Ubuzima

Mabukwe: Agace ka 13

(Jasmin)

-Ni iki ushaka kumbwira cyihutirwa ku buryo utategereza?

Yari Willy wari winjiye, yambaye neza ariko nta karuvati yambaye. Ariko disi Imana yampaye umugabo unkunda kandi mwiza. Arambara akaberwa. Nuko Ismael ahita amusubiza

-Naguhamagaye ariko ntiwigeze unyitaba

-Numvaga narakubujije kugaruka hano. None wahagarutse ugera no mu gikoni?

-Nyamara mfite ikintu cy’ingenzi nshaka kukubwira

-Tugende umbwire

Baragiye ariko Ismael asohotse andeba ijisho ribi nk’aho hari umugambi mubisha afite. Ese mbakurikire mpite mubariza imbere ya mubyara we? Ubu se ahise abihakana?

****************************

(Willy)

-Ngaho mbwira vuba nikomereze gahunda. Ni iki ushaka kumbwira

-Mfite ikintu cy’agaciro kanini cyane

-Umva nta mafaranga mfite yo kuguha

-Niyo byaba bireba umugore wawe? Abantu mwese mwangize ikirara, ngo narananiranye nyamara nshaka kukubwira ko nawe umugore wawe atari umutagatifu

-Ismael ndabizi ufata ibiyobyabwenge. Niba uyu munsi wafashe bicye cyangwa ukarenza urugero, ndabona ubwawe bwayaze

-Wabyanga wabyemera umenye ko ndi mwene wanyu naho umugore wawe ntiwishuke ngo umuzi bihagije. Ese ubundi ujya wibaza impamvu nyoko amwanga?

-Mama se kandi umuzanye ute muri ibyo?

Yahise akora mu mufuka w’ikoti yambaye anyereka ikintu arambwira

-Urabona? Iki ni igihamya ko ibyo mvuga ari ukuri. Niba ushaka kumenya byose ushyire za miliyoni icumi kuri konti yanjye ubundi

-Ariko ushaka aka munani si gusa?

-Yewe nigashaka kabe n’aka cumi nizereko utari injiji. Ibyo ngusabye ubikore cyangwa ubireke. Mbarira miliyoni icumi ubundi nkwereke ibyo umugore wawe asigaramo iyo udahari

Nakomeje kumutega amatwi nitonze kuko iyo haba kera ubu nari kuba namuteye inshyi. Nari nzi ko afite icyo ashaka kugeraho kandi umugore wanjye nari muzi bihagije. Niba rero hari ikibi ari kumushinja ashobora kuba yatumwe na mama cyangwa se akaba abangamiye inyungu ze.

-Umugore wanjye uramushinja iki

-Ushaka ikizibiti mbese? Iyi ni CD mfite hano. Kandi si CD ibonetse yose kuko kuyibona biragusaba miliyoni icumi

-Izo miliyoni ndaziguha. Ngaho mpereza iyo CD

-Are we. Maze nyiguhe uhite uyishwanyaguza kandi ariyo yonyine mfite yo kumushinja. Ahubwo dore uko bimeze. Ayo mafaranga nzayahabwa n’umugore wawe

-Ndumva wasaze burundu

-Mu minsi micye iri imbere nagusaba amafaranga menshi kandi ntakubwire icyo agiye kuyakoresha, uzayamuhe kuko azaba ari jye ayazaniye nawe nzaguha iyi CD. Ariko natagira icyo akubaza ndabyemeye nzitwe umubeshyi

Naramwitegereje mbona ko nikururiye icyishi. Amakosa yose yakoraga naritambikaga nkamutabara yewe niyo yibaga narishyuraga ngo adafungwa none aho kunyitura ahubwo ari kuzana ibibazo mu rugo rwanjye

-Sawa noneho

-Uvuze ngo? Subiramo numve mfite ibibazo byo kumva neza

-Nakubwiye ngo ubikore uko ubishaka

*****************************

(Jasmin)

Nasigaye mu gikoni ndategura ariko nariye ibya mu gitondo jyenyine kuko nyuma y’iminota micye nabonye Willy na Ismael basohoka. Sinari nitaye ku byo amubwira gusa kuba umugabo wanjye agiye gushyirwa mu mugambi mubisha atabizi byarambabaje. Nahisemo kurindira agarutse nkamubwira byose byabaye adahari

