozi bunsinziriza akamfata ku ngufu, akagerekaho kunshiraho ibikangisho byo kumufa amafaranga ngo ntayamuha akazabwira umugabo wanjye ko muca inyuma

 

Willy: Jyewe ndamushinja kunyinjirira mu rugo bujura, asimbutse igipangu. Nkamushinja iterabwoba rikoresheje video ambwira ko azandega ku mugore wanjye ko muca inyuma, akanagerekaho kunsaba amafaranga ngo yo gutuma aceceka

 

Bamaze kwandika ibirego batubajije niba dufite abatangabuhamya bemeza ibyo tuvuga,

 

Willy: Umukozi wacu wo mu rugo, ni umwe mu bahamya, undi ni Claudine kuko na we iterabwoba ryamugezeho

 

Jasmin: Nanjye umutangabuhamya mfite ni Rose umukozi wacu

 

Babajije na Ismael icyo arenzaho

 

Ismael: Ibyaha byose nshinjwa ndabyemera. Ariko nanjye nari mfite uwantumye, ndumva rero ntahanwa jyenyine. Gusa ndasaba imbabazi Willy ku bwo kumusambanyiriza umugore, byo nabikoze kubera irari, mu byo natumwe byo ntibyarimo harimo kumufata amafoto na video yambaye ubusa, ndasaba imbabazi kandi muramu wanjye Jasmin ku bwo kumusambanya. Gusa nashakaga no kumuhumuriza ko nubwo nabikoze ntifuje kumutera indwara cyangwa inda bityo nakoresheje agakingirizo.

 

Umupolisi yahise amubaza uwamutumaga nuko arasubiza

 

-Natumwe na nyirabukwe wa Jasmin ari we nyina wa Willy akaba masenge.

-Yari agamije iki?

-Ngo yifuzaga kubashanisha bagatandukana

-Ibyo uvuze uzabisubiramo mu rubanza?

-Yego nzabisubiramo byose

 

Nuko twese baradusinyisha, ariko tutaragenda babaza Ismael

-Uwo ushinja kugutuma, ni umufatanyacyaha. Ese uracyeka amenye ko ashinjwa na we yatoroka cyangwa nta kibazo yagira?

-Ahubwo se yarara mu gihugu?

-Tubwire aho aherereye n’amazina ye yose.

 

Yarabibabwiye, tubona barongoreranye, maze babiri mu bapolisi bari aho bahita basohoka burira imodoka mbere yuko dusohoka baragenda

 

 

Ese bagiye hehe? Aho ntibaba bagiye gufata uyu mukecuru bakamufunga?

 

Biracyaza….

5 comments

  1. Akwiye gufunga akareka imico.mibi.isomo….ntukagirire mugenzi wawe nabi kuko ejo hazaza ntawuhazi.kandi imipango yabantu siyimana.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s