Ubuzima

Mabukwe: Agace ka 15

Bucyeye mu gitondo umwanzuro nari nawufashe. Nari niyemeje kubwira Willy ibyabaye byose. Natangiye kwibaza aho mbihera nubwo ikosa ritari iryanjye. Ubwoba si uko anshinja ibinyoma ahubwo ndaba mwiciye umunsi nanateye ikibazo hagati ye na mubyara we. Ese arahita abifata ate? Nanjye siniyumvishaga impamvu Ismael yankorera biriya pee.

-Ngiye gukora siporo. Tujyane?

-Oya ndumva ntameze neza. Ese wowe wabyihoreye ubundi?

-Ubwo uraje nawe. Ngomba kujyayo Steven arantegereje turakorana uyu munsi

-Gusa mfite ibintu nshaka kukubwira ntutinde gutaha

-Iyo mpamvu iratuma nkora vuba. Ni aho mu kanya

 

Amaze kugenda nararyamye. Numvaga ntameze neza kubera ubwoba, stress no guhangayika cyane. Natekereje kubibwira mama ariko nibuka ko abimenye yahita abibwira papa nawe akabibwira musaza wanjye intambara ikarota. Ese kuki koko Lise yambereye mabukwe? Mbega shitani yihishe mu muntu

 

Terefoni yarasonnye ndebye nsanga ni iya Willy. Ashobora kuba yari yayibagiwe cyangwa akayisiga ku bushake kuko atari gutinda gutaha. Nabonye handitseho Claude

 

-Alloo

-Alloo

-Yewe Claude!!!

Yakomeje guceceka nuko arakupa atavuze. Uyu Claude se ni nde kandi we? Ubusanzwe kwitaba terefoni ya Willy iyo yayisize yarabinyemereye. Nagiye kuyirambika mpita mbona wa Claude yohereje SMS. Nagize amatsiko yo kuyisoma mfunguye nsanga harimo izigera kuri eshanu zose. Nubwo ntasanzwe nsoma SMS za Willy ariko ubu bwo nagize amatsiko.

“Ndagukeneye byihutirwa kuri banki hari ikibazo”

“Ntiwibagirwe ibyo wanyemereye kandi”

Izi SMS nahise nishyiramo ko atari iz’umugabo ahubwo abagore ni twe tugira ingeso yo kwandika SMS ngufi gutya. Byanteye amatsiko yo gufungura SMS yindi, ariko yo yatumye umutima usimbuka

 

“Sheki bayanze kandi Ivan afite umuriro. Namuhaye efferalgan ya sirop ariko nkeneye kumuvuza nkamenya ikimutera uwo muriro”

 

Nagiye gusoma indi numva imirindi mpita nzimya terefoni nyisubiza aho nayikuye. Uyu mugore se ni nde? Will ni umuhanga cyakora. Kwandika izina ry’umugabo ku nimero y’umugore?

 

Urugi rwarakingutse nubuye amaso nsanga si Willy ahubwo ni Ismael.

Nahise mbyuka bwangu

-Urakora iki hano?

-Nshaka kukuvugisha utuje

Yahise akinga urugi ashyiramo n’ipata

-Ndakwinginze ntutabaze, nshaka kukuvugisha kandi sintinda

 

-Banza umbwire ibyo wakoze. Wankoze ibiki Ismael?

-Nacyetse ko ubizi ko mu muryango wacu iyo umugabo apfuye umuvandimwe we ahungura umugore. Ubwo rero Willy nta mugabo wundi bavukana..

-Ubwo se ushaka kuvuga iki

-Ndabizi wishyizemo ko ibyo twakoze ari amahano ariko si yo. Ese uzi impamvu nticuza ibyo nakoze? Niba ubona umugabo wawe akize byose abikesha mama wanjye. Uko umubona kose ni we abikesha

 

Yambwiye ko mu myaka 25 ishize, nyina wa Willy yamusize mu nzu wenyine akisohokera. Ku bw’amahirwe nyina wa Ismael yarahahingutse asanga Willy ari hafi guhera umwuka kuko yagiraga ikibazo cya asima. Kuva icyo gihe rero ubwo kubaho kwe ni we yabikesheje kuko iyo ataba we aba yarapfuye.

Ariko nakomeje kwibaza ibyo niba bifite aho bihuriye no kuba Ismael yaramfashe ku ngufu ntabizi

 

-Ismael, uri..

-Ndi mubi, umunebwe, umugome, bihemu, nyita uko ushaka. Rero ikinzanye nshaka ko ubwira umugabo wawe akampa amafaranga, utabikora nkabimubwira byose

-Shyuhuhuuu, umva inzira iraharuye rwose genda umubwire udasize na gato. Ni hahandi uzahora uri umutindi

-Uko ubishaka

 

Yahise asohora urupapuro mu mufuka we ararunyereka. Yari ifoto iriho umugore uteruye umwana

 

-Uzi ngo ufite umugabo mwiza Willy, muri abakire, kandi utazi ibyo akora iyo atari hano. Iyi foto ntacyo ikubwiye? Niba utari ubizi uyu ni we mugore nyawe wa Willy. Ndabizi wamwumviseho. Yitwa Claudine kandi uyu mwana we ari hafi kuzuza imyaka ibiri. Kandi ntawundi uzi ko bahari uretse jyenyine. Nako umugabo wawe ngo uzi ko atabikora

 

Yashubije ifoto mu mufuka nuko arakomeza

 

-Bahoze baba mu Budage ariko vuba aha Willy yarabimuye arabiyegereza kuko guhora ajya kubasura byari kuba ikibazo. Ubu rwose bari I Kigali. Uracyeka masenge ari we nyokobukwe namenya ko afite umwuzukuru bizagenda gute? Nawe umwanzuro urawumva uzahava ahicare kuko wowe nta kana ariko we yarabyaye

 

Yahise ahindukira ngo agende

 

-Ba uretse

-Nshaka miliyoni 15, zitagabanyuka

-Ngo zingahe?

-Kora uko ushoboye umbonere ayo mafaranga nta kindi. Ubundi nzayakoresha nshaka uko uwo mugore n’umuhungu we basubira aho baje baturuka, asigaye nanjye nyaryohemo na we usigarane umugabo wawe, nanjye sinzavuga ibyabaye hagati yacu

-Wanteye imiti turyamana nzi ko ari Willy, none urumva nakwizera gute?

-Gabanya ubwana n’ubujiji, utekereze neza. Willy namenya ko twaryamanye urumva azabifata ate? Ko natakwica azahita aguta akisangira ihabara rye?

-Ariko ayo mafaranga yose sinyafite Ismael niyo nayagira sinayaguha. Ahubwo Willy atinze gutaha nkamubwira ko wamfashe ku ngufu ukareba ko utazaborera muri gereza

-Ariko Jasmin ntukiyemere. Ese ucyeka ko ari wowe munyabwenge wenyine kuri iyi si? Ahubwo reka duhangane uzabone ko ntakina jyewe

-Nta bwoba mfite sha. Hita unsohokera mu nzu vuba ahubwo

-Sha itegure uzambona. Kandi ntuzanyinginge kuko nzahita nyakuba kabiri umpe 30

 

Uru rugamba se ruzarangira rute? Ese koko uyu Claudine ubu si we Willy yise Claude?

 

Biracyaza…

6 comments

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s