Ubuzima

Mabukwe: Agace ka 14

Naratunguwe. Nibyo koko twese iwacu twari tuzi ko papa hari umwana yabyaye hanze. Iyo nda yari yarayihakanye, gusa mu rugo ntitwigeze tubitinaho kuko uwo mwana yamubyaye atarabana na mama, niko yatubwiye. Burya buri wese agira amateka ye y’ahahise, amakosa utabasha gusibanganya, gusa kuri papa ntibyabaye amakosa yanageretseho kwirengagiza. Nta kibabaza nko kumenya ko ukurera atari we wakubyaye ariko nanone ukababazwa no gusanga uwakubyaye atifuza kukumenya ndetse atanemera ko yakubyaye. Harakabaho abahanga bavumbuye ubuhanga bwa DNA kuko ubu niyo isigaye ari kamarampaka

 

Victoria, sinahakana ko duhuje papa, kuko kugeza ubu nta cyakozwe cyo kwemeza ko atari we wamubyaye koko

-Hari umugabo umaze gusohoka. Ni umugabo wawe? Ni mwiza peee

-Yego ni we mugabo wanjye

-Wanyemerera se nkicara

-Yego ni karibu

 

Yaricaye jye nkomeza guhagarara

-Unyihanganire niba bikubangamiye. Ndacyeka uri kwibaza ikinzanye hano

-Ahubwo ndibaza nyuma y’imyaka ihise yose? Kuki ubu ari bwo wigaragaje? Nanone kuki uje iwanjye ntujye kureba papa?

-Ntiyifuza kumbona. Kuva navuka ntiyigeze yifuza kumenya

-Bishoboke ko ashidikanya ko uri uwe

 

Nahise nicara, nshaka kuganira na we vuba Willy ataragaruka. Yego nanjye mfite ibibazo byanjye ariko nanone sinakihanganira kumva ko mfite umuntu duhuje data ariko akaba abyihakana

-Ese kuki utarindiriye basi ngo apfe ubone kwigaragaza

-Humura singenzwa n’imitungo

-Uhm

-Sinzi ko ari hafi gupfa ari bwo yanyibuka. Mfite akazi keza kampemba neza, mfite inshuti impa buri kimwe nkeneye. Icyo nshaka rero ni ukwakirwa mu muryango nkareka kubaho nk’utagira se kandi ahari

-Icyakora byo akazi kawe kakuguye neza pee. Gusa nshaka kukumenyesha ko ibyo kwakirwa atari jye bireba, data aracyariho ni we wakabibwiye. Na musaza wanjye ntibimureba

-Nyamara musaza wacu tumaze imyaka myinshi tuvugana. Kuva mama yapfa, ni we wanyitayeho ankura mu muhanda ampa icyerekezo cy’ubuzima. Ndabizi ntiyigeze abikubwira kuko nanjye yari yaransabye kutazigaragaza kugirango ntazana ibibazo mu muryango wanyu utuje. Ariko ubu ndi hafi gushyingirwa. Ibaze kujya mu kiliziya nta so, nta mwene so kandi ubafite. Urumva atari agahinda koko?

-Ihangane disi

-Wiba indyarya Jasmin. Ndabizi uranzi

 

Yakoze mu isakoshi yari afite nuko akuramo impapuro nyinshi

 

-Akira soma izi mpapuro. Harimo icyemezo cy’amavuko, izina rya mama, ibisubizo bya DNA test byasabwe na papa ahakana ko ntari uwe, nyamara ntabyiteho. Ikindi yababeshye ko ari jye mfura ye, ariko si byo kuko ndenda kungana nawe. Iyo avugisha ukuri, mama wanyu yari kumusiga. Urumva?

-Umva nkubwire

-Reka nkomeze ahubwo. Papa aho kunyitaho yaranyihakanye hamwe nanarwaraga mama yaza kumureba ntamuhe n’urupfumuye

-Ariko urarwaye?

-Yego ndarwaye nushaka ubivuge gutyo. Gusa ni indwara yakira. Icyo nifuza ni uko wagerageza byibuze ukampuza na data kandi akemera ko ndi umwana we

-Victoria, akababaro kawe ndakumva ariko sinshaka kwishyira mu bibazo na mama. Mbabarira. Niba data yaranze kwitwa so, afite impamvu ze ntazi kandi sinshaka kubyivangamo

-Nibyo koko. Simbikwifurije ariko nawe ishyire mu mwanya wanjye n’uwa mama. Uwagutera inda akakwihakana, akihakana umwana wabyaye, niho wakumva uburemere bw’ikibazo cyanjye. Gusa mbabajwe n’umwanya wanjye nataye nza kukureba, reka nigendere.