Rose yari yavuze ko inzu kuyitunganye wenyine bimuvuna, nanjye uwo munsi niriwe nkora uturimo two mu rugo tunyuranye. Ubwo narimo ntegura icyumba cy’abashyitsi ni bwo Willy yagarutse mu rugo

-Umugore mwiza ndakubona kakwishe

-Ndeka wa. Ukuntu nsa birashekeje uyu munsi

-Ndabizi mu mutwe hawe harimo byinshi. Mvuye kureba umuntu ku kibuga cy’indege nyuma nagiye no mu birori byo gutaha ahantu ku mugaragaro

-Eeeh. Nibyo

Yaranyegereye nuko aransoma

-Urankanze nawe.

Yarakomeje afatiraho, mu mutima nibwira ko mbonye umwanya mwiza wo kumubwira akandi ku mutima. Ubwo yashakaga gukomeza ankuramo imyenda naramwiyatse buhoro mu kinyabupfura

-Nyihanganira

-Oya niba utameze neza nta kibazo urabizi

-Ahubwo nshaka kuzajya kwa muganga iki cyumweru

-Yarakubwiye se ngo uzabe uretse kubonana n’umugabo? Ko ejo bundi se twabikoze

-Nashakaga ko wishima cya gihe

-None se uratwite? Nshaka tuzajyane

-Oya Willy ntabwo ntwite

Ibi se ubundi mbizi nte ko ari ukubeshya? Ariko nanone aho kwemera ibitaremezwa na muganga nahakana da.

-Ntacyo nzaguherekeza kwa muganga ntegerereze inyuma y’umuryango.

-Gusa hagati aho hari ikintu nshaka kukubwira

Ako kanya terefoni ye yarasonnye. Ni SMS yari ije, ntiyayisomye ariko mbona ahindutse mu maso

-Nyihanganira cherie. Birihutirwa

-Ibyo nshaka kukubwira ariko nabyo birihutirwa

-Ihangane sintinda ni iminota 30 gusa, nawe uraba uri gusoza ibyo wakoraga

-Nashakaga kukubwira kuri Ismael. Ese ubundi ugiye he?

Acyumva izina rya mubyara we nabonye yongeye guhinduka. Nanjye mu mutwe wanjye hatangira kwibaranguramo ibintu byinshi, mu nda hatangira kundya ndetse numva ngiye kurwara impiswi. Ariko nari nafashe umwanzuro

-Ismael?

-Yego. Ndagusaba kumwitondera. Ntabwo mwizera na gato kuko si umuntu mwiza

-Icyo uvuga ni ukuri. Nizere ko atagusuzuguye

-Nibyo nashakaga kuku..

Bahise bakomanga ku rugi. Willy afunguye abona ni Rose

-Bite Rose?

-Mabuja baramushaka muri salo

-Sawa

Willy yarongeye akingaho

-Uracyeka yaba ari nde?

-Uyu munsi nta muntu dufitanye gahunda. Ko utamubajije unshaka ni nde se?

-Nabyibagiwe. Ngaho itaba nanjye ngende ubwo turasubukura ikiganiro ngarutse

Yansomye ku itama nuko arasohoka

Amaze gusohoka nanjye nagiye muri salon kureba umuntu unshaka

Nasanze ari umugore gusa yari ahagaze anteye umugongo yitegereza ifoto yacu y’ubukwe imanitse muri salon, sinahise mumenya.

Narakoroye buhoro ngo yumve ko nje nuko nawe arahindukira

-Ah. Muraho. Narimo ndeba ifoto yanyu y’ubukwe. Ni nziza cyane

Nahise mureba mbona ifoto ye najyaga mbona ntiyambeshye. Ni we rwose. Yewe reka ararure abagabo kuko ni mwiza pe. Yahise akomeza

-Ni wowe Jasmin?

-Yego ni jyewe. Nawe ndabona uri Victoria?

-Aho ntiwibeshye rwose ndi we. Ubwo ndumva twese tuziranye, ndi wa mugore utigeze wifuza ko azajya avugwaho. Noneho niyiziye

Uyu Victoria se kandi we bite bye? Ese iriya CD ya Ismael iriho ibiki?

…/…

3 comments

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s