 

Yarahagurutse nuko arongera asubiza za mpapuro mu isakoshi arahaguruka aragenda

 

 

Nyuma y’amasaha icumi

 

Willy yari yaje, turaryama ntiyigera ambaza ku bya wa mushyitsi nanjye sinigeze mubaza aho yari yagiye

 

Gusa sinabeshya ko ibibazo bya Victoria bitampungabanyije. Gusa ibye birumvikana ni uko twirengagiza. Ukuntu kuva twavuka twabonaga data nk’umugabo uruta abandi bose kuba mwiza, none ndebera. Victoria ubu yari kuba abayeho atuje iyo data yemera amakosa ye hakiri kare.

Ese koko mama yari kubyitwaramo ate iyo amenya ko data yamuciye inyuma akanabyara? Ndamuzi yari guhita asaba gatanya

 

-Isabukuru nziza mukunzi wanjye

 

Nahise numva Willy ampobeye mu buriri.

-Ndabizi uri maso

 

Yahise abyuka agana kuri frigo nto iba mu cyumba akuramo icupa rya champagne

 

Nashatse nanjye guhita mbyuka ariko arambuza

 

-Guma ku gitanda

-Ariko ni isabukuru yanjye kandi dore ni saa munani mu gicuku

-Niba ari abaturanyi ufitiye ikibazo byihorere

Yabivuze ansukira champagne mu gatasi k’icyayi

-Champagne mu itasi koko? Nzabibwira abakozi bawe baguseke

 

Twanyweyemo ku bw’imyaka 28 nari maze kuzuza nuko ampfuka mu maso akoresheje karuvati ye.

Yamfashe akaboko turamanuka tujya muri salon. Tugezeyo arampfukura. Intebe zose yari yazikuyemo ahubwo hari hashashe itapi nziza inyanyagijeho indabo zitukura. Amabuji ahumura yari azengurutse hose, hagati harimo indobo irimo champagne, amafunguro atandukanye ayizengurutse kandi ahumura cyane. Narahindukiye ndamwitegereza

 

-Ibi ni ibyawe mwamikazi w’umutima wanjye, wowe watumye mba umugabo wishimye

 

Nahise musimbukira mwitendeka ku ijosi

-Ngaho mbwira

-Iki cheri

-Kuva nagaruka ntiwishimye na gato

-Ibyo ni byo unkanguriye iki gicuku?

-Yego ni yo ntego.

Twaricaye nuko

-Nizere ko aya mafunguro utayashyizemo karye ukumve.

Yari amafunguro y’amoko yose: inkoko, umuceri, igitoki, ifiriti n’ibindi binyuranye

 

Yahise afata ikanya arantamika.

-Iyi gahunda iragutunguye?

Nibyo koko kuva na kera iyo nabaga mfite isabukuru yaransohokanaga muri resitora ziyubashye. Ubu rero kuba yahisemo kubikorera mu rugo rwose byarantunguye

-Byandenze cheri

-Ariko nta mpamvu yo gutungurwa cherie. Ntiwibuka uko twahuye koko

-Nizere ko uko utangiye ari ko uri bukomeze kuko iyi sabukuru imeze neza.

-Ndabyizeye. Uyu munsi nshaka utubere umunsi w’amateka

 

Yapfunduye divayi itukura arampereza nuko turanywa. Sindi umuhanga wo kunywa inzoga ariko ndagerageza. Twaranyoye nuko ikirahure kirangiye ashaka kunsukiramo indi

-Ushaka kunsindisha ariko Willy?

-Nshaka ko tuza kubikora umeze neza kandi bambwiye ko ka divayi gakora umuti neza

 

Nahise mureba ntunguwe. Numvaga ntashaka kuzongera kuryamana na we ntaramubwira ibya Ismael

-Windeba utyo. Muganga witwaza umbeshya twavuganye ambwira ko mufitanye gahunda mu byumweru bine biri imbere. Kuki wambeshye mbese? Ntugishaka ko turyamana cherie?

-Nyemerera nzakubwire ukuri kose ejo. Ntabwo ari ukutabishaka ahubwo mfite ikintsikamiye ku mutima

 

-Nta kibazo

 

Twakomeje ibirori bya twembi, tunaniwe turaryama.

 

Ese ejo azabivuga cyangwa azatinya?

 

…/…

2 comments

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s